Akamwai Yehoba pa Juba pa Juba
1 “Moyo wa [Kwakamwa] Yehoba, yo ntendekelo ya mana.” (Sala. 111:10) Moyo witulengela kuba byawama ne kwitukwasha kufuma ku bubi. (Mana. 16:6) Kwikala na uno moyo kuleta mushingi ku Mulenga wetu ne kwitukwasha kubula kumufichisha pa muchima ne kumusatukila. Ke kintu kimo kyo twakonsha kukomesha ne kumwesha pa juba pa juba.—Mana. 8:13.
2 Pa juba pa juba, mupashi wa ino ntanda muji Satana witudonsa mukokomena kukeba kuba’mba tulenge mambo ne kwikela mwayila byubilo bibi bya ino ntanda. (Efi. 6:11, 12) Mibiji yetu ya bumbulwakoloka ke mibiji ya bundengamambo, ko kuba’mba nayo itulengela kuponena mu byubilo byabula kufwainwa. (Nga. 5:17) Onkao mambo, pa kuba’mba twikale basangalala ne kumona bumi, twafwainwa kukokela mikambizho ya kwa Yehoba ne kumwakamwa pa juba pa juba.—Mpitu. 10:12, 13.
3 Pa Bahebelu 10:24, 25, twakambizhiwa kupwila pamo, kwikosesha atweba bene na bene, “ne kwibikishakotu” mu ano moba otujimo. Kutanwa ku kupwila kimye kyonse kwanema bingi inge tukeba kupuluka ano moba apelako. Moyo wetu wa kuchina kufichisha Lesa pa muchima ye witulengela kutanwa ku kupwila ne kunemeka nkebelo ya kuno kupwila. Aba baji na moyo wa kwakamwa Lesa baji na mweno ya kuba’mba kwivwanga mu kupwila kwa bwina Kilishitu ke jishuko jazhila.
4 Jishinda jikwabo motumweshesha moyo wa kwakamwa Lesa ke kukokela mukambizho wa kusapwila mambo awama a Bufumu. (Mat. 28:19, 20; Byu. 10:42) Kikonkwanyi kikatampe kya mwingilo wetu wa busapwishi ke kya kukwasha bakwetu kukomesha moyo wa kwakamwa Yehoba ne kukokela kyaswa muchima wanji. Tuba bino, pa kufwakesha jibiji botwisambile nabo, kweseka-eseka kutendeka masambijilo a Baibolo a pa nzubo kepo ne kufunjisha bakwetu mikambizho yonse ya Lesa. Mu kuba bino, motumweshesha moyo wetu wa kwakamwa Yehoba ne byotwatemwa bakwetu.—Mat. 22:37-39.
5 Aba babula kwakamwa Lesa bakankalwa kukomesha munema wa kunemeka bintu bya ku mupashi kabiji bakokela byubilo nangwa mwela wipayañana wa ino ntanda. (Efi. 2:2) Twayai atweba bonse tufukule ‘kumwingijila Lesa mingilo ya kumutokesha pa muchima, na kunemeka Lesa ne kumwakamwa.’ (Hebe. 12:28) Ne mu jino jishinda tukanowa mapesho a boba bakamwa Yehoba pa juba pa juba.