Lunengezho lwa Katataka lwa Kupituluka mu Majashi a Kupwila kwa Kijiiji ne Kwiikajila
Ntanda ya kwa Satana byo yatwajijilatu na kutaminako, Yehoba witukosesha amba “tukanenga bumbulwa kwakamwa Lesa ne bya lwiso lwa panopantanda, twikale batekanya, ne baoloka, ne ba kunemeka Lesa panopantanda.” (Titu. 2:12) Pa lunengezho loapana kupichila mwi ‘kalume wa kishinka ne wa maana’ paji ne kupwila kwa kijiiji ne kwiikajila kubiwa jimo pa mwaka. (Mat. 24:45) Byo twikoseshapo mu kuno kupwila kwa ku mupashi!
Pa kuba’mba kiketukwasheko kuvuluka ne kwingijisha mikambizho yo tukafunda, kuji lunengezho lwa katataka lwa kupituluka mu majashi a kuno kupwila mu mwaka wa mwingilo wa 2005. Pa mapeja 5-6 a kino kya mukachi paji mitwe yaamba pa bintu bikambiwa mu majashi a kupwila kabiji ne mepuzho a kupitulukamo a kupwila kumo kumo. Bipwilo bikesamba bino byambo pa Kupwila kwa Mwingilo saka bikyangye kuya ku kupwila kwa kijiiji ne kwiikajila ne panyuma ya kuno kupwila. Kino kikanengezhiwa byepi?
Mulungu umo nangwa ibiji kipwilo saka kikyangye kutanwa ku kupwila kwa kijiiji, kukekala jashi ja maminiti 10 ja mutwe waamba’mba “Kupwila kwa Kijiiji Kubena Kwiya” jikambiwa mu Kupwila kwa Mwingilo kuba’mba jiketuletele mujojo wa kupwila. Ñambi ukambapo ne pa mepuzho a kupitulukamo ne kutundaika bonse kuba’mba bakanembengako bishinka pa kupwila kuba’mba bakeye na kwibingijisha pa kupituluka kukekalako milungu icheche ikalondelapo panyuma ya kupwila.
Mu milungu icheche ikalondelapo panyuma ya kupwila kwa kijiiji, mu Kupwila kwa Mwingilo mukekala kupitulukamo kwa maminiti 15 mu majashi a kuno kupwila kwa kijiiji kwa juba jitanshi. Mulungu ukalondelapo, mbaji ya maminiti 15 ikengijishiwa kupituluka mu majashi a kupwila kwa juba ja bubiji. Mepuzho a kupitulukamo aji mu kino kya mukachi o akengijishiwanga kwisambilamo ino misambo. Kupitulukamo kwafwainwa kwimena pa buneme bwa byobyo byambo. Pa kuba’mba mbaji ya kupitulukamo kwa kupwila kwa kijiiji ikafunjiwe, bakulumpe mu kipwilo bafwainwa kunengezha kuba’mba kukekaletu kwipipisha mbaji ikwabo ya Kupwila kwa Mwingilo, kubula kwiyamba, nangwa kunengezha kuba’mba ikafunjiwe juba jingi.
Lunengezho luntutu lumo lo lukalondelwa ne kimye kya juba ja kupwila kwiikajila, kikapusanakotu ke kya kuba’mba pologalamu yense ukapitulukwamotu mu maminiti 15. Atweba bonse twafwainwa kusunga bulongo kino kya mukachi ne kwikingijisha kuba’mba tukamwenemo mu lufunjisho lwawama loapana Yehoba.—Isa. 48:17, 18.