Kwamba mu Bumwisambo

BANTU javula bakasuluka bingi umvwe babena kwisamba na balunda nabo. Kechi bamamata ne. Bamo bamba na kizaku; bakwabo ne. Nangwa byonkabyo, kwamba mu ñambilo ya kisemwa kumvwanyika bingi bulongo.

Umvwe mwatana muntu ye mwabula kuyuka, kechi kikebewa kwamba nobe mwiyukile nanji kala nangwa kwamba bya tuseko ne. Mu bisho bimo, pa kwisamba na muntu ye wabula kuyuka, bamba na mushingi. Panyuma ya kwiimuna bulongo mwayila kyokyo kisho kabiji ne kumona umvwe kyakonsheka, po po mwakonsha kubikamo ne bya tuseko pa kwisamba nanji.

Pa kwamba pa mutuntamo napo kikebewa kujimuka. Kukizhamo kuba bisela kukepesha munema wa kupwila kwa bwina Kilishitu kabiji ne kulengela bantu kubula kuteshako muchima ku bintu bibena kwambiwa. Mu milaka imo, kuji byambo bingila pa kwisamba na muntu wakoma, mufunjishi, kinemanga nangwa na nsemi. (Monai byambo byo baingijisha mu Byubilo 7:2 ne 13:16.) Kuji ne bingila pa kwamba ku mwina kobe nangwa ku mulunda nobe wa pa muchima. Nangwa kya kuba ñambilo yetu pa mutuntamo yakonsha kwikalako ne na tubisela, bino yafwainwa kwikala ya mushingi.

Nangwa byonkabyo, kuji bintu bimo byakonsha kulengela ñambilo ya muntu kubula kumvwanyika bulongo. Kintu kimo kilengela bino ke nsokankenyo ya mikuku ya byambo nangwa bipelu. Lukatazho lwikalapo umvwe ñambi keakebe kwambatu byambo byonka byo byanembwa pa papela. Byambo byanembwa javula bipusana bingi na byambiwa. Ibyo kuba’mba pa kunengezha jashi tupesapesa byambo mu mabuku anembwa. Kampe jashi jenu janembelwa jimo. Pano bino, inge pa kwamba jashi kemwambetu byambo byonka byo bebinemba nangwa ke mwibitangetu, ñambilo yenu kechi ikekala ya bumwisambo ne. Pa kuba’mba mwambe mu bumwisambo, ambainga milanguluko mu byambo byenu ne kuchinuzhuka kwingijisha mikuku yakatazha.

Kikwabo nakyo kilengela, ke musenselo ye mubena kwambilapo. Javula kilengela ñambilo kubula kumvwanyika bulongo ke kwamba byambo na kuchibaula chibaula kabiji ne kwibyambila pa musenselo umotu. Mu misambo ya kimye kyonse kwikala kwambako lubilo nangwa pachepache kabiji ne kutulumanako.

Umvwe kemwambe ku bantu bavula, ñambilo yenu ya bumwisambo yafwainwa kwambiwa na jiwi jakanza, jakosa kabiji ne na kizaku kuba’mba bantu bomvwenga.

Pa kuba’mba mwambenga bulongo mu bumwisambo mu mwingilo wa mu bujimi, mwafwainwa kwambanga bulongo kimye kyonse. Kino kechi kilumbulula’mba mwafwainwa kufunda kufika palepa ne. Pano bino, kyanema bingi kwamba ñambilo yawama yakonsha kulengela bantu kuteleka na mushingi ku byo mubena kwamba. Pa mambo a kino, akimonai umvwe mwafwainwa kwingijilapo pa bino bishinka mu misambo yenu ya kimye kyonse.

1. Kange mwingijishenga byambo byabula kuyilamo na mulakazhilo nangwa byakonsha kwimulengela kuyukanyikwa’mba muji na bwikalo bubula kunemeka Lesa ne. Kwesakana na mafunde aji mu Kolose 3:8, kwambanga ñambilo ya kwijantula nangwa ya mwenga ne. Pano bino, byambo bimo bingila kimye kyonse kechi byatama ne. Bino byambo twibyamba byonkatu byo twamba kimye kyonse, kabiji byayilamo na ñambilo yawama.

2. Pa kulumbulula milanguluko yapusana pusana, kwingijishangatu byambo ne bipelu bintutu bimo ne. Fundainga kwingijisha byambo bisakulumbulula bulongo kyo mubena kukeba kwamba.

3. Chinuzhukainga kubwezhabwezhapo bintu byo mwaamba kala kupichila mu kuyukisha bulongo kyo mukeba kwamba; apa bino mwatendeka kwamba.

4. Kange mulengelenga milanguluko kubula kumvwanyika na mambo a kuvuzha byambo ne. Esekainga kwamba bulongo mu byambo byapela kishinka kyo mubena kukeba bantu kubula kulubamo.

5. Ambainga na mushingi.