Kubuñana kwa Mwanzo kwa Kwitukwasha Kulamawizha Bumupashi Bwetu
1. Lunengezho ka Yehoba lo etupa lwa kwitukwasha kufikizha mwingilo wetu wa kusampanya mambo awama?
1 Yehoba witunengezhezha kajo ka ku mupashi, kwitufunjisha ne kwitutundaika kuba’mba twingile mwingilo ye etupa wa kusampanya mambo awama. (Mat. 24:14; 2 Timo. 4:17) Kubuñana kwetu kwa mwanzo ko twikala nako pa mwaka pa mwaka ke jishinda jimo jo tutambwilamo bino bintu. Mutanchi wa katataka wa mu mwaka wa mwingilo wa 2010 ukekala na kishina kya kuba’mba, “Lamawizhai Bumupashi Bwenu” kufuma mu Loma 8:5 ne Yuda 17-19. Uno mutanchi bamunengezha kutendeka mu mulungu wa August 31, 2009.
2. (a) Mu ñanyi mashinda kubuñana kwa mwanzo mo kuketulengela kumwenamo? (b) Nga kubuñana kwa mwanzo kwa kunyuma kwimukwashishe byepi mu mwingilo?
2 Byo Tukamwenamo: Uno mutanchi uketuvululako pa bizumba nabiji bintu bilabikañana byakonsha kwitonawina kimye kyetu ne kwitulengela kubula kuta muchima ku bintu byanemesha. Tukafunda bya kubula kwikala na muchima wa kuswisha bintu byatama kabiji tukafunda pa byo kilumbulula kwikala muntu wakosa ku mupashi. Jashi ja kushilañana jikekalako pa Mulungu jikamwesha bantu pa muntu pa muntu ne bisemi byo bakonsha kukosesha bumupashi bwabo pa kutalañana na makatazho ne meseko akatampe. Mutanchi uketukwasha kulamawizha michima yetu, kukosesha bumupashi bwetu ne kuvulukanga mapesho akatampe abena kupembelela boba balamawizha bumupashi bwabo.
3. Juba ka jo mukekala na kubuñana kwa mwanzo, kabiji mwafwainwa kunengezha kukoba byepi?
3 Aku muyukatu juba ne mpunzha kukekela kubuñana kwa mwanzo kubena kwiya, inengezhai kuba’mba mukatanwako kabiji ne kutelekesha ku bipungu pa moba onse abiji. Yukai’mba, Yehoba upesha mingilo ya muntu uba bintu bulongo.—Mana. 21:5.
4. Bintu ka byo twaketekela kutambwila pa kubuñana kwetu kwa mwanzo kubena kwiya?
4 Kya kine kuba’mba, Yehoba ye wanengezha kino kya bupe kyawama. Mutanchi wanengezha jibumba ja kalume wakishinka uketukwasha bingi kutwajijila na mwingilo wetu wa bwina Kilishitu. Tumusanchila bingi Yehoba pa mambo a bintu byanji bya butemwe byo etupa kwitukwasha ‘kukwachisha ku kwisolola kwa luketekelo lwetu ne kutelengela ne.’—Hebe. 10:23-25; Yako. 1:17.