Yesu Kilishitu Ye Ñanyi?

“NANGWATU bantu babula bena Kilishitu baitabila kuba’mba, wajinga mufunjishi wayile bingi nkuwa kabiji wa maana. Wajinga muntu umo wajinga bingi na bulume pa bantu.” (The World Book Encyclopedia) Nanchi “ye” ñanyi? Yesu Kilishitu yenka watendekeshe bwina Kilishitu. Nanchi mwamuyuka nyi? Nanchi wimulamata mu jishinda jiji jonse mu bwikalo bwenu nyi?

Bintu byaubile Yesu mu mwingilo wanji byanembwa mu mabuku ana atelwa’mba Mambo awama. Abya ano mashimikila a kine nyi? Panyuma ya kwiabalaula bulongo, munembeshi wa bya mpito umo wayukanyikwa bingi aye Will Durant wanembele’mba: “Kwamba kuba’mba bantutu bacheche pa kimye kimo basombeletu muntu mukatampe wa kusomba wajinga na byubilo byakilamo kuwama ne mulanguluko mukatampe wa bwanabwankazhi, ke kya kukumya bingi kyakonsha kukila pa bya kukumya byonse byanembwa mu Mambo awama.”

Nangwa byonkabyo, bantu bavula bekala mu matanda a ku Musela ne mu matandatu akwabo kechi bamuyuka Yesu Kilishitu ne. Bakonsha kuswa’mba waikeleko, pano bino kechi balangulukapo’mba wibalamatapo mu bwikalo bwabo ne. Bakwabo nabo kechi bakebapo ne kumuyuka Yesu ne, na mambo a byubilo byatama byauba boba bebepekezha kwikala baana banji ba bwanga. ‘Bantu bamo mu kyalo kya Japan bakonsha kwamba’mba olo, bena Kilishitu kabiji bo baponeshe bomba wa atomu wavizhizhe bantu mu muzhi wa Nagasaki,’ muzhi muji bena Kilishitu bavula kukila mizhi yonse ya mu Japan.

Abya, mwakonsha kupamo mambo dokotala umvwe mulwazhi wakankalwa kulondela mukambizho ye amupa nyi? Ine. Bantu ba mu Kilishitendomu balengulula pa kimye kyabaya bingi mikambizho ya Yesu yakonsha kwibakwasha kupwisha makatazho apa juba ne juba. Onkao mambo, mu kifulo kya kukana Yesu Kilishitu na mambo a boba betela’mba bena Kilishitu babula kulondela mikambizho yanji, mambo ka o mwabujila kufundako bimo pe aye? Talai mu Baibolo, mumone kya kine byo aji kabiji ne byo akonsha kupimpula bwikalo bwenu.

Butemwe—Ye Mukambizho Wanji

Yesu Kilishitu wajinga mufunjishi wayukile bingi kufunjisha waikeleko mu Pelisitina pepi na myaka 2,000 yapitapo. Kafwako bintu byavula byayukanyikwa pa mambo a bwanyike bwanji ne. (Mateo, kitango 1 ne 2; Luka, kitango 1 ne 2) Byo afikizhe myaka ya kusemwa 30, Yesu watendekele mwingilo wanji wa ‘kushimuna bya bukine.’ (Yoano 18:37; Luka 3:21-23) Banembeshi bana ba mpito ya bwikalo bwa Yesu batele bingi muchima pa mwingilo wanji ye aingijile pa myaka isatu ne kichika ya bwikalo bwanji bwa panopantanda.

Kimye kya mwingilo wanji, Yesu wabulañene kintu kyakonsheshe kukwasha baana banji ba bwanga kupwisha makatazho a mu bwikalo bwabo. Nga kyo kintu kyajinga ki ka? Kyajinga butemwe. Mu jashi jimo jayukanyikwa bingi ja kala kene jitelwa’mba Jashi ja pa Mutumba, Yesu wafunjishe baana banji ba bwanga bya kumwesha butemwe ku bantu bakwabo. Waambile’mba: “Bintu byonse byo musaka’mba, bantu betubile, ne anweba sa mwibobila byonkabya.” (Mateo 7:12) Jino jifunde jitelwa’mba Muzhilo Wawama. “Bantu” bo atongwelenga Yesu pano bavwangamo ne balwanyi ba muntu. Mu jashi jintutu jimo, waambile’mba: “Sa mwibatemwa balwanyi benu ne kwibalombela bemupata.” (Mateo 5:44) Nanchi butemwe bwa iwe mutundu kechi bwakonsha kupwisha makatazho o tubena kutalañana nao lelo jino ne nyi? Ntangi wa Bahindu aye Mohandas Gandhi byobyo alangulukile. Byambo byo ambile byanembwa’mba: “Umvwe [ke] tulondele mafunjisho afunjishe Kilishitu mu Jashi janji ja pa Mutumba, abya tukapwisha makatazho . . . a panopantanda ponse.” Kulondela mafunjisho a Yesu pa mambo a butemwe, kwakonsha kupwisha makatazho etu.

