Kwingijisha Byambo byo Bemupa

BAIBOLO waesakanya kipwilo kya bwina Kilishitu ku mubiji wa muntu. Kinungwa kyonse kyanema bingi, bino “byonse kechi biji na mwingilo umotu ne.” Kwesakana na kino kishinka, twafwainwa kwamba jashi jo betupa. Kino kikebewa kumvwisha ne kunengezha bulongo jashi jo betupa mu kifulo kya kulengulula mitwe imo na mambo a kulanguluka’mba kechi yawama ne. (Loma 12:4-8) Jibumba ja kalume wa kishinka kabiji wa maana jiji na mwingilo wa kunengezha kajo ka ku mupashi “pa kimye pafwainwa.” (Mat. 24:45) Umvwe ketwingijishe busendwe bwetu kwambilamo majashi kwesakana na mwayila mikambizho yo betupa, tumwesha’mba twanemeka luno lunengezho. Kino kilengela kipwilo kyonse kwingila bulongo.

Bya Kubikamo. Umvwe bemupa mutwe wa jashi jo mukamba mu sukulu, monai’mba mwaamba yenkawo mutwe kechi kwambako bingi ne. Javula, bemubujila jimo buku mwa kufumya byambo. Umvwe kechi bemubula buku muji byambo bya jashi jenu ne, mwakonsha kwikebela anwe bene byambo kufuma mu mabuku o mwamona’mba mo mwakonsha kwibitana. Nangwa byonkabyo, pa kunengezha jashi, monai’mba jibena kwamba pa mutwe ye bemupa. Pa kusala byambo bya kubikamo, mwafwainwa kulanguluka ne pa bantu bo mukambangako.

Pitaimo bulongo mu byambo mwafuma jashi jenu ne kulangulukapo pa binembelo bijimo. Apa bino mumone bya kwibyamba bulongo kuba’mba bantu bo mukambangako bakamwenemo. Salai bishinka bibiji nangwa kampe bisatu biji mu byobyo byambo kuba’mba mwibingijishe kwikala bishinka bikatampe mu jashi jenu. Kabiji umvwe bemubujila jimo buku mo mukafumya byambo bya jashi, salaimo binembelo byo mukeba’mba mukatange ne kwibilumbulula.

Bishinka binga byo mwafwainwa kwamba? Byonkatu byo mwakonsha kulumbulula bulongo. Kechi mwafwainwa kuvuzha bishinka mu jashi kya kuba mwakankalwa ne kufunjisha bulongo ne. Umvwe bishinka bimo kechi byakwatankana na nkebelo ya jashi ne, teshai muchima ku bisakwimukwasha kwamba bintu bibena kukebewa. Mu byambo biji mu buku ye bemubula kufumyamo jashi, salaimo byo mwamona’mba bikafunjisha bantu ne kwibakwasha. Nkebelo ya ano mafunde kechi ya kumona kuvula kwa byambo byo mwakonsha kwamba ne, nkebelo yao ke ya kukeba kumona inge mwakonsha kwingijisha byambo byo bemubula kufumyamo jashi.

Jashi jenu kechi jafwainwa kwikalatu ja kuchibawizha byambo biji mu buku mo jafuma ne. Mwafwainwa kwinengezha kukalumbulula bishinka bimo, kwibilondolola bulongo, kupana bya kumwenako kabiji ne kumwesha byo byafwainwa kwingila. Milanguluko ikwabo yafwainwa kwingila kulumbulula bulongo bishinka bikatampe biji mu byambo byafuma mu buku ye bemubula mu kifulo kya kupingizhamo byo babula kwimubula.

Balongo bamweka’mba bakonsha kufunjisha bulongo, mu kupita kwa kimye bakonsha kutendeka kwamba majashi pa Kupwila kwa Mwingilo. Bayuka buneme bwa kwamba byambo byo bebapa mu kifulo kya kukambamotu bingi. Balongo bamba majashi a mvula bantu nabo bebapa jashi jo banembela jimo. Mu ano majashi bakonsha kwalulako mumo mumo mubena kukebewa, pano bino, amwesha bulongo bishinka bikatampe byo bafwainwa kusaabaula, byambo bya kwibilumbulwilamo kabiji ne binembelo paimena jojo jashi. Kuyuka bya kufunjisha kwingijisha byambo biji mu buku ye bemubula, ke kintu kimo kyanema kwinengezhezhamo kukamba majashi akwabo o bakemupa.

Luno lufunjisho lwakonsha ne kwimukwasha kufunjisha mafunjisho a Baibolo ku bantu babena kuba bulongo ku mupashi. Mukafunda bya kutesha muchima ku bishinka biji mu lufunjisho mu kifulo kya kwambako bintu bingi byabulamo byo mwamona’mba byawama bino saka bibena kubula kukebewa mu yewo mutwe ye mubena kwisambapo. Bino umvwe mwaumvwisha kine kintu kyo baambapo mu luno lufunjisho, kechi mukominangatu ku bishinka biji mu lufunjisho kya kuba kemubule ne kulumbulwisha bulongo kuba’mba ye mubena kufunjisha Baibolo omvwishe lolo lufunjisho ne.