Kusaabaula Bulongo Kishina

BAÑAMBI bamba bulongo majashi, bayuka buneme bwa kwikala na kishina. Umvwe babena kunengezha jashi, kishina kibakwasha kutesha muchima ku byambo bibena kukebewa ne kwibilangulukishapo bulongo. Kifumamo ke kya kuba’mba, mu kifulo kya kuba kebambetu bishinka kyambe ambe, basaabaula jashi bulongo kuba’mba jikwashe bantu bo babena kwambako. Inge bishinka bikatampe byonse kemwibikwatankanye ku kishina kabiji ne akyo kine kishina ke mwikisaabaule bulongo, mukakwasha bantu bo mubena kwambako kubula kwibilubamo kabiji ne kuyuka buneme bwabyo.

Nangwa kya kuba kyakonsha kwambiwa’mba kishina ye mutwe ye mubena kwambapo, majashi enu mukeambanga bulongo umvwe kemumone’mba kishina ke mulanguluko mwine ye mubena kusaabawilamo yewo mutwe. Bufumu, Baibolo ne lusanguko ke mitwetu muji bintu byavula. Ku ino mitwe mwakonsha kufumyako bishina byapusana pusana. Akimonai bino bya kumwenako: “Bufumu, Kafulumende wa Kine,” “Bufumu bwa Lesa Bukalula ino Ntanda ke Paladisa,” “Baibolo Bamunembele na Lutangijilo lwa Mupashi wa Lesa,” “Baibolo mo Muji Mafunde Etutangijila mu Ano Moba,” “Lusanguko Lupana Luketekelo ku Bafwisha Mutemwe Wabo,” ne “Luketekelo lwa Lusanguko Lwitukwasha Kwikala Bakosa Umvwe Kebetumanyike.” Bino bishina byonse bikebewa kwibisaabawila mu mashinda apusana pusana.

Busapwishi bo asapwilanga Yesu Kilishitu mu mwingilo wanji panopantanda bwaambanga pa kishina kya kuba’mba: “Bufumu bwa mwiulu bwafwenya ke pepi” kwesakana na kine kishina kya mu Baibolo. (Mat. 4:17) Nga kino kishina wikisaabawilenga byepi? Mu mabuku onse ana a Mambo awama, Bufumu bebwambapo javula bingi kukila pa bimye 110. Pano bino, Yesu kechi wapelejiletu mu kubwezhapotu kyambo kya “bufumu” ne. Kupichila mu bintu byo afunjishenga ne bya kukumya byo aubanga, Yesu wimwesheshe patoka’mba wajinga Mwana Lesa, aye Mesiasa, Yehoba ye akapa Bufumu. Kabiji Yesu wamwesheshe’mba kupichila mwi aye, jishinda jashinkukijile bantu bakwabo ba kulama nanji mu Bufumu. Waambile pa byubilo byo bafwainwa kumwesha aba bo bapa jino jishuko. Kupichila mu mafunjisho anji ne mingilo yanji ya kukumya yo aubanga, wamwesheshe patoka Bufumu bwa Lesa byo bukobila bantu mu bwikalo bwabo. Kabiji wamwesheshe ne kuba’mba byo apangilenga bandemona na mupashi wa Lesa, kyajinga kiyukilo kya kuba’mba ‘bufumu bwa Lesa bwibeshijile kala’ banteleki banji. (Luka 11:20) Buno bo Bufumu Yesu bo akambizhe baana banji ba bwanga kuya na kusapwila.—Mat. 10:7; 24:14.

Kwingijisha Kishina Kyafwainwa. Kechi bemubula’mba musaabaule kishina byonka byo bekisaabaula mu Baibolo ne, pano bino kwikala na kishina kwanema bingi.

Umvwe mukesajila anwe bene kishina kya jashi jenu, patanshi akiyukai nkebelo yajo. Apa bino, pa kusala bishinka bikatampe bikekala mu jashi, monai kuba’mba bino bishinka bibena kukosesha kya kine kishina kyo mwasala.

Umvwe bemupa kishina, kisaabaula bulongo kuba’mba muyuke jishinda mo mukasaabawila jashi jenu. Mwafwainwa kwibikako pa kubatu’mba muyuke buneme bwa kyokyo kishina kabiji ne byo kyakonsha kukwasha bantu. Umvwe mukasala byambo bya kwingijisha kusaabawilamo kishina kyo bemupa, bisalai bulongo kuba’mba kishina kikomvwanyike pa kwikilumbulula. Bino umvwe bine byambo byo mukambangapo nabyo bemupa, napo mwafwainwa kupitamo ne kumona byo mwakonsha kwibyamba kuba’mba bikwatankane na kishina. Kabiji mwafwainwa ne kuyuka ene mambo abyo byambo o byanemena ku bantu bo mukambangako kabiji ne kine kintu kyo mukebyambilanga. Kino kikemukwasha kuyuka bintu byo mwafwainwa kukosesha mu jashi jenu.

Bya Kukosesha Kishina. Pa kuba’mba kishina mwikikoseshe bulongo, mwafwainwa kuyuka bine bishinka byo mwasala ne kunengezha byambo bya jashi jenu. Umvwe mwaingijishatu bishinka byonka bibena kukosesha kishina kabiji ne kulondela mafunde a bya kunengezha bulongo bishinka byo mukamba, kikemupelela kukosesha kishina.

Kubwezhapo kwakonsha kwimukwasha kukosesha kishina. Twayai tumone kya kumwenako kya lwimbo wa butemwe. Mu uno lwimbo yense, nyimbi utongola kine kishina, ko kuba’mba butemwe bo aji nabo pa muntu ye akomoka. Wakonsha kwikibwezhapo javula bingi kino kishina mu mashinda apusana pusana. Wakonsha kutongola kyambo kya “butemwe” mu mashinda avula. Wakonsha ne kwingijisha byambo bipashako, byaesakanako, ñambilo ya nsansawilo nangwatu bishimpi. Ne mutwe wa jashi naye byo byo afwainwa kwikala. Byonka mulanguluko wa butemwe byo bamubwezhapo javula mu lwimbo yense, ne anweba pa kwamba jashi mwakonsha kubwezhangapo byambo muji bishinka bya kyokyo kishina. Pa kuba’mba mwibyambile mu jishinda jikwabo, mwakonsha kwingijisha byambo bikwabo bipashako na byobyo byambo muji bishinka nangwa kwambilatu kine kishina mu jishinda jikwabo. Umvwe kemwambe bibye, mukalengela kishina kwikala mwine mulanguluko mukatampe ye bakasendapo bantu bo mubena kwambako.

Ano mafunde kechi engilatu ku majashi onka o bamba pa mutuntamo ne, engila ne ku misambo ya mu mwingilo wa mu bujimi. Umvwe muntu ye mubena kwisamba nanji waumvwisha bulongo kishina, kechi ukekilubamo ne. Mikambizho yo afunda pa lufunjisho lwa Baibolo wakonsha kwiilama umvwe kishina mwikikosesha bulongo. Umvwe kemusale ne kusaabaula bulongo bishina bibena kukebewa, kikemukwasha bingi kwikala ñambi wayuka kwamba kabiji ne kwikala mufunjishi wayuka kufunjisha Mambo a Lesa.