Kwamba na Kusumininwa

UMVWE muntu keambe na kusumininwa, bantu bakamumona’mba waketekela kya kine bintu byo abena kwamba. Mutumwa Paulo waambilenga na kusumininwa mu mwingilo wanji. Ku baitabijile bajinga mu Tesalonika, wibanembejile’mba: “Mambo etu awama kechi aishile kwi anweba mu byambo byonka ne, pakuba aishile . . . mu kuyukisha” nangwa’mba mu kusumininwa “kwa kine kukatampe.” (1 Tesa. 1:5) Kuno kusumininwa kwanji kwamwekelanga mu ñambilo yo aambilangamo kabiji ne mu bwikalo bwanji. Ne atweba ñambilo yetu ya bukine bwa mu Baibolo yafwainwa kumweshanga’mba twasumininwa kya kine bintu byo tubena kwamba.

Kusumininwa kechi kulumbulula kuminatu ku kintu kyabula munda ne munyuma nangwa kwikala wa bwitote ne. Muntu wasumininwa umvwe keambe pa bintu biji mu Mambo a Lesa, wibyamba saka amwesha’mba uji na lwitabilo lwakosa.—Hebe. 11:1.

Bimye po Mwafwainwa Kwamba na Kusumininwa. Kyanema bingi kwamba na kusumininwa kimye kyo muji mu mwingilo wa mu bujimi. Javula bantu bamona ñambilo yo mubena kwambilamo byonkatu byo bamona bintu byo mubena kwamba. Bamona byo mubena kwiumvwa pa bintu byo mubena kwambapo. Kusumininwa kwakila ne byambo byo mubena kwamba mambo kwakonsha kumwesha’mba muji na bintu byanema byo mukeba kubulako bantu.

Kabiji pa kwamba ku bakwetu ba mu lwitabilo napo twafwainwa kwamba saka twasumininwa. Mutumwa Petelo wanembele nkalata yanji itanshi na lutangijilo lwa mupashi amba, ‘ebafunde ne kwibabujisha amba, buno bo bupe bwa Lesa bwa kine.’ Na mambo a kino, wakoseshe balongo amba: “Imanyishaitu monka.” (1 Pe. 5:12) Pa kunembela kipwilo kya mu Loma, mutumwa Paulo wanembele byambo byamwesheshenga’mba wasumininwe, kabiji kino kyakwashishe bingi kipwilo. Wanembele’mba: “Amiwa nayukishatu” nangwa’mba nasumininwa “namba, nangwa lufu, nangwa bumi, nangwa bamalaika, nangwa bene bakatampe, nangwa bintu bya katataka, nangwa bintu bikeyako, nangwa bya bulume, nangwa bula bwa mwiulu, nangwa bula bwa panshi, nangwa kilengwa kingi, nangwa kya byepi, nangwa kya byepi, kechi bikakonsha kwitwabanya na butemwe bwa Lesa mwi Kilishitu Yesu Nkambo yetu ne.” (Loma 8:38, 39) Paulo wanembele ne pa mambo a buneme bwa kusapwila bantu, kabiji kizaku kyo ajinga nakyo mu uno mwingilo kyamwesheshe kuba’mba washiinwe’mba uno mwingilo wanema. (Byu. 20:18-21; Loma 10:9, 13-15) Ne lelo jino, bakulumpe mu kipwilo nabo bafwainwa kwambanga na kusumininwa mu byo bafunjisha kufuma mu Mambo a Lesa.

Kimye kya lufunjisho ne pa bimyetu bikwabo, bansemi bafwainwa kwambanga na kusumininwa pa kwisamba na baana babo bintu bya ku mupashi. Kino kikebewa bansemi kwikala na butemwe mu michima yabo bwa kutemwa Lesa ne mashinda anji. Umvwe bauba kino, bakambanga na baana babo saka basumininwa, ‘mambo kanwa kamba byonka byayula mu muchima.’ (Luka 6:45; Mpitu. 6:5-7) Kabiji umvwe bansemi kebambe saka basumininwa byonkabye, kikebalengela kwikala bakumwenako bawama ‘balwitabilo lwa kine.’—2 Timo. 1:5.

