Nanchi Mukeba Kuyuka Byavula pa Mambo a Baibolo Nyi?
Mambo ka o Mwafwainwa Kufunjila Baibolo?
BAIBOLO kechi iji nabiji mabuku akwabotu ne—ayo iji na mizhilo ya Lesa. (1 Tesalonika 2:13) Umvwe ke mube bintu bifunjisha Baibolo, mukatanamo mfweto ikatampe bingi. Mukamutemwisha Lesa kabiji mukafwenya kwipi ne aye Mpanyi wa “byonse byawama ne bya bupe byonse byalumbuluka.” (Yakoba 1:17) Kabiji mukayuka byo mwakonsha kumusolomoka mumilombelo. Mukimye kya makatazho, Lesa ukemukwasha. Umvwe mubwikalo bwenu kemulondele mizhilo iji mu Baibolo, Lesa ukemupa bumi bwa myaka.—Loma 6:23.
Baibolo iji na bukine bupana maana. Aba bafunda maana aji mu Baibolo bakasululwa kubintu byabubela byaitabila bantu bavula. Kyakumwenako, inge twayuka bukine pa mambo a byubiwa inge twafwa bwitukasulula ku moyo wakuba’mba bafu bakonsha kwitukatazha nangwa kulanguluka’mba balongo betu bafwa babena kuyanda. (Ezikyo 18:4) Lufunjisho lwa Baibolo lwa lusanguko lutekenesha boba bafwisha batemwe babo. (Yoano 11:25) Inge twafunda nekuyuka bamalaika babi, twakonsha kuyuka bubi buji mukupopwela mipashi nekwitukwasha kumvwisha ene mambo panopantanda kyopaikela makatazho.
Mafunde a Lesa mu Baibolo etufunjisha kwikala bwikalo bwakwilama. Kyakumwenako, kwikala “wilama bulongo” kukwasha kwikala na butuntulu bwa mubiji bwawama. (1 Timoti 3:2) Umvwe ‘twitokesha atwe bene ku bubipisho bonse bwa mubiji ne bwa muchima,’ kokuba’mba tubena kuchina konauna butuntulu bwetu bwa mubiji. (2 Kolinda 7:1) Kabiji kwingijisha lujimuno lwa Lesa luji mu Baibolo kuleta lusekelo ne mushingi mu masongola.—1 Kolinda 6:18.
Umvwe ke mwingijishe Mambo a Lesa, mukekala bantu balusekelo. Maana a mu Baibolo etukwasha kwikala mutende mumilangwe nelusekelo kabiji etupa neluketekelo. Etukwasha kwikala nabyubilo byawama nabiji lusa, butemwe, lusekelo, mutende, buwame nebukishinka. (Ngalatiya 5:22, 23; Efisesa 4:24, 32) Byubilo bya iwe mutundu bitukwasha kwikala mulume nangwa mukazhi wawama, shetu nangwa inetu, mwana wamulume nangwa wamukazhi wawama.
Abya mwakilangulukapo kala pamambo akimye kyakulutwe nyi? Bungauzhi bwa Baibolo bwitubula kuba’mba tuji mukimye kyakatazha mubwikalo bwa bantu. Buno bungauzhi kechi bulondololatu pabyubilo bibena kubiwa mu ino ntanda ne, bino bwamba nekuba’mba katatakatu Lesa akalule ino ntanda ke paladisa.—Lumwekesho 21:3, 4.
Bukwasho bwa Kwimukwasha Kumvwisha Baibolo
Apo kampe mwaesekapo kala kutanga Baibolo pano bino mwakankalwa kwiyumvwisha. Kampe kechi mwayuka mu Baibolo pomwakonsha kutana mikumbu yamepuzho enu ne. Vulukai’mba, kechi yenu bonka mwabula kuyuka pomwakonsha kutana mikumbu mu Baibolo ne. Atweba bonse tukeba bukwasho pakuba’mba tumvwishe Mambo a Lesa. Mu byalo 235, Bakamonyi bakwa Yehoba, babena kufunjisha bantu bavula Baibolo kwakubula mfweto. Bakonsha kwimukwasha ne anweba.
Javula kyawama kufunda Baibolo pachepache, kutatwila ku mafunjisho atanshi. (Bahebelu 6:1) Byomutwajijila na kufunda, mukatendeka kuja “kajo kakosa”—kuno, ko kuyuka bukine. (Bahebelu 5:14) Mu Baibolo momuji buno bukine. Mabuku amo alumbulula Baibolo, nabiji buloshuwa wa Nanchi Lesa Ukebaka Kwiatweba?, ukemukwasha kumvwisha Binembelo pamitwe yapusana-pusana.
Nanchi Mwakonsha kwikalapo na Kimye kya Kufunda Baibolo Mulungu ne Mulungu Nyi?
Lufunjisho lwa Baibolo javula lubiwa pakimye ne pampunzha pemuwamina anwe bene. Bavula batemwa kufunjila ku mazubo abo kwazhindama nzoo. Bamo nabo batemwa kufunjila pa lamya. Luno lufunjisho kechi luji pamo nobe lwa mukalasi mutanyiwa bantu bavula ne, bino ke lunengezho lwa pabunke bwenu kwesakana nabwikalo bwenu, kubikapo ne papela maana enu nekufunda kwenu. Kechi kwikala kunemba ekizamineshonyi ne, kabiji kafwako nangwa umo ukemulengesha bumvu ne. Mepuzho onse o muji nao a Baibolo akakumbulwa, kabiji mukafunda ne byomwakonsha kufwenya kwipi na Lesa.
Kechi mukapanapo kiji kyonse pa luno lufunjisho lwa Baibolo ne. (Mateo 10:8) Lufunjishiwa kwakubula mfweto kubantu babupopweshi bonse nekuboba babula kuyapo kubupopweshi buji bonse bino bakeba kufunda Mambo a Lesa.
Bañanyi bomwakonsha kwikala nabo pa luno lufunjisho? Bamukisemi kyenu bonse. Inge mukeba mwakonsha kwitako nebalunda nenu. Umvwe kechi mukeba ne, mwakonsha kwikalatu bunke pakwimufunjisha.
Bamo mulungu nemulungu basalululapo kimye kyakufunjilamo Baibolo. Umvwe mwakonsha kwikala na kimye kyabaya nangwa kicheche mulungu nemulungu, Bakamonyi bakatwajijila kwiya komuji na kwimukwasha.
Lwito lwa Kwimwita’mba Mufunde
Mwane namba monañanaipo na Bakamonyi bakwa Yehoba. Jishinda jimo jo mwakonsha kumonañenamo nabo ke kupichila mukunembela kukeyala wanembwa panshi po. Apa bino lunengezho lukanengezhiwe lwakumonapo umo’mba akemufunjishenga lufunjisho lwa Baibolo panzubo yenu.
□ Ntuminai buloshuwa wa Nanchi Lesa Ukebaka Kwiatweba?
Mweshai mulaka yemukeba.
□ Mwane namba mbulai pa mambo a lufunjisho lwa Baibolo lwa panzubo.
Binembelo byotwaingijisha muno byafuma mu Buku wa Lesa wa Kikaonde, kana twamwesha ingi. Paji kinembelo umvwe panembwa NW, kibena kulumbulula kuba’mba abyo byambo byatuntululwa kufuma mu Baibolo wa New World Translation of the Holy Scriptures.