Kitango 28

Byo Twakonsha Kuyuka Ye Twafwainwa Kukokela

KIMYE kimo kyakatazha bingi kuyuka ye twafwainwa kukokela. Bainobe ne bashobe bakonsha kukubula bya kuba. Pano bino mufunjishi obe nangwa kapokola wakonsha kukwambila kuba kintu kingi. Umvwe kyaikala bino, bañanyi bo wafwainwa kukokela?—

Kuntendekelotu ya uno buku, mu Kitango 7, twatangile kinembelo kya Efisesa 6:1-3 mu Baibolo. Kino kinembelo kyaamba’mba baana bafwainwa kukokela bansemi babo. Kitangiwa’mba: “Kokelai bemusema monka mwaswila Nkambo.” Nanchi wayuka byo kilumbulula kwikala “monka mwaswila Nkambo” nyi?— Bansemi bobila bintu monka mwaswila Nkambo bafunjisha baana babo kuba’mba bakokelenga mizhilo ya Lesa.

Bakulumpe bamo kechi baitabila mwi Yehoba ne. Ibyepi umvwe umo wakwambila’mba kijitu bulongo kunemba lweseko pa sukulu kasa uji na pepala ye wafya panembwa mikumbu nangwa kusenda kintu mu shitolo kwakubula kupana mali ne? Nanchi kijitu bulongo mwanyike kubepa nangwa kwiba nyi?—

Vuluka byaubile Mfumu Nebukaneza, wakambizhizhetu bantu bonse kupopwela nkishi wa ngolode ye alengele. Bino ba Shadalaka, Meshaka, ne Abedenego bakaine. Nanchi wayuka kyo bakanyijile nyi?— Mambo Baibolo waamba’mba bantu bafwainwatu kupopwela Yehoba yenkatu kwapwa.—Kulupuka 20:3; Mateo 4:10.

Panyuma ya lufu lwa kwa Yesu, batumwa banji bebatwajile mu kije kya Saniedilini, kyajinga kije kikatampe kya Bayudea. Ñanga Mukatampe aye Kaifasa waambile’mba: ‘Atweba twi mukambizhizhe bingi, namba kechi mufunjishenga mu jizhina ja [Yesu] ne. Pano akimonai, anweba mwakumbanya Yelusalema na mafunjisho enu.’ Mambo ka batumwa o babujile kukokela kije kya Saniedilini?— Petelo waimenejilengako batumwa bonse, wamukumbwile Kaifasa amba: “Atweba twafwainwa kukokela Lesa kukila bantu.”—Byubilo 5:27-29.

Mu oa moba, bantangi babupopweshi bwa Bayudea bajinga bingi na bulume. Pano bino, kyalo kyabo kyajinga mu maboko a kafulumende wa bena Loma. Ndamakyalo wa uno kafulumende wajinga Kesala. Nangwa kya kuba Bayudea kechi bakebelenga’mba Kesala ebalamenga ne, kafulumende wa Loma waubijile bantu bintu byawama byavula bingi. Ne ano moba kafulumende ubila bangikazhi banji bintu byawama byavula bingi. Nanchi wibiyuka bino bintu nyi?—

Kafulumende ulenga mikwakwa mwakwenda ne kupa bakapokola ne bantu bazhimya mujilo mali kuba’mba betuzhikijilenga. Kabiji bakonsha ne kushimika masukulu mwa kufunda banyike ne bipatela mwakulamina bakote. Kafulumende utayilapo mali avula bingi pa bino bintu. Nanchi wayuka kafulumende ko afumya mali nyi?— Ufumya ku bantu. Mali apana bantu ku kafulumende atelwa’mba misonko.

Kimye Mufunjishi Wayukisha kyo ajinga panopantanda, Bayudea bavula kechi bakebanga kupana misonko ku kafulumende wa bena Loma ne. Juba jimo bañanga baambijile banabalume bamo kumwipuzha Yesu kukeba’mba bamupemo mambo. Bamwipwizhe’mba, ‘Nanchi twafwainwa kupana musonko kwi Kesala nyi nangwa ne?’ Luno lwajinga lweseko. Umvwe Yesu wakumbwile’mba, ‘Ee, mwafwainwa kupana misonko,’ Bayudea bavula umvwe kechi baumvwine bulongo ne. Bino Yesu kechi waambile amba, ‘Ine kechi mwafwainwa kupana misonko ne.’ Kechi wafwanyijilwe kwamba bino ne.

