Lamawizhanga Maana Obe

1. Ñanyi kishina kya kubuñana kwa mwanzo kwa mwaka wa mwingilo wa 2013, kabiji mambo ka o banengezhezha kuno kubuñana?

¹ Yesu wabujile baana banji ba bwanga kutemwa Yehoba na muchima wabo yense, na mweo wabo yense, ne na maana abo onse. (Mat. 22:37, 38) Kushonkena ne kubuñana kwa uno mwaka bekunengezha kwitukwasha kuwamisha bu muntu bwetu bwa mukachi. Umvwe mwamona kushonkena kwa uno mwaka kuji na kishina kya kuba’mba “Lama Muchima Wobe!” Kubuñana kwa Juba Jimo kwa mwaka wa mwingilo wa 2013, kuji na kishina kya kuba’mba “Lamawizhanga Jiwi Jobe ja mu Muchima.” Kabiji ne kubuñana kwa mwanzo kukatendeka ñondo ubena kwiya kuji na kishina kya kuba’mba “Lamawizhanga Maana Obe,” kyafuma pa Mateo 22:37. Uno mutanchi bamunengezha kwitukwasha kulamawizha milanguluko yetu ne kubanga bintu bitokesha Yehoba ku muchima.

2. Kimye kya kubuñana, twafwainwa kukeba mikumbu ya ñanyi mepuzho?

² Bintu byo Tukafunda: Kimye kya kubuñana, twafwainwa kunemba mikumbu ya ano mepuzho. Byo bishinka bikatampe:

• Twakonsha kuchinuzhuka byepi kulangulukanga byonka bantu byo balanguluka?

• Twakonsha kufumya byepi kisapi kifita pa meso a bantu babula kwitabila?

• Muchima wa mutundu ka ye mukeba kwikala nanji?

• Bintu ka byawama bifuma mu kulanguluka languluka pa bintu byanema?

• Mwakonsha kuleka byepi Yehoba kutangijilanga milanguluko yenu?

• Balume, bakazhi, bansemi ne bana bakonsha kulengela byepi mu kisemi kwikala balusekelo?

• Twakonsha kwinengezha byepi ku juba ja Yehoba?

• Kyalumbulula ka kunengezha milanguluko ku mwingilo wakosa?

• Mapesho ka ekala na boba balondela byo bafunda?

3. Mambo ka o kyanemena kutanwako moba onse abiji, kutelekesha ne kwingijisha byambo byotukafunda?

³ Satana ubena kwibikishako kukeba konauna milanguluko yetu. (2 Ko. 11:3) Onkao mambo, twafwainwa kulamawizha maana ne milanguluko yetu. Twafwainwa kwibikishako kwikala na muchima wa Kilishitu ne kukana kongolwa na bantu babula kulondela bikeba Lesa. (1 Ko. 2:16) Inengezhai kuba’mba mukatanweko moba onse abiji a kuno kubuñana kwa mwanzo. Mukatelekeshenga. Kwingijisha byambo byotukafunda kuketukwasha kwikala babambakana mu mwingilo wa Bufumu.—1 Pe. 1:13.