Kukasuluka Kabiji ne Kwiumvwa

BINTU byo twiumvwa byanema bingi mu bwikalo bwa bantu. Umvwe muntu wamwesha byo abena kwiumvwa, umwesha biji mukachi ka muchima wanji, kabiji ne byo alanguluka pa bintu ne pa bantu. Na mambo a bintu byakatazha byo bapitamo mu bwikalo bwabo kabiji ne na mambo a bisho, bantu bavula batemwe bingi kwifya byo beumvwa ku muchima. Bino Yehoba witutundaika kwikala na byubilo byawama mukachi ka muchima kabiji ne kwibimwesha.—Loma 12:10; 1 Tesa. 2:7, 8.

Umvwe ketwambe, byambo byo twamba byakonsha kumwesha byo tubena kwiumvwa. Pano bino, umvwe byambo byetu kechi byayilamo na byo tubena kwiumvwa ne, banteleki bakonsha kwituzhinauka. Bino inge byambo kebiyilemo na byo tubena kwiumvwa, ñambilo yetu ikomvwanyika bingi bulongo kabiji ne kufika pa michima ya babena kuteleka.

Kumwesha kukasuluka. Kwiumvwa wakasuluka javula kuyila pa muntu byo abena kulanguluka pa bantu bakwabo. Onkao mambo, inge ketwambe pa byubilo bya Yehoba ne pa kumwesha lusanchilo lwetu lwa kusanchila buwame bwanji, jiwi jetu jafwainwa kumvwanyika ja lusekelo. (Isa. 63:7-9) Kabiji inge ketwambe ku bantu, jishinda jo tubena kwambilamo najo jafwainwa kumwesha’mba twibakasulukila.

Muntu wa mbumba waishile kwi Yesu ne kumusashijila’mba amubuke. Fwanyikizhai ñumvwanyikilo ya jiwi ja Yesu byo aambile’mba: “Naswa; mubukwe.” (Mako 1:40, 41) Kabiji fwanyikizhai mwanamukazhi wajinga na kikola kya kupita mashi myaka 12 byo aishile kwi Yesu kunyuma yanji ne kukwata kunsa ya kivwalo kyanji. Mwanamukazhi byo ayukile’mba kechi wafyamine ne, waishile saezakamina ne kuponena ku maulu a Yesu ne kwamba ku meso a bonse ene mambo o amukwachile ku kivwalo kyanji kabiji ne mo abukijilwe. Akilangulukai ñambilo Yesu yo amwambijilemo’mba: “Inetu, lwitabilo lwenu lwimupulusha, yainga mu mutende.” (Luka 8:42b-48) Kukasuluka kwamwesheshe Yesu pa byobya bimye kwitukosesha bingi ne buji lelo.

Kubila bantu lusa ne kukebesha kwibakwasha byonka byaubilenga Yesu, kumwekela mu jishinda jo twambilamo nabo. Kukasuluka kwa uno mutundu kwikala kwa kine, kechi kwa kubepekezhatu ne. Kukasuluka kwetu kukebalengela nabo kukasuluka. Bintu byavula byo twamba mu mwingilo wa mu bujimi bikebewa kwibyamba saka twakasuluka kikatakata umvwe tubena kwambañana, kutundaika, kukambizha ne kutekenesha bantu.

Umvwe mwakasulukila bantu, mweshai na kilungi kyenu. Inge mwamwesha kukasuluka, bantu nabo bakafwenya kwipi ne anweba byonka byo bafwenya ku mujilo umvwe kwauba mashika. Inge mwabula kumwesha kukasuluka pa kilungi kyenu, bantu bo mubena kwambako kechi bakashiinwa’mba mwibata muchima ne. Kukasulukila bantu kechi kwafwainwa kwikala kwa pa kanwatu ne, kwafwainwa kufuma mu muchima.

