Anweba Bakyanyike—Mukobapoka Mubwikalo Bwenu?

NSONGWAKAZHI umo waambile’mba, “nkeba kwikala bingi bulongo mubwikalo.” Kwakubula nangwa kuzhinaukatune neanweba byobyo mukeba. Pano mwakonsha kwikala byepi “bulongo” mubwikalo? Pawaileshi, balunda nenu, kubikapotu nebafunjishi benu bakonsha kwimubula’mba umvwe waikala namali avula, nankito yamushingi, nekwikala nonshi wakonsha kwikala bulongo mubwikalo.

Nangwa byonkabyo, Baibolo ijimuna bakyanyike kuba’mba kukebesha bintu byakumubiji “kukabakanatu nobe kujatu mwela.” (Musapwishi 4:4) Kishinka kimo kekyakuba’mba, bakyanyike bamo bamotu bobekala banonshi nekutumbalala. Aba bekala banonshi nekutumbalala javula kibafita bingi kumuchima umvwe bintu byabula kubiwa monka mobaketekejilenga. Mwanyike umo mwina Britain wakebeshenga nkito yamushingi waambile’mba “Kwikala nonshi kujitu nobe kibokoshi mwabula kintu. Umvwe watalamo kafwamo nekijimotune.” Kyakine, kimo kimye nkito yakonsha kukuletela bunonshi nekutumbalala. Bino kechi yakonsha kukufweta “ku mupashi” ne. (Mateo 5:3, NW) Kabiji, mu 1 Yoano 2:17 betujimunako kuba’mba “panopantanda pakapita.” Onkao mambo, kwikala nonshi mukino kyalo, kekwa kakimyetu kacheche.

Musapwishi 12:1 wakambizha bakyanyike’mba: “Sa uvuluka Mulenga wobe mu moba a bwanyike bobe.” Kine, kintu kyawamisha kyomwakonsha kuba mubwikalo bwenu kekwingijila Yehoba Lesa. Bino patanshi mwafwainwa kwikala bantu bafwainwa kwingila mwingilo wa Lesa. Mwafwainwa kwikala bafwainwa byepi? Kabiji mukumwingijila Lesa mwavwangwamoka?

Byomwafwainwa Kwikala Kamonyi wakwa Yehoba

Patanshi, mwafwainwa kwikala nakizaku kyakusaka kwingijila Lesa. Bino kino kizaku kechi kiyatu akyo kine nangwa kyakuba bansemi yenu bena Kilishitu ne. Anweba bene mwafwainwa kwikala mulunda ne Yehoba. Nsongwakazhi umo waambile’mba “Lulombelo lukwasha bingi muntu kwikala mulunda ne Yehoba.”—Masalamo 62:8; Yakoba 4:8.

Loma 12:2 waamba pakintu kikwabo kyomwafwainwa kuba. Waamba’mba: “Mukayukenga kyaswa muchima wa Lesa, akya kyawama, ne kyaitabilwa, ne kyalumbuluka.” Abya nanchi mwazhinaukapo kala bintu bimo byomwafundanyi? Umvwe mwazhinaukapo kala, mwafwainwa kulondela lujimuno lwamu Baibolo ne ‘kuyuka anwe bene’ amba abyo bintu byobyakine! Samwipesela-pesela anwe bene. Mutangenga Baibolo nemabuku alumbulula Baibolo. Bino kufunda amba muyuke Lesa kechi kutangatu bishinka konkane. Ikalaipo nakimye kyakulanguluka-langulukapo pabyomubena kutanga pakuba’mba bimufike pamuchima wenu wakifwanyikizho. Kino kikalengela butemwe bwenu bwakutemwa Lesa kukomenako.—Masalamo 1:2, 3.

Kikwabo, samweseka kubulako bakwenu byomubena kufunda, nabiji bomufunda nabo sukulu. Apa bino mukatatule kusapwila kunzubo nenzubo. Kimo kimye mwakonsha kusambakana yemufunda nanji sukulu kimye kyomubena kusapwila kabiji kino kyakonsha kwimulengela kutatula kumvwa bumvu. Bino Baibolo itukambizha kubula kubila “bumvu mambo awama.” (Loma 1:16) Mubena kutwala mambo abumi neluketekelo! Mamboka akwiobila bumvu?

Umvwe bansemi yenu bena Kilishitu, kimo kimye mwatatula nekala kwingila nabo mumwingilo wabusapwishi. Pano mubena kwingila byavula kukilatu kwimanatu nzoo pakinzhilo nekutambika magazini nangwa talakiti? Abya mwakonsha kusolomoka mwinanzubo bunke bwenu nekumufunjisha byamu Baibolo nyi? Umvwene, ambilai bansemi yenu nangwa muntu umo mukipwilo wakoma kumupashi emukwasheko. Kibikai kekikonkwanyi kyenu kwikala musapwishi wamambo awama wabula kubatizhiwa.

