Funjilaiko Ku Byaubile Yesu Mu Kimye Kya Meseko

Aku Yesu ubatizhiwatu, bamutwajile ku mupashi wa Lesa mungye mu mpunzha ya Yudea. Wajinga na bintu byavula bingi bya kulangulukapo. Kimye Yesu kyo abatizhiwe, “jiulu jashinkukile.” (Mateo 3:16) Onkao mambo, wavulukilenga bintu byo afunjile ne byo aubanga mwiulu. Kine, wajinga na bintu byavula bingi bya kulangulukapo.

Yesu waikele mu kiselebwa moba 40 mute ne bufuku kabiji kafwako kyo ajiilepo pa oa moba ne. Yesu byo afwile nzala, Satana Diabola waishile na kumweseka ne kumwambila’mba: “Umvwe wi mwana Lesa, ambila ano mabwe aluke ke bashinkwa.” (Mateo 4:3) Bino Yesu wakaine, mambo wayukile’mba kechi kyawama kwingijisha bulume bwanji mu jishinda ja kukumya kuba’mba esangajike aye mwine ne.

Diabola kechi wikilekele ne. Waingijishe jishinda jikwabo. Waambijile Yesu amba etaye panshi kufuma peulu ya nsakwa ya nzubo ya Lesa. Bino Yesu kechi waswile kumweseka’mba obe kino kintu kya kukumya ne. Yesu waingijishe Binembelo kumwesha’mba kyatama kweseka Lesa mu jino jishinda.

Mu lweseko lwa busatu, Diabola wamwesheshe Yesu “bufumu bonse bwa pano pa ntanda ne lukumo lwabo.” Kabiji wamwambijile’mba: “Abye byonse nsakukupa umvwe umfukamine ne kumpopwela.” Yesu wakaine jibiji ne kwamba’mba: “Fuma papo Satana!” (Mateo 4:8-10) Yesu wakaine kumweseka’mba obe kyatama, mambo wayukile’mba wafwainwetu kwingijila Yehoba mwingilo wazhila. Kya kine, Yesu wafuukwilepo kutwajijila kwikala wa kishinka kwi Lesa.

Twakonsha kufunjilako ku ano meseko apichilemo Yesu ne byo aubile. Ano meseko amwesha’mba Diabola kechi bubitu buji mukachi ka muntu byonka byamba bantu bamo ne. Bino Diabola ko aji, kabiji ke muntu wa kine ubula kumweka. Kabiji ano meseko amwesha’mba makafulumende a pano pa ntanda onse a kwa Diabola. Umvwe ano makafulumende kechi ajinga anji ne, inge kechi wiengijishe kwesekelamo Kilishitu ne.

Diabola waambile ne kuba’mba wakonsheshe kufweta Yesu umvwe wamupopwela, ko kuba’mba wakonsheshe kumupa bufumu bonse bwa pano pa ntanda. Ne atweba Diabola wakonsha kwitweseka mu jishinda jimotu, kampe kupichila mu kwitutundaika kukebesha bunonshi, luusa nangwa bifulo bikatampe mu ino ntanda. Bino kyawama bingi kulondela byajinga Yesu kupichila mu kwikala ba kishinka kwi Lesa nangwatu tupite mu meseko a mutundu ka. Bino, vulukai kuba’mba Diabola wamushile Yesu “poso kimye kikwabo kyafwainwa.” (Luka 4:13) Ne atweba byo byo kyakonsha kwikala, onkao mambo, twafwainwa kutwajijila kwikala balaba.