Kupwila kwa Kijiji Kupya

Twayuka kuba’mba Yehoba Lesa ye wafwainwa butemwe bwetu ne kwipana kwetu. Nangwa byonkabyo, ino ntanda ikeba kwitongola’mba tuleke kusungijila bulunda bwetu na Lesa. (Yoa. 17:14) Pa kuba’mba tukoseshe butemwe bwetu pe Yehoba ne kukosa mu kushinda bya pano pa ntanda byonauna bumupashi bwetu, kupwila kwa kijiji kwa mwaka wa mwingilo wa 2001 kukekala na mutwe wa kuba’mba “Temwai Lesa—Kange Mutemwe bya Pano pa Ntanda Ne.”—1 Yoa.2:15-17.

Kutemwisha Yehoba kwitutundaika kusapwila pe aye. Nangwa kikale byonkabyo, bantu ba kwa Lesa bavula kechi kibapelela kwingila mwingilo wa mu bujimi ne. Mu kibaba kiji na mutwe wa kuba’mba “Kutemwa Lesa ko Kwitutundaika mu Butumwa Bwetu,” kiketufunjisha kumona bavula byo bashinda bumvu ne makatazho akwabo pa kuba’mba bengile uno mwingilo na muchima yense.

Nanchi bwikalo bwa pano pa ntanda bubena kuya nakutaminako bwitulamata byepi? Byubilo byamwekanga kala kutama luno byo byo babena kwamba’mba byawama. Jashi jiji na mutwe wa kuba’mba “Batemwa Yehoba Bashikwa Kyatama” ne jashi ja kushilañana jiji na mutwe wa kuba’mba “Bya Pano pa Ntanda—Nanchi Twibimona Byepi?” jikakosesha bukose bwetu bwa kukana kuba byatama.

Kupwila kwa Sukulu ya Teokalatiki ne kwa Mwingilo nako kukekala konka, pamo ne ngipipishilo ya jisambijilo ja Ulupungu lwa kwa Kalinda ja yewo mulungu. Jashi ja mvula-bantu jiji na mutwe wa kuba’mba, “Butemwe ne Lwitabilo byo Byakonsha Kushinda Ntanda ,” jiketukosesha kulondela Yesu mu kushinda makatazho a pano pa ntanda. (Yoa. 16:33) Monai kuba’mba mwaita basambi benu ba Baibolo kwiya na kutanwako. Bonse bakeba ku batizwa bafwainwa kubula mukulumpe wa kutangijila bukiji-bukiji kuba’mba lunengezho lwafwainwa lunengezhiwe.

Kuno kupwila kwa kijiji kukamba pa kukeba kumona butemwe bwetu po bwafwainwa kushinkamana pa kuba’mba twiyowe mapesho a kwa Yehoba avula. Kange mukapuswe kuno kupwila ne!