Kupwila Kwakijiiji Kubena Kwiya
1 Pakuba’mba twimane bakosa mulwitabilo muino ntanda yaluwankana, twafwainwa kuketekela mwi Yehoba. Twakonsha kumwesha byepi luketekelo mubwikalo bwetu pajuba pajuba? Kuketekela mwi Yehoba kwitulamata byepi pamo nekisemi kyetu? Kwitukwasha byepi kushinda ino ntanda yakwa Satana? Kupwila kwakijiiji kwamu mwaka wamwingilo wa 2003 kwakumbula ano mepuzho. Mutwe wakuno kupwila waamba’mba “Ketekelai mwi Yehoba, ne Kuba Byawama.”— Sala. 37:3.
2 Luketekelo lwetu mwi Yehoba kechi lumwekelatu pabimye biikajila nangwa kanatu pabena kukebewa bukwasho bwabukiji-bukijine. Mwavwangwa bwikalo bwetu bonse bwajuba nejuba. Kino kishinka kyakonkomwenwapo mujashi jitanshi jaamba’mba “Ketekelai mwi Yehoba Moba Onse.” (Sala. 62:8) Jashi jakushilañana jambaji ina, jaamba’mba “Mweshainga Luketekelo Lwenu mwi Yehoba” jiketumwesha kumona byotwakonsha kutana nekwingijisha byambo byamu Baibolo byakonsha kwitukwasha kukosesha masongola etu bulongo, kupwisha makatazho eya mukisemi, nebyotwakonsha kutondwa nabintu byakumubiji.
3 Ntanda yakwa Satana ikeba kwitulubankanya amba tubule kuyuka byawama nebyatama, kabiji ituvulañanya kuba’mba tukankalwe kuyuka bintu byanema nebyabula kunema. (Isa. 5:20) Majashi aji namutwe wakuba’mba “Jimukai Nabintu Byatu Mubwikalo Bwenu” nejikwabo jaamba’mba “Kanai Byatama—Ikalai Bakuba Byawama” aketutundaika kukosela kumizhilo yaoloka ya Yehoba.—Amo. 5:14.
4 Bakalume ba Yehoba bafwainwa kumuketekela namuchima yense byoakafumyapo byubilo byatama byabuno bwikalo. Kino kyaambiwapo mujashi jamvula-bantu, jiji namutwe wakuba’mba, “Kupokololwa Kumalwa Aino Ntanda Kuji Pepi.” Panyuma yajino jashi, pakalondela jashi jikambanga pabyotwafwainwa kwiketa atwe bene, jiji namutwe waamba’mba “Nanchi mwi Bantu Bafwainwa Kwikala Mubufumu bwa Lesa Nyi?” Kupwila kukapwa najashi jalutundaiko jaamba’mba “Ketekelai Mumilaye ya Yehoba.”
5 Kintu kikebula bantu pakupwila konse kejashi jalubatizhilo. Bonse bakeba kubatizwa bafwainwa kumonañana bukiji-bukiji namukulumpe utangijila mukipwilo kyabo kuba’mba lunengezho lubiwe.
6 Muano moba akatazha, Yehoba yensulo yonkatu yaluketekelo nengovu. (Sala. 118:8, 9) Twayai atweba bonse tuketekele mwi aye kupichila mukutanwa kumajashi onse akupwila kwakijiiji.