Lufuunjisho 10

Byubilo Lesa Byoashikwa

Mwafwainwa kumvwa byepi pa bintu Lesa byo aamba’mba byatama? (1)

Ñanyi mitundu ya kwilaala yatama? (2)

Mwinakilishitu wafwainwa kumona byepi bubela? (3) kuteya ngyuka? (3) kwiiba? (3) bulwanyi? (4) kupopwela mipashi? (5) bukyakolwa? (6)

Muntu wakonsha kuleka byepi byubilo byatama? (7)

1. Bakalume ba Lesa batemwa byawama. Pano bino bafwainwa kufuunda kushikwa bubi. (Masalamo 97:10) Kino kyalumbulula’mba kuchiina byubilo bimo Lesa byoashikwa. Ñanyi byubilo bimo bya byobyo?

2. Bulalelale: Kwilaala kwakubula kwisongola, bukende, kulaala na nyama, kwilaala na mulongo obe, ne kwilaala kwa babwamba bumo ke mambo akatampe bingi kwi Lesa. (Bena Levi 18:6; Loma 1:26, 27; 1 Kolinda 6:9, 10) Inge wamulume ne wamukazhi kechi besongolane bino bakikala pamo, bafwainwa kwabana nangwa kwisongola mwaila muzhilo.—Bahebelu 13:4.

3. Bubela, Kuteya Ngyuka, Bwivi: Yehoba Lesa kechi wakonsha kubepa ne. (Titusa 1:2) Bantu bakeba bulunda ne aye bafwainwa kuchiina bubela. (Byambo bya Mana 6:16-19; Kolose 3:9, 10) Mutundu yense wa ngyuka umwesha kichima. Benakilishitu kechi bafwainwa kwikalamo na lubaji mu mitundu ya kuteya ngyuka nobe malotale, kapeela kana bambili, ne ngyuka ya tubikachine. (Efisesa 5:3-5) Kabiji Benakilishitu kechi beba ne. Kechi bapota bintu byakwiiba nangwa kutoola bintu kwakubula luusa ne.—Kulupuka 20:15; Efisesa 4:28.

4. Bukaji, ne Bulwanyi: Bukaji nge bwapitaila bulengela bulwanyi. (Ntendekelo 4:5-8) Mulwanyi kechi mulunda ne Lesa ne. (Masalamo 11:5; Byambo bya Mana 22:24, 25) Kyatama kwifila mfika ne kushinkanya inge bamo betutamisha.—Byambo bya Mana 24:29; Loma 12:17-21.

5. Kupopwela Mipashi ne Bulozhi: Bantu bamo beta mipashi kuba mba ibabuke bikola byabo. Bamo balowa balwanyi babo nangwa kwibabeezha nangwatu kwibepaya. Ngovu ya byonse bino ye Satana. Benakilishitu kechi bafwainwa kwikalamo na lubaji ne. (Mpitulukilo ya mu Mizhilo 18:9-13) Kufwenya kwipi na Yehoba ko kwizhikijila kwawamatu ku maanga obakonsha kwituteya ku bamo.—Byambo bya Mana 18:10.

6. Bukyakolwa: Kechi kyatama kutoma tubinyu, maalwa nangwa byakutoma bikwabo pacheche ne. (Masalamo 104:15; 1 Timoti 5:23) Bino kutomesha nangovu ne kupendwa kyatama kwi Lesa. (1 Kolinda 5:11-13; 1 Timoti 3:8) Kutomesha nangovu konauna butuntulu bwa buumi bwenu ne kulubankanya kisemi kyenu. Kwakonsha kwimulengesha kwilekelela ku lweseko lwapusanapusana.—Byambo bya Mana 23:20, 21, 29-35.

7. Bantu boba bintu byoakana Lesa kechi “bakaswana bufumu bwa kwa Lesa ne.” (Ngalatiya 5:19-21) Inge kya kiine mwamutemwa Lesa kabiji mukeba kumutookesha pa muchima, mwafwainwa kuleka bino byubilo. (1 Yoano 5:3) Fuundai kushikwa bintu Lesa byoakana. (Loma 12:9) Ivwangai na bantu baji na byubilo bya munema wakunemeka Lesa. (Byambo bya Mana 13:20) Balunda baBwinakilishitu bakosa bakonsha kwikala nsulo ya bukwasho. (Yakoba 5:14) Kyakila pa byonse, ketekelai pa bukwasho bufuma kwi Lesa kupichila mu milombelo.—Filipai 4:6, 7, 13.

[Bipikichala pa peja 20, 21]

Lesa washikwa bukyakolwa, kwiiba, kuteya ngyuka, ne bulwanyi