Mambo a Lesa aji Bingi na Bulume
1. Ñanyi kishina kya kubuñana kwa juba jimo kwa mu mwaka wa mwingilo wa 2014?
1 Kupusanako na bintu bifuma ku bantu babula kulumbuluka, Baibolo uji na bulume bwa kwitwalula milanguluko pa kuba’mba tubenga bintu mwayila kyaswa muchima wa Yehoba. Nanchi Mambo a Lesa aji na bulume bwa kuba bino nyi? Twakonsha kwingijisha byepi bulume bwa Mambo a Lesa mu bwikalo bwetu? Twakonsha kwiengijisha byepi pa kuba’mba tukwasheko ne bakwetu? Twaketekela kuba’mba bonse bakatanwako, bulunda bwabo ne Lesa bukakoselako pa kwisamba bino bishinka pa kubuñana kwa juba jimo ko banengezha kwa mu mwaka wa mwingilo wa 2014. Kuno kubuñana kuji na kishina kyafuma mu Bahebelu 4:12 kya kuba’mba “Mambo a Lesa aji na Bulume.”
2. Ñanyi mepuzho akakumbulwa o twafwainwa kuteshako muchima?
2 Tanai Mikumbu ku ano Mepuzho: Kimye kyo mukatelekanga ku majashi, nembai mikumbu ya ano mepuzho alondelapo.
• Mambo ka o twafwainwa kuketekela Mambo a Lesa? (Sala. 29:4)
• Twakonsha kumwenamo byepi mu bulume bwa Mambo Lesa mu bwikalo bwetu? (Sala. 34:8)
• Mwakonsha kwingijisha byepi bulume bwa Mambo a Lesa mu mwingilo? (2 Timo. 3:16, 17)
• Twakonsha kuchinuzhuka byepi kujimbaikwa na ntanda yatama ya kwa Satana? (1 Yoano 5:19)
• Byo muji banyike, mwakonsha kukosesha byepi bulunda bwenu ne Lesa? (Yele. 17:7)
• Twakonsha kwikala byepi na bulume umvwe twakoka ku mupashi? (2 Ko. 12:10)
• Ñanyi bintu byo twafwainwa kuba pa kuba’mba tupimpule bwikalo bwetu nangwa kya kuba twajinga na byubilo byatama? (Efi. 4:23)
3. Kununga pa kuteleka ku majashi, ñanyi bintu bikwabo byo twafwainwa kumwenamo pa kubuñana kwa juba jimo?
3 Tukamwenamo bingi kumvwa ku bino byambo byanema! Kabiji kunungapo, byonka bikalatu kubuñana kwa mwanzo ne kushonkena kwa nkambi, kubuñana kwa juba jimo kuketulengela kupwanañana ne kwiyowa bulunda na balongo ne banyenga bakafuma mu bipwilo bikwabo. (Sala. 133:1-3; 2 Ko. 6:11-13) Ikalai na kimye kya kupwañana na balunda bo mwamonañenepo nabo kala ne kulenga bakatataka. Umvwe kya kuba’mba ñambi mwenyi nabiji kalama wa nkambi nangwa mulongo wafuma ku Betele bamutuma ku kubuñana kwa juba jimo ko mukekala nako, nanchi kechi mwafwainwa kumutambwila pamo na mukazhanji ne nyi? Kya kine, kuji bintu byavula byo tubena kutengela pa kubuñana kwa juba jimo kubena kwiya!