Yesu waubilepo byepi? Waambile’mba: ‘Mmweshai ndenali.’ Byo bamumwesheshe, Yesu wibepwizhe’mba: Iji na kipasha ne kinembelo kya kwa ñanyi?’ Bakumbwile amba: “Bya kwa Kesala.” Yesu wibambile’mba: “Nanchi lubwilai Kesala bintu bya Kesala, ne Lesa bintu bya Lesa.”—Luka 20:19-26.

Kafwako wakonsheshe kupachika ne. Umvwe Kesala ubila bantu bintu, kyawama bingi kupana ano mali a kwa Kesala ku bintu byo akeba. Onkao mambo, Yesu wamwesheshetu patoka’mba kyawama bingi kupana misonko ku kafulumende na mambo a bintu byo etubila.

Bino, obewa kampe kechi wakonsha kupana misonko ne, mambo wakikepa. Pano bino kobiji byo wafwainwa kupana ku kafulumende. Nanchi wibiyuka nyi?— Kukokela mizhilo ya kafulumende. Baibolo washimuna’mba: ‘Kasa mukokela bakulumpe balama kyalo.’ Bano bakulumpe ke boba baji na bulume mu kafulumende. Onkao mambo, Lesa ye waamba’mba twafwainwa kukokela mizhilo ya kafulumende.—Loma 13:1, 2.

Kwakonsha kwikala muzhilo wa kuba’mba, kafwako kutaya mapepala nangwa biswaswa mu mukwakwa ne. Nanchi wafwainwa kukokela uno muzhilo nyi?— Ee, Lesa byo byo akeba. Nanchi wafwainwa ne kukokela bakapokola nyi?— Kafulumende ufweta bakapokola kuba’mba bazhikijilenga bantu. Umvwe ke twibakokele ko kuba’mba tubena kukokela ne kafulumende.

Umvwe ubena kukeba kukiluka mukwakwa pano bino kapokola wakwambila’mba “Akipembela!” wakonsha kuba byepi?— Umvwe bakwenu babena kukiluka, nanchi ne obewa wafwainwa kukiluka nyi?— Wafwainwa kupembela nangwa kya kuba yobe yenka ubena kupembelela. Lesa ukeba’mba ukokelenga.

Mu kimasamasa mwakonsha kwikala lukatazho, kabiji bakapokola bakonsha kwamba’mba: “Kuya mu mukwakwa ne. Kabiji kechi mwafwainwa kulupukila pangye ne.” Bino wakonsha kumvwa kyungwe pangye. Nanchi wafwainwa kulupuka’mba umone bibena kubiwa nyi?— Nanchi kuba bino ko kuba’mba ubena kukokela “bakulumpe balama kyalo” nyi?—

Mu mapunzha avula, kafulumende ushimika masukulu ne kufweta bafunjishi. Nanchi Lesa ukeba’mba ukokelenga bafunjishi nyi?— Akimona byuba kafulumende. Ufweta bafunjishi kuba’mba bakufunjishenga, byonkatu byo afweta bakapokola byo bazhikijila bantu. Onkao mambo, umvwe ke ukokele bakapokola nangwa bafunjishi ko kuba’mba ubena kukokela kafulumende.

Pano ibyepi umvwe mufunjishi wa kwambila’mba wafwainwa kupopwela kipashañano? Wafwainwa kuba byepi?— Bahebelu basatu kechi bafukamine ne kupopwela nkishi nangwa kya kuba Mfumu Nebukaneza ye wibambijile ne. Ubena kukivuluka kyalengejile nyi?— Mambo kechi bakebelenga kusatukila Lesa ne.

Shayuka wa mpito aye William Durant waambile pa bena Kilishitu batanshi amba: ‘Abo kechi bamupa Kesala munema wakilamo ne.’ Uno munema wafwainwa kupanwa kwi Yehoba! Onkao mambo mu bwikalo bwetu, Yehoba ye mutanshi ye twafwainwa kukokelanga.

Tukokela kafulumende mambo Lesa byo byo akeba’mba tube. Pano inge betwambila kuba bintu byakanya Lesa, twafwainwa kuba byepi?— Twafwainwa kwamba byonka batumwa byo baambijile ñanga mukatampe amba: “Atweba twafwainwa kukokela Lesa kukila bantu.”—Byubilo 5:29.

Baibolo ye ufunjisha byo twafwainwa kunemeka mizhilo. Tanga byanembwa pa Mateo 5:41; Titusa 3:1; ne 1 Petelo 2:12-14.

[Kipikichala pa jipa 148]

Petelo ubena kwamba amba ka kwi Kaifasa?

[Kipikichala pa jipa 149]

Yesu wakumbwile byepi bwipuzho bwa bano bantu bakebelenga kumupamo mambo?

[Kipikichala pa jipa 151]

Mambo ka o twafwainwa kukokela bakapokola?