Mambo a Lesa Awamina Kufunjisha Bantu

1. Ñanyi kishina kya kubuñana kwa mwanzo kwa mwaka wa mwingilo wa 2014, kabiji ñanyi bwipuzho bukakumbulwa pa kuno kubuñana?

¹ Yehoba ke “Mufunjishi,” wayukisha kufunjisha mu kulengwa konse. (Isa. 30:20, 21) Pano Yehoba witufunjisha byepi? Witupa buku wakila mabuku onse, ko kuba’mba Mambo anji, Baibolo. Pano twakonsha kumwenamo byepi mu mafunjisho a Lesa pa kuba’mba etukwashe lwa ku mubiji, mu ndangulukilo yetu, ne kukosesha bulunda bwetu ne Lesa? Mukumbu wa buno bwipuzho ukakumbulwa pa kupwila kwa mwanzo kwa mwaka wa mwingilo wa 2014. Kishina kya kupwila kwa mwanzo ke, “Mambo a Lesa Awamina Kufunjisha Bantu,” kyafuma pa kinembelo kya 2 Timoti 3:16.

2. Ñanyi mepuzho akakumbula bishinka bikatampe?

² Ketekelai Bino Bishinka Bikatampe: Bishinka bikatampe biji mu uno mutanchi bikambiwa pa kukumbula ano mepuzho alondelapo:

• Mafunjisho a Lesa etukwasha byepi mu bwikalo? (Isa. 48:17, 18)

• Inge twafuukulapo kupimpula bwikalo bwetu na mambo a kukeba kwingijila Yehoba mu mwingilo wa kimye kyonse, ñanyi bintu byo tukaketekela? (Mala. 3:10)

• Twafwainwa kuba byepi inge twaumvwa “mafunjisho angi”? (Hebe. 13:9)

• Twakonsha kulondela byepi Yesu byo ‘afunjishanga’ (Mat. 7:28, 29)

• Mambo ka bafunjishi ba mu kipwilo o bafwainwa kwifunjishisha abo bene? (Loma 2:21)

• Mu ñanyi bintu Mambo a Lesa mo etukwashisha? (2 Timo. 3:16)

• ‘Kutenkenya’ ba mu mikoka yonse kwa kunza byepi bantu (Hagai 2:6, 7)

• Yehoba waketekela amba twafwainwa kuba byepi? (Efi. 5:1)

• Mambo ka o twafwainwa kwibikilako kutwajijila mu mafunjisho a Yehoba? (Luka 13:24)

3. Mambo ka o kyanemena kutanwako ne kuteshako muchima ku kuno kubuñana kwa mwanzo kwanengezhiwa pa kimye kyafwainwa?

³ Paulo saka akyangye kunemba byambo biji mu 2 Timoti kitango 3 mwafuma kishina kya kuno kubuñana kwa mwanzo, walumbulwile pa moba akatazha akeya mu moba akapelako. Wanembele’mba: “Bino bantu babi ne babujimbijimbi bakataminangakotu saka bajimbaika ne kujimbaikwa.” (2 Timo. 3:13) Pa kuba’mba tubule kujimbaikwa, kyanema kumvwa ne kulondela mafunjisho a Lesa. Onkao mambo, twafwainwa kutanwako ne kuteshako muchima ku kuno kubuñana kwanengezhiwa pa kimye kyafwainwa.