Juba ja Kupwila Kwiikajila Kubena Kwiya

Mutwe wa juba ja kupwila kwiikajila kwa mwaka wa mwingilo ubena kwiya ke mukambizho wa mu Binembelo wa kuba’mba: “Nekenenai Lesa—Diabola, Mukanai.” (Yako. 4:7) Uno ke mukambizho wanema bingi mu ano moba akatazha! Byo tukokela mikambizho ya Lesa, twikala ke balwanyi ba kwa Satana. Pa kuno kupwila tukafunda byo twakonsha kushinda meseko a kwa Diabola a kukeba konauna lwitabilo lwetu. Ñanyi bishinka bimo bya ku mupashi byo tukafunda pa kuno kupwila?

Mukulumpe wa kijiiji ukalumbulula “Kukokela Mikambizho ya Lesa mu Kisemi” byo kwakonsha kukosesha ba mu kisemi kushinda makatazho a ino ntanda. Jashi jitanshi jikamba ñambi mwenyi ja kuba’mba, “Kumukana Diabola Byo Kulumbulula,” jikalumbulula ene mambo ne byo twafwainwa kwikela bakosa kukana byubilo bya kwa Satana bya konauna bumupashi bwetu. Kukekala majashi abiji akambanga kikatakata pa bakyanyike nabo byo bafwainwa kujimuka ku byubilo bya kwa Diabola. Kabiji kukekala bena Kilishitu bavula bakoma pa kino kimye bakaine kulondela bya kusakasaka bya ino ntanda byo bakijinga banyike. Onkao mambo, tukekala na lusekelo lwa kuteleka ku bimo byo bapichilemo ku bwanyike.

Bantu bonse bafwainwa kukokela bakulumpe. Onkao mambo, jashi ja kupezhako jikamba ñambi mwenyi jikalumbulula mbaji ina motwafwainwa kukokela mikambizho ya Lesa: (1)ku makafulumende, (2)mu kipwilo, (3)ku nkito ya ku kyalo, ne (4)mu kisemi. Kuno kupwila byo kuketukwashapo!

Aba bakeba kubatizwa pa kuno kupwila kwiikajila, bafwainwa bukiji-bukiji kubula mukulumpe utangijila mu kipwilo. Atweba bonse twafwainwa kulabijila jino juba pa kalenda yetu ne kwinengezha kuba’mba tukatanweko ku majashi onse. Bintu byawama byo tukafunda bikekala bya myaka ne myaka byo tubena kutwajijila na kunekenena Yehoba.