“Kyaswa Muchima wa Lesa Kyubiwe”
1. Tongolai kishina kya kubuñana kwetu kwa juba jimo kwa mu mwaka wa mwingilo wa 2012, kabiji mambo ka o kyanemena kufunda uno mutwe?
1 Twalengelwe na mambo a kyaswa muchima wa Yehoba. (Lum. 4:11) Onkao mambo, kyakonsha kukatazha bingi kuba bintu byo twafwainwa kuba mu bwikalo kwa kubula kufunda ne kuba kyaswa muchima wa Lesa. Kino kechi kyakonsha kwitupelela kuba ne, mambo tulwa na muteeto wa ku kukeba “kuba bintu bikeba mubiji ne mwayila milanguluko yetu” nangwa kuba “bintu bikeba bantu.” (Efi. 2:3; 1 Pe. 4:3; 2 Pe. 2:10) Kwa kubula bukwasho bwa Lesa, twakonsha ‘kukwatwa kwi Diabola amba tubenga kyaswa muchima wanji.’ (2 Timo. 2:26) Kubuñana kwetu kwa juba jimo kwa mu mwaka wa mwingilo wa 2012 kuketukwasha atweba bonse kuba kintu kyanema kya busatu kiji mu lulombelo Yesu lo afunjishe baana banji ba bwanga kya kuba’mba, “Kyaswa muchima wenu kyubiwe.”—Mat. 6:9, 10.
2. Ñanyi mepuzho akakumbulwa pa kubuñana kwa juba jimo?
2 Mepuzho Akakumbulwa pa Kuno Kubuñana: Byo mukatelekanga ku majashi, mwafwainwa kutana mikumbu ya ano mepuzho: Ñanyi bintu bikwabo byo twakonsha kuba kununga pa kumvwa Mambo a Lesa? Twakonsha kutwajijila byepi kuyuka kyaswa muchima wa Lesa kwi atweba? Mambo ka o twafwainwa kukwashisha bantu bonse? Twakonsha kwikala byepi bwikalo bwawama buleta lusekelo? Anweba bakyanyike, ñanyi bintu byo mwafwainwa kubila Yehoba? Bintu ka byawama bifuma mu kuba kyaswa muchima wa Lesa? Mambo ka o kibena kukebewa bukiji bukiji kukosesha ne kutundaika bakwetu?
3. Twakonsha kumwenamo byepi pakatampe mu kuno kubuñana?
3 Inengezhai kuba’mba mukatanweko ne kutesha muchima ku majashi akambiwanga. Kinungwa kya pa Betele nangwa kalama wenda ukatanwako kabiji ye ukekala ñambi mwenyi. Mwakonsha kwisamba nanji kabiji umvwe wasongola, mwakonsha kwisamba ne na mukazhanji kubuñana saka ku kyangye kutendeka nangwa panyuma ya kupwisha kubuñana. Inge mwabwela ku mazubo enu, kechi mwafwainwa “kumvwatu ne kuvulama” byo mwafunda ne, mwafwainwa kupituluka mu byo mwafunda na kisemi kyenu ne kwisamba byo mwakonsha kuba bintu bulongo kwesakana na kyaswa muchima wa Lesa.—Yako. 1:25.
4. Mambo ka o kyanemena atweba kutangizhako kuba kyaswa muchima wa Lesa?
4 Aba bakeba kuba bintu mwayila milanguluko yabo ne boba bakana kulondela kyaswa muchima wa Yehoba, katatakatu bakebonaune. (1 Yoa. 2:17) Onkao mambo, tubena kusanchila bingi Yehoba pa kwitunengezhezha bino bintu bya ku mupashi bya kwitukwasha kutangizhako kuba kyaswa muchima wa Lesa!