Yehoba Ukwasha Boba Bamuketekela
1 Bantu bavula bamona mali, bulume, ne ngovu yabo ya kwingila mingilo nobe bintu byanema byakonsha kwibakwasha kwikala bulongo. (Sala. 12:4; 33:16, 17; 49:6) Nangwa byonkabyo, aba bamwakamwa Yehoba ne kuketekela mwi aye baji na mulaye wa mu Baibolo wakuba’mba “aye ye nkwasho wabo, jo jikebo jabo.” (Sala. 115:11) Twayai twisambe pa mashinda abiji mo twakonsha kumweshesha’mba twaketekela mwi Yehoba.
2 Bena Kilishitu ba Mwingilo: Kimye kyonse kyo tubena kufunjisha mu kipwilo nangwa mu mwingilo wa mu bujimi, twafwainwa kuketekela mwi Lesa wetu. Monai kya kumwenako kya kwa Yesu. Nangwa kya kuba wajinga Mwana Lesa, kechi waketekejile mu maana nangwa mu bulume bwanji mwine ne, waketekejile mwi Shanji wa mwiulu. (Yoa. 12:49; 14:10) Ne atweba twafwainwa kuketekela mwi Shetu wa mwiulu! (Mana. 3:5-7) Mu bulume bwa Yehoba mo monkatu motwakonsha kumutumbijikila ne kukwasha bantu.—Sala. 127:1, 2.
3 Tumwesha luketekelo lwetu mwi Yehoba kupichila mu kulomba kwi aye kuba’mba etutangijile ne kwitukwasha na mupashi wanji wazhila. (Sala. 105:4; Luka 11:13) Kabiji tumwesha luketekelo lwetu mwi Lesa kupichila mu kufunjisha bintu biji mu Byambo byanji, Baibolo. Byambo bijimo biji na bulume bwa kufika pa michima ya bantu ne kupimpula bwikalo bwabo. (Hebe. 4:12) Umvwe ‘twaingila kyafwainwa bulume bo apana Lesa,’ Aye utumbijikwa.—1 Pe. 4:11.
4 Kuyuka bya Kuba na Makatazho: Kabiji twafwainwa kuketekela mwi Yehoba kwitukwasha byo tupita mu makatazho. (Sala. 46:1) Kya kumwenako, mukulumpe wetu wa nkito wakonsha kukana kwitupa moba a kukokoloka kuba’mba tukatanwe ku kupwila kukatampe, nangwa kampe twakonsha kupita mu makatazho a mu bwikalo bwetu. Tumwesha luketekelo lwetu mwi Yehoba kupichila mu kulomba na mukoyo kwi aye ne kwingijisha lutangijilo loapana kupichila mu Byambo ne jibumba janji. (Sala. 62:8; 119:143, 173) Kupichila mu kulomba kwi Yehoba ne kwingijisha lutangijilo loapana, Yehoba wibakwasha bakalume banji mu bwikalo bwabo.—Sala. 37:5; 118:13, 16.
5 Yehoba aye mwine witulaya’mba: “Watokwa awa waketekela mwi Yehoba, ne luketekelo lwanji luji mwi Yehoba yenka.” (Yele. 17:7) Twayai tumweshenga’mba twaketekela mwi aye mu byonse byo tuba!—Sala. 146:5.