Mukupita kwakimye, mukakeba kwipana—kulayañana na Lesa kuba’mba mumwingijilanga kutatula kyokyo kimye. (Loma 12:1) Kokuba’mba, kwipana kwenu kwafwainwa kuyukanyikwa. Lesa ukeba bonse ‘na kanwa kabo kwitabila ne kumona lupulukilo.’ (Loma 10:10) Pakubatizwa, patanshi mwafwainwa nakanwa kenu kulumbulula lwitabilo lwenu. Apa bino mwabatizwa mumema. (Mateo 28:19, 20) Lubatizhilo lwanema bingi. Pano bino kange muchine kubatizwa amba apo kampe mukakankalwanga kwikela mwayila kwipana kwenune. Umvwe mwaketekela mwi Lesa amba emukoseshe, ukemupa “bukata bwine bwa bulume” bwakwimukosesha.—2 Kolinda 4:7; 1 Petelo 5:10.

Palubatizhilo popomwikala ke Kamonyi wakwa Yehoba. (Isaya 43:10) Kino kyafwainwa kulamata byonse byomukobanga mubwikalo bwenu. Kwipana kuvwangamo ‘kwikana [obe] mwine.’ (Mateo 16:24) Kimo kimye mwakonsha nekusulako bimo byomusakisha kuba ne ‘kukebesha bufumu bwa Lesa.’ (Mateo 6:33) Kwipana nelubatizhilo bikemushinkwila jishinda jakwingijilamo mingilo yavula. Twayai tumonepo mingilo imo.

Mingilo Yakimye Kyonse Yomwakonsha Kwingijila Lesa

● Bupainiya kemwingilo umo wakimye kyonse. Musapwishi painiya ke mwina Kilishitu uji nabyubilo byawama wabatizwa winengezha kwingila maawala nobe 70 nakusapwila mambo awama pañondo pañondo. Kwingila kimye kyabaya mubujimi kukemukwasha kwikala musapwishi kabiji mufunjishi wawama. Bapainiya bavula basangalala bingi byobakwasha bobabena kufunjisha Baibolo kwikala Bakamonyi babatizwa. Nkitoka yakukyalo yafwainwa kwimuletela lusekelo nemutende kukila bupainiya?

Pakwimwena byamubwikalo, bapainiya bavula batwela nkito ibashilamo kimye kyakwingila mwingilo wabo. Bamo benengezhezha jimo kwingila uno mwingilo pakufundako busendwe bumo kusukulu nangwa kubansemi yabo. Umvwe anweba nebansemi yenu mwafuukula kuba’mba kyawama mufunjilepo nebikwabo panyuma yakupwisha sukulu yakusekondale, kyawama kumona kyomukafunjila yewo sukulu kechi amba mukamwenengamo mali avulane, bino amba mukekwashishengamo mumwingilo wenu wabusapwishi kikatakata wakimye kyonse.

Nangwa byonkabyo, painiya kyoanemeka bingi mubwikalo bwanji, kechi nkito yakumubijine, wanemeka mwingilo wanji wakukwasha bantu pakuba’mba bakekale nabumi bwamyaka. Mamboka akubula kwibikila kikonkwanyi kyakwingilako mwingilo wabupainiya? Bupainiya bushinkula mashinda akwingila nemingilo ikwabo. Kyakumwenako, bapainiya bamo baya nakwingijila kumapunzha amo kubena kukebewa basapwishi ba Bufumu bavula bingi. Bamo nabo bafunda mulaka ungi nekwingijila mukipwilo mobamba yewo mulaka nangwa mukyalo kingi. Ee kine, bupainiya kemwingilo wawama bingi kwingila mubwikalo!

● Mwingilo Wabumishonale naye kemwingilo wakimye kyonse. Kutatula mu 1943, Sukulu ya Baibolo ya Gileada ya Watchtower yafunjisha bapainiya bafwainwa kwingila mwingilo wabumishonale lufunjisho lwawama. Bapwisha uno sukulu batumwa kuya nakwingila mwingilo wabusapwishi bwakimye kyonse mubyalo bingi. Mubyalo byavula bwikalo bwashupa bingi, onkao mambo butuntulu bwamubiji nebulume byanema bingi mumwingilo wabumishonale. Nangwa kikale byonkabyo, bamishonale basekela bingi mubwikalo mambo amwingilo wabo.

