Mutanchi wa Kubuñana kwa Juba Jimo kwa mu 2010
1. (a) Kubuñana kwa juba jimo kwa kunyuma kwe kwasaabawile ñanyi bishina bya mu Binembelo? (b) Nanchi kujipo bishinka bimo byo mwafunjile pa kubuñana kwa juba jimo kwa kunyuma kwe bimukwashishe mu mwingilo wenu nyi?
1 “Tuyuke Bintu Byawamisha,” “Koselai mu Mupashi Umo,” “Twajijilai Kushimuna bya Bukine,” “Atweba twi Buchimba—Yehoba ye Mbumbi Wetu.” (Fili. 1:9, 10, 27; Yoa. 18:37; Isa 64:8) Abino byo bishina bimo byo twafunjilepo kala pa kubuñana kwa juba jimo kwa kunyuma kwe. Nanchi mubena kukeba kukatanwa ku kubuñana kwa juba jimo kwa mwaka wa mwingilo wa 2010 nyi? Kuno kubuñana kukasaabaula kishina kya kuba’mba: “Kimye Bekikepesha Kala,” kufuma mu kinembelo kya 1 Kolinda 7:29.
2. Mwakonsha kwikala byepi na kizaku kya kubuñana kubena kwiya?
2 Aku babijikatu juba ja kubuñana kwa juba jimo mu kipwilo kyenu, ikalai na kizaku kya kwambangapo pa mutanchi wa kuno kubuñana. Bansemi bamo bakwasha baana babo kutengela juba ja kubuñana kupichila mu kwijinemba pa kalenda wa kisemi pamo na bintu bikakebewanga kusenda, bino apa kebapembelele. Pa kimye kya Kupopwela kwa Kisemi, mwakonsha kupituluka mu bishinka byo mwafunjile kala pa moba a kubuñana kwa juba jimo. Kabiji mwakonsha ne kunengezha muchima wenu kupichila mu kutanga mu buku wa Mwenaimo mu Sukulu wa Lufunjisho lwa Mwingilo wa Lesa, pa mapeja 13-16, kuba’mba kimukwashe anweba ne kisemi kyenu ‘kuteshako muchima ku byo mumvwa.’—Luka 8:18.
3. Twakonsha kuba byepi pa kuba’mba tukamwenemo mu byo tukafunda?
3 Ingijishainga Byo Mufunda: Panyuma ya kubuñana, bavula batemwa kwamba’mba, “Kuno kubuñana byo kwaji kuwama po!” Ee kuwama, mambo ke lunengezho lumo lwa bintu byawama kufuma kwi Yehoba. (Mana 10:22) Bino pa kuba’mba byambo byo mwafunda bimukwashe, mwafwainwa kwibilama ne kwibilangulukangapo. (Luka 8:15) Pa kubwela ku nzubo, mwakonsha kwisambila pamo na kisemi kyenu ne bo mubena kuya nabo mu jishinda pa bintu byo mwafunda. Isambai pa bikonkwanyi byo mwibikila ne bishinka bikemukwasha mu mwingilo wenu. Kino kikemulengela kumwenamo bingi mu bintu byo mufunda pa kubuñana nangwatu papita moba avula.—Yako. 1:25.
4. Mambo ka kuno kubuñana o kukawamina?
4 Tumvwa bingi bulongo umvwe twatambwila bupe bwawama bo tubakebenga. Nanchi kechi tubena kutengela bintu byo etunengezhezha Yehoba pa kubuñana kwa juba jimo kubena kwiya ne nyi? Kine mwane kukawama bingi. Twaketekela tukatambwila kufuma kwi Shetu wa mwiulu aye Yehoba, lutundaiko ne lufunjisho lwa bya kwingila mwingilo ye etupa mambo byobyo tukeba.—2 Timo. 4:2; Yako. 1:17.
[Mepuzho a Lufunjisho]