“Kajo pa Kimye Pafwainwa”
1. Kubuñana kwa juba jimo kwajingako kwimukwashishe byepi ne bakwenu pamo?
1 Panyuma ya kushinkwa ku kubuñana kwa juba jimo, javula twamba’mba, “Abya byambo bitukwasha bingi ubatu nobe bayukile.” Kalama wa mwanzo umo waambile’mba panyuma ya kubuñana kwajingako, basapwishi bamo ba mu mwanzo mo engijila bafuukwilepo kutendeka kwingilako pakatampe mu mwingilo. Kalama wenda waambile’mba, “Kubuñana kwitukwashishe kulangulukapo bulongo pa byo tufuukula kuba mu bwikalo mu ano moba o tujimo.” Mukwabo naye waambile’mba, “Basapwishi bavula baambile’mba kubuñana kwibavulwileko kuta muchima pa kintu kyakila mu kunema, mwingilo wetu wa kusapwila.” Nga anweba kubuñana kwa juba jimo kwimukwashishe byepi?
2. Bintu ka biji mu mutanchi wa mwaka ubena kwiya?
2 Kubuñana kwa juba jimo kwa mwaka wiya nako kuketukwasha bingi. Kukekala na kishina kya kuba’mba, ‘Ketekelai mwi Yehoba,’ kufuma pa Salamo 118:8, 9. Majashi amo akekalako o ano alondelapo: “Yehoba byo Ekala Nsakwa mu Kimye kya Malwa” “Kwashai Bakwenu Kufyama mu Byapi bya Yehoba,” “Ikalai Bakufyamamo Byonka Biji Yehoba,” “Anweba Bakyanyike, Ketekelai mwi Yehoba” ne ja kuba’mba, “Paladisa Wetu wa ku Mupashi—Ke kya Kufyamamo Kitunengezhezha Yehoba.”
3. Twakonsha kumwenamo byepi mu kubuñana?
3 Pa Kuba’mba Tukamwenemo: Aku babijikatu juba ja kubuñana, tendekai kwinengezha kushinkwako ne kwita bomufunjisha Baibolo. Pa kuba’mba tukonshe ‘kupanga bipangwa saka twatekanya,’ twafwainwa kulama byo tumvwa. (Luka 8:15) Onkao mambo, mukatelekeshenga ku majashi, ne kunembapo bishinka bipi ne byambo byo mwamona’mba bikemukwasha mu mwingilo ne mu bwikalo bwenu. Panyuma ya kubuñana, isambaipo na kisemi kyenu pa byo byo byambo ne kumona byo mwakonsha kwibingijisha.
4. Mambo ka o twafwainwa kutela muchima ku kubuñana kwa juba jimo kubena kwiya?
4 Byonkatu byo kikala pa kunengezha kajo kawama, ne kubuñana kwa juba jimo kwa mwaka wiya nako bateleko bingi muchima pa kwikunengezha. Yehoba emupeshe mukatanweko ne kwiyowa kajo ka ku mupashi ka “pa kimye pafwainwa” kakomesha bamwingilo wa bwina Kilishitu.—Mateo 24:45.