Kupwila kwa Kijiiji Kubena Kwiya

Moyo ulumbulula kwikala na “mushingi mukatampe kikatakata wa kushingika Lesa.” Uno ye moyo wawama watongolwa mu Binembelo amba ‘yo ntendekelo ya maana.’ (Sala. 111:10) Bino, kuji ne moyo mukwabo wa ino ntanda ya kwa Satana. Nanchi twakonsha kumuchinuzhuka byepi uno moyo ne kwikala na moyo mukatampe wa kwakamwa Yehoba? Jino jipuzho jikakumbulwa pa kupwila kwa kijiiji kwa mu 2002 kubena kwiya. Mutwe wa kuno kupwila ke “Akamwai Lesa, Mumupe Lukumo.” (Lum. 14:7) Tukomvwa mashinda apusana-pusana kwakamwa Yehoba byo kwitukwasha pa muntu pa muntu ne jibumba.

Nangwa kya kuba moyo uleta kukakilwa umvwe muntu uji mu lukatazho, Baibolo yamba’mba: “Bo bene ba lusekelo bonse baakamwa Yehoba.” (Sala. 128:1) Majashi a pa kupwila kwa kijiiji aketukwasha byo twakonsha kuchinchika ku makatazho o twikala nao byo tuji mu bupopweshi bwakine. Tukomvwa byo twakonsha kukwasha bakatataka kwikala na moyo wawama wa kwakamwa Lesa, akyo kikebalengela kukeba kumwingijila na muchima wabo yense, na mweo wabo yense, na maana abo onse, ne na bulume bwabo bonse. (Mako 12:30) Jashi jikapelako pa juba jitanshi jiji na mutwe wa kuba’mba “Pwañanainga na Bomwatemwa,” jikambiwa na mukulumpe wa nkambi. Ukamba byo twakonsha kujimuka ku meseko a kwa Diabola a kwitufumya kwi Yehoba, ku kisemi kyetu ne ku balongo betu bena Kilishitu.

Jashi ja kushilañana ja mbaji ina jikekalako pa juba ja bubiji jikekala na mutwe wa kuba’mba “Akamwai Yehoba, Kechi Bantu Ne.” Jikalumbulula ene mambo ne byo twafwainwa kushinda moyo witulengela kubula kwingila bulongo mwingilo wetu nangwa kukankalwa kulama bulumbuluke ne jiwi ja muchima jatoka to ku sukulu ne ku nkito. Jashi ja mvula-bantu ja kuba’mba “Akamwai Lesa ne Kulama Mikambizho Yanji” jikalumbulula ndonda ya bintu byanembwa mu Lumwekesho kyapitala 14. Jashi jikapelako pa kupwila kwa kijiiji jiji bingi na byambo bya kwitukosesha, jikekala na mutwe wa kuba’mba “Twajijilai Kwenda na Moyo Wakwakamwa Yehoba.”

Sukulu ya Mwingilo wa Teokalasi, Kupwila kwa Mwingilo, jashi ja lubatizhilo ne ngipipishilo ya Kyamba kya Usopa o majashi akwabo akekalako o mwafwainwa kubula kupuswako. Itai bomufunjisha Baibolo kuba’mba mukatainweko pamo. Bonse bakeba kubatizwa bafwainwa kubula mukulumpe utangijila mu kipwilo kyonka kino kimye. Bonse tukeba kumwesha moyo wakwakamwa Yehoba ne kumupa lukumo pa kubula kupuswa ku majashi onse a kuno kupwila kwanema!