Juba ja Kupwila Kwiikajila Kubena Kwiya

Byo bakoseshiwe na mupashi wazhila, bena Kilishitu batanshi baingijilenga na ngovu kusapwila mambo awama konse konse. (Byubilo 1:8; Kolo. 1:23) Mutanchi wa juba ja kupwila kwiikajila kwa mwaka wa mwingilo wa 2007 wa kuba’mba “Ikalai Basumininwa na Mambo” uketukwasha kulondela kya kumwenako kyabo kyawama.—Byubilo 18:5.

Mfumu Davida waambilepo bino pa byambo bya Lesa amba: ‘Mulaye wa Yehoba wa kine, upana maana ku bantutu.’ (Sala. 19:7) Majashi anengezhiwa bulongo a juba ja kupwila kwiikajila kwa mu 2007 akalumbulula buneme bwa Binembelo bwa ‘kolola bintu’ ne kwitutundaika kwingijisha Mambo a Lesa kusapwila ne kufunjisha saka twatako muchima. (2 Timo. 3:16, 17) Uno mutanchi ubena kwiya ukamwesha byo twakonsha kuchinuzhuka bitewa ne kumwenamo mu kulondela mafunde a mu Baibolo mu bwikalo bwetu bwa juba ne juba. Kabiji uketukwasha ne kwingijisha Mambo a Lesa kukwasha bakyanyike ne bakatataka kukomenako ku mupashi.

Monai kuba’mba mwafika bukiji majashi a kupwila saka akyangye kutendeka kabiji ne kuteshako muchima. Mukanembengapo bishinka byo mukakonsha kwingijisha anweba bene. Mukatelekeshenga na lusanchilo mikambizho ne milaye yo mukatambula, kabiji ne kulangulukapo byo mukeba kwingijisha bintu byo mukafunda.

Mutanchi wa juba ja kupwila kwiikajila uketukwasha kunemekesha Mambo a Lesa, kwituvululako kutwajijila bakosa na kusapwila mambo awama a Bufumu na kizaku, ne kwitumwesha byo twakonsha kukwasha bantu kuba byonkabyo. Onkao mambo inengezhai kubula kushalapo pa lutangijilo ne mikambizho iji yonse ya ku mupashi yo abena kupana Yehoba mu jino jishinda!—Isa. 30:20b, 21.