Kyanema bingi kwamba na kusumininwa kikatakata umvwe lwitabilo lwenu luji mu lweseko. Mukwenu mo mufunjila sukulu, mufunjishi nangwa mukwenu mo mwingijila nkito wakonsha kukumya bingi pa kumona’mba kechi mubena kusekelelako kintu kyo babena kusekelela bakwenu ne. Kwambañana nanji bulongo kwakonsha kumukwasha kunemeka bintu bya mu Baibolo byo mwaitabilamo. Pano mwakonsha kuba byepi umvwe muntu keemujimbaike kuba bintu byatama nabiji kubula bukishinka, kwingijisha bizhima nangwa kuba bulalelale? Kyanema kumwambila kipasu amba, mwakanatu nsalansala kuba byobyo byubilo byatama kabiji ne kuba’mba kafwako kintu nangwa kimo kyo asakwamba kisakwalula milanguluko yenu ne. Kino kikebewa kwamba na kusumininwa umvwe mubena kukana kyokyo kintu kyo emwambila’mba mube. Pa kukana muka Potifwalo wamukebelenga, Yosefwa waambile kipasu amba: “Nanchi buno bubi bukatampe nebube byepi, ne kumulenga mambo aye Lesa?” Byo akoseleko na kumukanjikizha, Yosefwa wanyemenemo mu nzubo.—Nte. 39:9, 12.

Kusumininwa byo Kumweka. Byambo byo mubena kwamba byo bilengela bantu kumona byo mwasumininwa. Pa kwamba byambo byanema, Yesu javula watendekanga na byambo bya kuba’mba: “Kine, kine, nemwambila namba.” (Yoa. 3:3, 5, 11; 5:19, 24, 25) Paulo waambanga na kusumininwa byo aambanga bipelu nabiji bya kuba’mba: “Amiwa nayukishatu namba,” “Amiwa nayuka, kabiji nayukishatu mwi Nkambo Yesu, namba” ne “Naamba bya kine, kechi nabepa ne.” (Loma 8:38; 14:14; 1 Timo. 2:7) Pa mambo a kufika kwa mambo anji, Yehoba pa bimye bimo watangijilanga bangauzhi banji na mupashi kwamba kipasu nabiji kuba’mba, “Kine bikamweka.” (Ha. 2:3) Umvwe kemwambe pa buno bungauzhi, mwakonsha kwingijisha ñambilo intutu imo. Inge mwaketekela mwi Yehoba mu kifulo kya kwiketekela anwe bene kabiji inge kemwisambetu bulongo na bakwenu, byambo byenu byo mukambanga na kusumininwa bikamweshanga’mba muji na lwitabilo lwakosa.

Kusumininwa kwakonsha ne kumwekela mu ñambilo ya bukishinka ya byambo byenu. Mwekelo ya kilungi ne ñingijishisho ya binungwa bya mubiji bimwesha byo mwasumininwa nangwa kya kuba bino bintu byapusana monka mwapusena bantu. Nangwatu kya kuba muji na bumvu nangwa mwamba bitende bitende, umvwe mwasumininwa’mba bintu byo mubena kwamba bya kine kabiji ne kuba’mba bantu bafwainwa kwibyumvwa, kechi mukalubwa’mba mwasumininwa ne.

Bino kusumininwa konse kwafwainwa kwikala kwa kine. Umvwe bantu bamona’mba tubena kwambatu bukifulumuya, kikebalengela kumona’mba kafwako ne kyo tubena kwamba ne, tubena kupapalatu. Onkao mambo, ambaingatu byonka byo mwamba. Umvwe kemwambe ku bantu bavula, mwakonsha kusuntulangako jiwi kabiji ne kwamba na bulume. Pano bino, nkebelo yenu yafwainwa kwikala ya kwamba kufuma mu muchima ne kwambatu byonka byo mwamba kimye kyonse.

Bintu Byakonsha Kwimukwasha Kwamba na Kusumininwa. Byo kiji kuba’mba kusumininwa kwavwangamo byo mubena kwiumvwa pa bintu byo mubena kwambapo, kyanema bingi kunengezha bulongo. Kukopololatu byambo bya kukopolola mu buku ne kwibishimununa kechi kukwasha ne. Mwafwainwa kwibyumvwisha bulongo ne kukonsha kwibyamba mu byambo byenu. Mwafwainwa kushiinwa’mba abyo byambo bya kine kabiji ne kuba’mba bintu byo mubena kwamba byanema ku bantu bo mukambangako. Kino kibena kulumbulula’mba pa kunengezha jashi jenu, mwafwainwa kulanguluka pa bantu bo mukambangako byo baji kabiji ne bintu byo bayukila jimo pa yewo mutwe nangwa byo bakakonsha kwiumvwa pa yewo mutwe.

Kyapela bingi bantu kuyuka’mba twasumininwa umvwe ketwambe kwa kubula kumamata. Onkao mambo, kununga pa kunengezha bulongo jashi jenu, yukai ne bya kwijamba. Yukai bipungu byajo bikakebewa kwamba na bulume kuba’mba mukebyambengatu kwa kubula kutajisha pa byambo biji pa pepala. Kabiji vulukai kulomba kwi Yehoba kuba’mba emukwashe. Umvwe mwauba bino, ‘mukachinchika mwi Lesa wetu’ ne kwamba na kusumininwa byambo byenu bya kine kabiji byanema.—1 Tesa. 2:2.