Lufuunjisho 9

Bakalume ba Lesa Bafwainwa Kwikala Batooka

Mamboka otwafwainwa kwikala batooka mu mashinda onse? (1)

Kyalumbululaka kwikala batooka kumupashi? (2)

batooka mubyubilo? (3) batooka mumilangwe? (4) batooka ku mubiji? (5)

Ñanyi ñambilo ya bipa yotwafwainwa kuchiina? (6)

1. Yehoba Lesa watooka kabiji wazhila. Ukeba bamupopwela kwikala batooka—kumupashi, mubyubilo, mumilangwe, ne kumubiji. (1 Petelo 1:16) Kwikala watooka mu meeso a Lesa kikebwa kukosapo. Twikala mu kyalo kya bipa. Kabiji tuji pankondo na kisemwa kyetu kyakuba byatama. Bino kechi twafwainwa kwikileka ne.

2. Kutooka Kumupashi: Inge tukebakwingijila Yehoba, kechi twafwainwa kutwajijila kulamachila ku mafuunjisho ne bisho bya bupopweshi bwa bubela ne. Twafwainwa kufuma mu bupopweshi bwa bubela ne kuleka kwibutundaika nangwa pachechetune. (2 Kolinda 6:14-18; Lumwekesho 18:4) Inge twafuunda kiine kya kwa Lesa, twafwainwa kujimuka kubula kujimbaikwa na bantu bafuunjisha byabubela.—2 Yoano 10, 11.

3. Kutooka mu Byubilo: Yehoba ukeba bamupopwela kwisunga nobe Benakilishitu bimye byonse. (1 Petelo 2:12) Umona bintu byonse byotuba nangwa mubufyamfya. (Bahebelu 4:13) Twafwainwa kuchiina bulalelale ne byubilo bikwabo byatama bya kino kyalo.—1 Kolinda 6:9-11.

4. Kutooka Mumilangwe: Inge twayuzha milangwe yetu na minlaguluko yawama, yatooka, byubilo byetu nabyo bikekala byatooka. (Filipai 4:8) Bino inge twachinamina bintu byatama, mukafuma byubilo byatama. (Mateo 15:18-20) Twafwainwa kuchiina bisela bimo byakisangajimbwe byakonsha kusombesha milangwe yetu. Twafwainwa kuyuzha milangwe yetu na milanguluko itooka pa kufuunda Mawi a Lesa.

5. Kutooka ku Mubiji: Mambo bemenako Lesa, Benakilishitu bafwainwa kusunga mibiji yabo ne bivwalo kwikala byatooka. Twafwainwa kowa ku maboko pa kufuma ku kimbusu, kabiji ne kowako sakatukyangye kutendeka kuja kajo nangwa kukwata ku bya kujane. Inge kechi muji na kimbusu ne, mwafwainwa kuzhiika bincha. (Mpitulukilo ya mu Mizhilo 23:12, 13) Kwikala batooka kumubiji kukwasha kwikala na butuntulu bwawama bwa mubiji. Nzubo ya Mwinakilishitu yafwainwa kwikala yakipale ne kutooka pangye ne mukachi. Yafwainwa kwikala ya kimwesho kyawama mu kimasamasa.

6. Ñambilo Yatooka: Bakalume ba Lesa bafwainwa kwambanga kiine kimye kyonse. Babubela kechi bakatwela mu Bufumu bwa Lesa ne. (Efisesa 4:25; Lumwekesho 21:8) Benakilishitu kechi bengijisha ñambilo yatama ne. Kechi bamba mikeyu nangwa kumvwina ku ñambilo yavundankanane. Mambo añambilo yabo yatooka, bapusanako na bakwabo ku nkito nangwa kusukuulu nangwa kobekala.—Efisesa 4:29, 31; 5:3.

[PicturesCaption on page 19]

Bakalume bakwa Lesa bafwainwa kwikala batooka mu lubaji lonse