Kitango 9

Twafwainwa Kukana Meseko

NANCHI bakikwambilapo kuba kyatama nyi?— Nanchi bakwambijilenga’mba kijitu bulongo bino saka kyatama nyi?— Umvwe muntu ke obe bino, ko kuba’mba ubena kwitweseka.

Twafwainwa kuba byepi umvwe twaesekwa? Nanchi twafwainwa kuba kyokyo kintu nyi?— Kuba bino kechi kwakonsha kutokesha Yehoba Lesa pa muchima ne. Nanchi wayuka ye kyakonsha kutokesha pa muchima nyi?— Satana Diabola.

Satana ye mulwanyi wa kwa Lesa, kabiji ye mulwanyi wetu. Kechi twakonsha kumumona ne, mambo ke kilengwa kya mupashi. Bino aye witumona. Juba jimo Diabola waambilenga ne Yesu, Mufunjishi Wayukisha, kabiji wamwesekelenga. Twaya tumone Yesu byo aubile. Kuba bino kusa kwitukwasha ne atweba kuyuka byo twafwainwa kuba umvwe twaesekwa.

Kimye kyonse Yesu wakebanga kuba kyaswa muchima wa Lesa. Wamwesheshe kino byo abatizwe mu Mukola wa Yodano. Panyumatu ya lubatizhilo Satana po po amwesekele. Baibolo ushimuna’mba “mwiulu mwashinkukile.” (Mateo 3:16) Kino kimwesha’mba Yesu watendekele kuvuluka bwikalo bwanji bwa mwiulu byo ajinga na Lesa.

Panyuma ya lubatizhilo, Yesu wayile mungye na kulanguluka pa bintu byo atendekele kuvuluka. Wakekele moba 40, mute ne bufuku. Ae moba onse Yesu kechi wajilepo kintu ne, onkao mambo waumvwine bingi nzala. Kyo kimye kyo bamwesekelenga kwi Satana.

Diabola waambile’mba: ‘Umvwe mwi mwana Lesa, ambilai ano mabwe aluke ke bashinkwa.’ Bashinkwa bo afwainwe kulenga bakonsheshe kuwama bingi! Nanchi Yesu wakonsheshe kwalula mabwe ke bashinkwa nyi?— Ee, wakonsheshe. Mambo ka? Mambo Yesu, Mwana Lesa kabiji wajinga bingi na bulume.

Nanchi inge wajinga obewa ye baesekele kwi Diabola inge walengele shinkwa nyi?— Yesu waumvwine nzala. Nanchi kechi kyajingatu bulongo kulenga shinkwa jimotu nenyi?— Yesu wayukile’mba kyatama kwingijisha bulume bwanji mu jino jishinda. Yehoba wamupele buno bulume amba bwa kukwashishako bantu, kechi kwibwingijisha mu jishinda mo akebejilenga aye mwine ne.

Onkao mambo, Yesu wabujile Satana byambo byanembwa mu Baibolo amba: ‘Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Yehoba.’ Yesu wayukile’mba kuba bintu bikeba Yehoba kwanema bingi kukila kajo.

Bino Diabola wamwesekele jikwabo. Wamutwajile Yesu mu Yelusalema, ne kumwikajika peulu ya jikonka ja nzubo ya Lesa. Satana waambile’mba: ‘Umvwe mwi mwana Lesa, mwiele anweba bene panshi. Mambo kyanembwa’mba, bamalaika ba Lesa bakemubakila kuchina’mba mwakekozha.’

Mambo ka Satana o aambijile bino?— Waesekelenga Yesu amba obe kintu kyabula kufwainwa. Pano bino, Yesu kechi wamumvwijile Satana ne. Wamwambijile’mba: “Kyanembwa’mba, kechi umweseke Nkambo Lesa obe ne.” Yesu wayukile’mba kyatama kumweseka Yehoba kupichila mu kubika bumi bwanji mu kizumba.

Pano bino, Satana kechi wikilekele ne. Watwajile Yesu ku mutumba walepesha bingi. Wakamumwesheshe makafulumende onse, nangwa’mba bufumu bonse bwa panopantanda, ne lukumo lwabo. Kabiji Satana waambijile Yesu amba: “Bino byonse nsakwimupa, umvwe mundambile ne kumpopwela.”

