Lunengezho lwa ba Mwingilo wa Bwina Kilishitu

1. Ñanyi lunengezho lwa katataka lwatendekele mu 1938, kabiji na ñanyi nkebelo?

¹ Mu 1938 jibumba ja Yehoba jatendekele lunengezho lwa katataka. Bipwilo byavula bebichile kuya na kutanwako ku kubuñana kwa mwanzo, ko batelanga’mba zone assembly. Na ñanyi nkebelo? Mwingilo wa Bufumu wa January 1939 watelwanga’mba Informant wakumbwile’mba: “Kuno kubuñana ke Lunengezho lwa Jibumba ja Yehoba lwa kutangijilamo mwingilo wa Bufumu. Byambo byo banengezha byanema bingi kwi atweba bonse pa kuba’mba twingile bulongo mwingilo ye betupa.” Kibelengelo kya basapwishi kyayilako palutwe, mambo kufuma mu 1938 bajinga 58,000, kufika mu 2009 bakijile pa 7,000,000, kino kibena kumwesha patoka kuba’mba kubuñana kwa mwanzo kubena kukwasha bamwingilo kwingila bulongo “mwingilo ye bebapa”!

2. Majashi ka akambiwa pa kubuñana kwa mwanzo kwa mwaka wiya?

² Kishina kya Kubuñana kwa Mwanzo kwa Mwaka Wiya: Kubuñana kwa mwanzo kwa mwaka wiya kukatendeka mu September kuketutundaika bingi. Kishina kya kuno kubuñana ke kya kuba’mba, ‘Kechi mwi ba Panopantanda Ne.’ Kyafuma pa kinembelo kya Yoano 15:19. Ñanyi majashi amo akakwasha ba mwingilo wa bwina Kilishitu? Pa Kibelushi tukateleka ku jashi ja kuba’mba, “Mwingilo wa Kimye Kyonse Wituzhikijila—Mu Ñanyi Jishinda?” Kabiji kukekala ne jashi ja kushilañana jiji na mbaji isatu, ja kuba’mba, “Kange Mumvwañanenga na. . .” “Lukinyama,” “Pite Mukatampe,” ne “Bapoteshi ba Panopantanda” Ne. Pa mulungu tukateleka ku jashi ja kushilañana jiji na kishina kya kuba’mba, “Temwai Yehoba, Kechi bya Panopantanda Ne.” Tukateleka ne ku majashi akwabo nabiji a kuba’mba, “Twajijilai Kwikala ‘Benyi ne Bañenda,’” ne ja kuba’mba, “Kosai! Mushinde bya Panopantanda.”

3. Tumwenamo ka mu kubuñana kwa mwanzo?

³ Panyuma ya kupwisha kubuñana kwa mwanzo, nyenga umo wabulanga kwingila kimye kyabaya mu mwingilo wanembele’mba kubuñana kwa mwanzo kwamulengejile kulangulukapo bulongo pa bwikalo bwanji, “kuleka kwikangaizha ne kutendeka kwingilako pakatampe mu mwingilo.” Kubuñana kwa mwanzo kwa mwaka ubena kwiya kuketukwasha kutemwa Yehoba, kechi bya panopantanda ne. (1 Yoa. 2:15-17) Mukashinkweko ne kutelekesha pa kuba’mba mukamwenemo mu luno lunengezho lwa ba mwingilo wa bwina Kilishitu!