Byo Amweshesha Butemwe

Yesu waubanga bintu byo afunjishanga. Watangizhangako bintu bya bakwabo palutwe ya bintu byanji kabiji wamweshanga ne butemwe. Juba jimo, Yesu ne baana banji ba bwanga baingijilenga bantu bavula kwa kubula kumonapo ne kimye kya kujiilamo kajo ne. Yesu byo amwene’mba baana banji ba bwanga babena kukeba ‘kukokolokako,’ bayile ku mpunzha ya kwa bunke bwabo. Pano bino jibumba janyemene lubilo kuya kulutwe yabo na kwi bapembelela. Umvwe yenu mwajinga Yesu inge mwaubilepo byepi? Yesu “wibobile lusa” kabiji “ponkapo watatwile kwibafunjisha byavula.” (Mako 6:30-34) Luno lusa lukatampe lo lwa mulengejile kukwasha bantu.

Bintu byo aubile Yesu bya kukwasha bantu kechi byapelejiletu mu mafunjisho a ku mupashi onka ne. Wibakwashishenga ne ku mubiji. Kya kumwenako, wajishishe banabalume 5,000 (kwa kubula kubajilako banabakazhi ne banyike) bamutelekelenga juba jonse kufika ne byo jazhikile. Kabiji pa kimye kikwabo wajishishe bantu 4,000. Pa kimye kitanshi waingijishe bashinkwa batanu ne masabi abiji, kabiji pa kimye kikwabo waingijishe bashinkwa batanu na babiji ne masabi achechetu. (Mateo 14:14-21; 15:32-38; Mako 6:35-44; 8:1-9) Nanchi bye kechi byajinga bya kukumya nenyi? Ee, Yesu waubanga bya kukumya.

Yesu wabukile ne bantu bavula bajinga na bikola. Wabukile bampofu, bilema, ba mbumba, ne bashinka matwi. Kabiji wasangwile ne bafu! (Luka 7:22; Yoano 11:30-45) Kimye kimo, muntu wa mbumba wamusashijile’mba: “Umvwe mwaswa, mwakonsha kumbuka.” Nga Yesu waubilepo ka? “Byo amubile lusa, watanyikile kuboko kwanji ne kumukwata’mba, Naswa; mubukwe.” (Mako 1:40, 41) Yesu wakebeshe bingi kukwasha bantu. Wamwesheshe butemwe ku balanda kupichila mu bino bya kukumya byo aubilenga.

Nanchi kyashupa kwitabila nyi? Pano bino Yesu waubanga bya kukumya byavula pa mvula bantu. Nangwatu balwanyi banji baesekanga kimye kyonse kukeba kumutana na mambo, kechi bakainepo’mba waubilenga bya kukumya ne. (Yoano 9:1-34) Bya kukumya byo aubilenga byajinga na nkebelo. Byakwashishe bantu kuyuka’mba Yesu watuminwe kwi Lesa.—Yoano 6:14.

Kwisambakotu pacheche pa mafunjisho a kwa Yesu ne bwikalo bwanji, kwitulengela kumutemwa kabiji ne kwitulengela kukeba kulonda butemwe bwanji. Pano bino, aje kechi jo jishindatu jonka Yesu mo akonshesha kwimulamachila mu bwikalo bwenu ne. Kechi wajingatu mufunjishi wayukisha wafunjishenga butemwe ne. Wamwesheshe kuba’mba saka akyangye kwikalako mu bumuntu, wajinga Mwana yenkawa umo wa Lesa. (Yoano 1:14; 3:16; 8:58; 17:5; 1 Yoano 4:9) Kabiji waikelepo ne mu bumuntu panopantanda, kimulengela kwikala wanema kwi anweba. Baibolo waamba’mba Yesu wasangwilwe kabiji luno ke Mfumu wa Bufumu bwa Lesa. (Lumwekesho 11:15) Yesu waambile’mba: “Buno bo bumi bwa myaka, namba bemuyuke anweba, Lesa yenka wa kine, ne Yesu Kilishitu ye mwatumine.” (Yoano 17:3; 20:31) Ee kine, kuyuka Yesu Kilishitu kwakonsha kulumbulula bumi bukabula kupwa mu Paladisa! Pano kino kyakonsha kwikala byepi byo byo? Nga mambo ka a kubujila kufunda pe Yesu ne kumona ‘butemwe bwa Kilishitu byo bwitwingijisha’ kumulondela? (2 Kolinda 5:14) Bakamonyi ba kwa Yehoba bakomvwa bingi bulongo kwi mukwasha.—Yoano 13:34, 35.

Binembelo byo twaingijisha byafuma mu Buku wa Lesa wa Kikaonde kana twamwesha ungi. Pa kinembelo umvwe panembwa NW, kibena kulumbulula’mba abyo byambo byatuntululwa kufuma mu Baibolo wa New World Translation of the Holy Scriptures.