Juba Jakupwila Kwiikajila Kubena Kwiya
1 Nangwa kyakuba mazubo amabilabila nebantu bafunda sukulu yakumubiji batumbijika bunonshi bwakumubiji, Byambo bya Lesa bitutundaika amba “Ikalai Banonshi ba mu Mingilo Yawama.” (1 Timo. 6:18) Uno yemutwe wajuba jakupwila kwiikajila kubena kwiya kutatula mu September 2002. Ñanyi lufunjisho lotukafunda pakuno kupwila?
2 Mukulumpe wakijiiji ukamba byokilumbulula kwikala “Banonshi kwi Lesa,” kabiji ukepuzhapo bamo kushimikizha byobabena kwingila mwingilo kuba’mba bekale banonshi bakumupashi. Mujashi janji jitanshi jakuno kupwila, ñambi mwenyi ukalumbulula bantu ba Lesa byobabena kwingila “Mingilo Yawama Mukino Kimye Kyakunowa.” Atweba bonse pamuntu pamuntu baketufunjisha nebyotwakonsha kukizhamo kwingila mwingilo wa Lesa wakunowa ubena kwingijiwa ano moba.
3 Byotusangalalapo umvwe twamona bena Kilishitu bakyanyike sabakeba bunonshi bwakumupashi! Kino kitumbijika Yehoba kabiji kikwasha bakyanyike kwikala nakitendekesho kyakosa kyakutambwilapo mashuko amwingilo kimye kyakulutwe. Jashi jakuba’mba “Kutakaika Bakyanyike Pamingilo Yawama Yobabena Kwingila Yakutota Yehoba” jikatongaulapo mingilo yawama bena Kilishitu bakyanyike yobabena kwingila koko kwenu.
4 Ñanyi mfweto ifuma mukwingila mingilo yawama? Ñambi mwenyi ukalumbulula kino mujashi janji jakupezhako jaamba’mba, “Twajijilai Kwingila Mingilo Yawama Mumonenga Mapesho a Yehoba.” Ukamba pamashinda ana otumwenamo mapesho avula: (1) pamuntu pamuntu, (2) mubisemi, (3) mukipwilo, ne (4) mujibumba japanopantanda ponse.
5 Aba bepana kwi Yehoba bakabatizwa. Umvwe mwinengezha kuba’mba mukabatizwe, pelawizhai kubula mukulumpe utangijila mukipwilo.
6 Umvwe juba jomukekelapo nakuno kupwila jabijikwa kala, tatulai bukiji-bukiji kumonapo mashinda akwinengezhezhamo kuba’mba mukatanweko. Kafikai sakwashala kimye kuba’mba mukembeko lwimbo nekutelekako kululombelo lwakushinkwila. Kutanwako nekutelekesha kumajashi onse ajuba jakupwila kwiikajila kuketukosesha kutwajijila kwingila mwingilo witulengela kwikala banonshi bakine kwi Yehoba, Lesa wetu.