Kabiji kukasuluka kwafwainwa ne kumvwanyikila mu jiwi jenu. Umvwe muji na jiwi ja bukaji, kyakonsha kushupa bingi kumwesha kukasuluka mu ñambilo yenu. Bino, mu kupita kwa kimye kabiji ne kwibikako, mukakonsha kwambanga saka mwakasuluka. Kintu kimo kyakonsha kwimukwasha mu ñambilo ke kuyuka’mba, umvwe kemwambe lubilo na kuchibaula byambo kikemukatazha bingi. Ambainga pachepache saka mwatekanya. Kino kikemukwasha kwamba saka mwakasuluka.

Nangwa byonkabyo, kyakila pa byonse ke kutesha muchima ku byo mukeba kwamba. Umvwe mwatesha muchima bantu bo mubena kwambako kabiji ne kukebesha kwibabula bintu byakonsha kwibakwasha, ñambilo yenu ikamweshanga byo mubena kwiumvwa.

Ñambilo ya lusekelo itundaika bantu, bino kwibata muchima nako kukwasha bingi. Kechi kimye kyonse kyo twafwainwa kwibetabishatu ne, twafwainwa kwibatundaika kuba byo tubena kwambapo.

Kumwesha Bintu Bikwabo byo Twiumvwa. Muntu uji mu malwa wakonsha kumwesha bintu byo twiumvwa nabiji kijikila, moyo ne binyenge. Lusekelo lo lwafwainwa kwikala kintu kikatampe mu bwikalo bwetu kabiji twafwainwa kwilumweshanga na muchima yense pa kwamba na bantu. Pano bino, bintu bimo byo twiumvwa bikebewa kwibijimukila bingi. Kechi byayilamo na byubilo bya bwina Kilishitu ne. (Efi. 4:31, 32; Fili. 4:4) Kwiumvwa konse kwakonsha kumwekela mu byambo byo twasala kwamba, jiwi jetu, kukosa kwajo, kilungi ne ñingijishisho ya binungwa bya mubiji.

Baibolo waamba pa bintu byonse byo beumvwa bantu. Kimye kimo, watongaula bine bintu byo beumvwa. Pa bimye bikwabo, waamba pa byamwekanga nangwa kwamba byambo bimwesha bantu byo beumvwanga. Umvwe kemutange bintu bya uno mutundu na jiwi jasansuka, byakonsha kwimukwasha anweba ne babena kwimuteleka, inge jiwi jenu kejimweshe byobyo bintu byo beumvwinenga. Pa kuba’mba mube kino, mwafwainwa kwifwanyikizha kwikala pa bobo bantu bo mubena kutangapo. Nangwa byonkabyo, jashi kechi kisela ne, onkao mambo, kechi mwafwainwa kuvwangamo ne bya bubela ne. Lengelai banteleki kumvwa nobe babena kumona byobyo bintu byo mubena kwambapo.

Kwayilamo na Byambo byo Mubena Kwambapo. Byonka biji kizaku, kukasuluka mu bintu byo mubena kwambapo ne kumwesha byo mubena kwiumvwa kwaimena pa byambo bine byo mubena kwambapo.

Zhikulai mu Mateo 11:28-30, ne kumona byo aamba. Pano tangai ne byambo bya Yesu bya luzhachisho ku banembeshi ne Bafaliseo biji mu Mateo kitango 23. Kechi twakonsha kuketekela’mba Yesu waambilenga na mulele bino byambo bya kwibazhachisha ne.

Kwiumvwa kwa mutundu ka ko mwalanguluka’mba ko kwafwainwa kuyilamo pa kutanga jishimikila nabiji jiji mu Ntendekelo kitango 44 jaamba pa mambo a Yuda wasashijilengako mulongo wanji Benjamina? Akimonai Yuda byo eumvwine mu kyepelo 13 ne mu kyepelo 16 pa mambo a kine kintu kyaletele oa malwa, kabiji ne Yosefwa byo eumvwine byonka byo baamba mu Ntendekelo 45:1.

Onkao mambo, nangwa tubena kutanga nangwa kwamba, pa kuba’mba tube bulongo kechi twafwainwa kuteshatu muchima ku byambo ne milanguluko yonka ne, bino twafwainwa ne kumwesha kwiumvwa kujimo.