LUFUNJISHO 15

Kwamba na Kushiinwa

1 Tesalonika 1:5

BYO MWAFWAINWA KUBA: Mweshai’mba mwashiinwa kuba’mba byo mubena kwamba bya kine kabiji byanema bingi.

Nengezhai bulongo. Pitulukaimo bulongo mu jashi jo bemupa pa kuba’mba mumvwishe bishinka bijimo ne byo byakwatankana na byaamba Baibolo. Mwafwainwa kwamba bishinka mu byambo bicheche byapeela kumvwa. Tai muchima pa bishinka bisakukwasha bantu. Lombai kwi Lesa kuba’mba emupe mupashi wazhila.

Pitulukaimo mu jashi jenu na jiwi ja peulu pa kuba’mba mukwatakanye bulongo bishinka byonse ne kuwamishako mumo, kino kikemukwasha kwamba bulongo.
Ingijishai byambo bimwesha’mba mwashiinwa mu byo mubena kwamba. Kechi mwafwainwa kwambatu byambo byonka byo bebinemba pa pepala ne, bino mwafwainwa kwibyamba mu byambo byenu. Mu ñambilo yenu, mweshainga’mba mwashiinwa mu byo mubena kwamba.
Ambainga saka mwakasuluka. Ambainga na jiwi ja peulu. Kimye kyo mubena kwamba jashi, mwafwainwa kutalanga bantu mu luonde.

Kwamba na kushiinwa kechi kulumbulula’mba mwafwainwa kukajipila bantu, kumina pa kintu kimo nangwa kukanjikizha bantu kuswa byo mubena kwamba ne. Nangwa kya kuba mubena kwamba saka mwakasuluka, bino mwafwainwa kwamba mu jishinda ja kutundaika.