Juba ja Kupwila Kupya Kwiikajila

Kupwila kwiikajila kwa juba jimo kukatendeka mu September 2000 kukekala na mutwe wa kuba’mba: ‘Ikalai Bakoma mu Mana.’ (1 Ko. 14:20) Mambo ka o kyanemena kuba’mba tukatanweko? Mambo twikala mu ntanda mwayula bubi. Onkao mambo, pa kuba’mba tushinde bubi ne kuba byawama twafwainwa kunungulula mana a ku mupashi. Akyo kyo tukakwashiwa kuba pa kuno kupwila kwiikajila.

Mu kipungu kya kushinkwila kupwila, paina wingijila kijiji ukamba jashi ji ji na mutwe wa kuba’mba, “Bya Kwitukwasha Kukoma mu Kumvwisha Baibolo.” Uketulumbulwila byo twakonsha kukosesha lwitabilo lwa Bwina Kilishitu. Mwenyi ñambi ukalondolola jishinda ja kine nangwa kwingijishiwa kwa mafunde a Baibolo byo kwaikala kwanema pa kunungulula mana, kimye kyo akambanga jashi ji ji na mutwe wa kuba’mba, “Vimbilai Bumupashi Kupichila mu Kukomesha Milangwe Yenu.”

Bakyanyike nabo bafwainwa kunungulula mana abo. Akyo kikambiwapo mu majashi aji na mitwe ya kuba’mba: “Ene Mambo o Twafwainwa Kwikela Balukeke ku Bubi” ne “Mu Moba Etu a Lelo Bakyanyike Bafunda Mana.” Tukomvwa bakyanyike byo bakalondolola bibakwasha kuvimbila bumupashi bwabo pa kuba’mba balame lusako lwa kuyuka misango yatama ya pano pa ntanda ne kuchinuzhuka kwitaya mu lukatazho.

Nanchi twafwainwa kutana byepi lusekelo lukatampe mu bwikalo bwetu? Mwenyi ñambi ukalondolola jino jipuzho mu jashi ja kupezhako ji ji na mutwe wa kuba’mba: “Mwenai mu Kwingijisha Mafunde a Baibolo na Mana.” Ukapana bya kumwenako bibena kumwesha kuba’mba kwingijisha Kyambo kya kwa Lesa kwakonsha kwitukwasha kuyuka bya kwingila na makatazho, kuyuka bya kufukula ne kumwena mu bibena kwitufunjisha Yehoba.

Abo babena kukeba kumwesha kwipana kwabo kwi Lesa kupichila mu lubatizhilo lwa mu mema pa kuno kupwila, bukiji-bukiji bafwainwa kubula wakutangijila. Inge juba ja kupwila kwiikajila jabijikwa, nembai kayukilo pa kalenda yenu pa jo jo juba kabiji nengezhai bulongo kutanwa ku uno pologalamu wanengela. Kukapuswa ku jashi nangwa jimo ja pa kuno kupwila kwiikajila ne! Kutanwa ku majashi onse kukemukwasha kuchinchika ku buno bwikalo bubi kabiji mukatwajijila kwikala ba bukishinka kwi Yehoba.