Lufuunjisho 2

Lesa Ye Ñanyi?

Lesa wakiine ñanyi, kabiji ñanyi jizhina? (1, 2)

Uji na mubiji wamutundu ka? (3)

Ñanyi misango yanji ikatampe yo aji nayo? (4)

Nanchi twafwayinwa kwingijisha bipasha ne biyukilo pa kumupopwela nyi? (5)

Ñanyi mashiinda abiji otwakonsha kumuyuukilamo Lesa? (6)

1. Bantu bapopwela bintu byavula. Bino Baibolo itubuula kuba’mba pajitu Lesa umo wa KIINE. Ye walengele byonse bya mwiulu ne bya panopantanda. Na mambo akuba aye ye witupele buumi, Yeye twafwainwa kupopwelatu bunke.—1 Kolinda 8:5, 6; Lumwekesho 4:11.

2. Lesa uji na mazhina amushingi avula bino ujitu na jizhina jimo. Jino jizhina ke YEHOBA. Mu ma Baibolo avula, jizhina ja Lesa bejifumyamo ne kwijipingizhamo na mazhina amushingi NKAMBO nangwa LESA. Pano kimye Baibolo kyo yanembelwe, jino jizhina ja Yehoba jatayinwemo bimye nobe 7,000!—Kulupuka 3:15; Masalamo 83:18.

3. Yehoba uji na mubiji, bino kechi uji nabiji wetune. “Lesa ye Mupashi,” byo byaamba Baibolo. (Yoano 4:24) Mupashi ke mutundu wa buumi bwapusenshantu na bwetu. Kafwako muntu nangwa umo wamonapo Lesa ne. Yehoba uji mwiulu, bino umona bintu byonse. (Masalamo 11:4, 5; Yoano 1:18) Pano, bino, mupashi wazhila ye muka? Kechi muntu wapasha Lesa ne. Ayo, ke ngovu ya Lesa ingila.—Masalamo 104:30.

4. Baibolo ituvumbwila bumuntu bwa Yehoba. Itubula kuba’mba misango yanji ikatampe yo butemwe, bololoke, maana, ne ngovu. (Mpitulukilo ya mu mizhilo 32:4; Yoba 12:13; Isaya 40:26; 1 Yoano 4:8) Baibolo yatwajijila kwitubula’mba aye walusa, wakifyele, ulekela mambo, upaana, kabiji watekanya. Atweba, nobe baana bomvwina, twafwainwa kweseka kumulondela.—Efisesa 5:1, 2.

5. Nanchi twafwainwa kufukama ne kupopwela bankishi, bipikichala, nangwa biyukilo mukupopwela kwetunyi? Ine! (Kulupuka 20:4, 5) Yehoba witukambizha kuba’mba twafwainwa kumupopwela aye yenkatu. Kechi ukabana lukumo lwanji na muntu nangwa kintu kyonse ne. Bankishi kechi baji nangovu ya kwitukwasha ne.—Masalamo 115:4-8; Isaya 42:8.

6. Twakonsha kumuyuuka bulongo byepi Lesa? Jishinda jimo ke ja kumona bintu byoalenga ne kulangulukishapo nangovu byobitubula. Bilengwa na Lesa bitumwesha kuba’mba wamaana ne ngovu ikatampe. Tumona butemwe bwanji kupichila mu byonse byoalenga. (Masalamo 19:1-6; Loma 1:20) Jishinda jikwabo jotwakonsha kumuyuukilamo Lesa keja kufuunda Baibolo. Muno aye mwine witubula byavula mutundu wa Lesa byoaji. Kabiji witubula kufuukula kwanji ne byo akeba atweba kuba.—Amosi 3:7; 2 Timoti 3:16, 17.

[Bipikichala pa peja 5]

Tufuunda Lesa kupichila mu bilengwa ne mu Baibolo