Akimona bintu byapainenga Diabola. Nanchi buno bufumu bonse, nangwa’mba makafulumende a bantu a kwa Satana nyi?— Yesu wayukile’mba a kwa Satana. Umvwe kechi ajinga a kwa Satana ne inge waswile. Ee, Satana ye mfumu wa bufumu bonse bwa panopantanda. Baibolo umutela’mba, “mfumu wa panopantanda.”—Yoano 12:31.

Wafwainwa kuba byepi umvwe Diabola wa kwambila’mba usa kukubilapo kintu kimo inge umupopwele?— Yesu wayukile’mba kyatama bingi kupopwela Diabola nangwa kya kuba amupe kintu kiji kyonse. Onkao mambo, Yesu waambile’mba: ‘Fumako, Satana! Mambo Baibolo waamba’mba, ukamupopwela Yehoba Lesa wobe ne kumwingijila aye yenka.’—Mateo 4:1-10; Luka 4:1-13.

Ne atweba tupita mu meseko. Nanchi wayukapo amo nyi?— Kya kumwenako. Twambe’mba bainobe bapanga bitumbuwa. Bakwambila’mba abye bitumbuwa tusakuja pachaile. Pano bino umvwe wafwa nzala wakonsha kukeba kwibija. Abya wakonsha kukokela bainobe nyi?— Satana aye ukeba’mba ubule kwibakokela.

Vuluka byo kyajinga kwi Yesu. Naye waumvwine bingi nzala. Bino wayukile’mba kyanema bingi kutokesha Lesa pa muchima kukila kajo. Umvwe wauba bintu byamba bainobe, ukamwesha’mba uji byonka byajinga Yesu.

Kampepo kimo kimye bakwenu bakonsha kukupa maalwa. Bakonsha kukwambila’mba switapotu tucheche umvweko bulongo. Pano bino, ano ke maalwa. Wakonsha kupendwa nangwa kubela. Kimye kimo bakonsha kukwambila’mba pepako bizhima. Wakonsha kuba byepi?—

Vuluka Yesu. Satana wakebelenga’mba Yesu abike bumi bwanji mu kizumba byo amwambijile’mba etaye panshi kufuma peulu ya nzubo ya Lesa. Bino Yesu kechi waubile kino ne. Wakonsha kuba byepi umvwe bakukanjikizha kuba kintu kyatama?— Yesu kechi wamumvwijile Satana ne. Ne obewa kechi wafwainwa kumvwina muntu ubena kukwambila kuba bintu byatama ne.

Kimye kimo bakonsha kukwambila’mba upopwele kipashañano, bintu byakanyiwa mu Baibolo. (Kulupuka 20:4, 5) Kampe kyakonsha kwikala kisela pa sukulu. Bakonsha kukwambila’mba basa kukupanga sukulu umvwe ukane. Wakonsha kubapo byepi?—

Kyapela bingi kuba kintu kyawama umvwe bantu bavula babena kwikyuba. Pano bino kyakatazha bingi kuba kyawama inge bakwetu ke betwambile kuba kyatama. Bakonsha kwamba’mba bintu byo babena kuba kechi byatama ne. Pano bino, kyanema kwishikisha’mba, Nga Lesa waambapo’mba ka? Aye wayuka byavula.

Onkao mambo, nangwatu bantu bambe bya musango ka, kechi twafwainwa kuba bintu Lesa byo aamba’mba byatama ne. Umvwe twauba bino, tukatokeshanga Lesa pa muchima, kechi Diabola ne.

Byambo bikwabo byaamba pa byo twakonsha kushinda meseko biji pa Salamo 1:1, 2; Byambo bya Mana 1:10, 11; Mateo 26:41; ne 2 Timoti 2:22.

[Kipikichala pa jipa 52]

Panyuma ya lubatizhilo, Yesu watendekele kuvuluka ka?

[Kipikichala pa jipa 53]

Diabola waingijishe byepi mabwe kumweseka Yesu?

[Kipikichala pa jipa 55]

Mambo ka Satana o apelejilenga Yesu buno bufumu bonse?

[Bipikichala pa jipa 55]

Wakonsha kuba byepi umvwe waesekwa?

[Kipikichala pa jipa 56]

Mambo ka o kyatamina kwingijisha bipashañano mu mpopwelo?