● Sukulu ya Lufunjisho lwa Mwingilo yaikelako kufunjisha bakulumpe nebankwasho mukipwilo baitabizhiwa kwiya nakufunda kabiji babula kutwela mumasongola. Pabañondo babiji, bafunda mingilo yabukulumpe nebunkwasho mukipwilo, bingila jibumba ja Lesa, nebuñambi bwapamvula bantu. Umvwe bapwisha kufunda, bamo bebatuma kwingijila monka mubyalo byabo. Bakwabo nabo bebatuma mubyalo bingi.

● Mwingilo wapa Betele kemwingilo wakwitemenwa wakwingijila pamusampi wa Bakamonyi bakwa Yehoba. Bamo bamukisemi kya Betele bengila mwingilo wakupulinta mabuku alumbulula Baibolo. Bakwabo nabo bengila mwingilo wakukwasha nabiji kuwamisha bishimikwa nebipe, nangwa kunengezha byakumubiji bikebewa kubamukisemi kya Betele. Yonseye mingilo yanema kwi Yehoba. Kabiji, baji pa Betele baji nalusekelo byobayuka kuba’mba byonse byoboba, bikwasha balongo babo mwaya ntanda yonse.

Kimo kimye balongo bayukapo mingilo imo bebeta kuya nakwingijila pa Betele. Bino bavula, baya nakufunda mingilo ponkapa. Aba baji pa Betele kechi bengijila kuba’mba bekale banonshine, bino batondwa nabyonka byobebapa, kajo, mwakulaala mobebanengezhezha, nekajali kacheche kakupotamo tubintu twakyabo kyabo. Mwanyike umo mukisemi kya Betele walumbulwile mwingilo wanji kuba’mba: “Wawama bingi! Mwingilo kechi wapelane, bino kwingijila pano kwandetela mapesho avula bingi.”

● Mwingilo wakwingila mubyalo byapusana-pusana ulengela muntu kwingilako mwingilo wakushimika misampi ne Mazubo a Bufumu. Bano baya mubyalo bingi nakukakwasha mumwingilo wabuntungi. Uno naye kemwingilo wanema byonka byajinga yewa waingijilengapo bashimikilenga nzubo ya Lesa pamo ne Solomone. (1 Bamfumu 8:13-18) Balamwa byonka bilamwa bamukisemi kya Betele. Byojaikalapo jishuko kubano balongo nebanyenga pakwingilako uno mwingilo wakutotelamo Yehoba!

Ingijilai Yehoba Namuchima Yense

Kwingijila Yehoba kyokintutu kyawamisha kyomwakonsha kuba mubwikalo bwenu. Mamboka akubula kwibikila kikonkwanyi kyakwingijilako Lesa mwingilo wakimye kyonse? Isambaipo pamwingilo wakimye kyonse nabansemi yenu, bakulumpe mukipwilo kyomujimo, nemukulumpe wakijiiji. Umvwe mubena kukebesha kwingijila pa Betele, kuya kusukulu ya Gileada, nangwa Sukulu ya Lufunjisho lwa Mwingilo tanwai kukipwilo kikekalako kyababena kukeba bino, pakupwila kwakijiiji nekwankambi.

Pano bino, kechi bonse bafwainwa betabizhiwa nangwa bakonsha kwingila mumwingilo wakimye kyonsene. Kimo kimye bamo bakankalwa mambo akubela-bela, kubula tumali twakwikwashishamo, nemutembo wakulama kisemi. Nangwa byonkabyo, bena Kilishitu bonse bepana bafwainwa kumvwina lujimuno lwamu Baibolo kuba’mba: ‘Umutemwe Nkambo Lesa wobe namuchima wobe yense, ne na mweo wobe yense, ne namaana obe onse.’ (Mateo 22:37) Yehoba ukeba anweba kumwingijila papelela ngovu yenu. Onkao mambo, teshai muchima kukwingijila Yehoba mubwikalo bwenu kechi namambo abwikalo bwenune. Ibikilai kikonkwanyi kyakwingijila Lesa mumingilo yomwakonsha kwingila. Kine, ‘sa muvuluka Mulenga wenu mu moba a bwanyike bwenu’—kabiji umvwe mwauba byobyo, ukemupesha myaka nemyaka!

Binembelo byotwaingijisha muno byafuma mu Buku wa Lesa wa Kikaonde, kana twamwesha ingi. Paji kinembelo umvwe panembwa NW, kibena kulumbulula kuba’mba abyo byambo byatuntululwa kufuma mu Baibolo wa New World Translation of the Holy Scriptures​—With References.