Kitango 37

Kuvuluka Yehoba Ne Mwananji

TWAMBE amba muntu umo wakupa bupe bwawama bingi. Wakonsha kumvwa byepi?— Nanchi wakonsha kwambatu amba nasanta wabwela wamulubako muntu wakupa bobo bupe nyi? Inyi wakonsha kuba saka umuvulukatu na mambo a kintu kyo akubijile?—

Yehoba Lesa witupele bupe bwawama bingi. Watumine Mwananji panopantanda kuba’mba etufwile. Nanchi wayuka kyalengejile amba Yesu etufwile nyi?— Kino ke kintu kyanema bingi kyo twafwainwa kuyukisha.

Byonka byo twafunjile mu Kitango 23, Adama walengele mambo pa kulala muzhilo wa Lesa. Kabiji ne atweba twaswaine bundengamambo bwa kwa Adama, mambo ye shetu. Ki ka kikebewa kotuji?— Tukebewa shetu waoloka. Shetu wa uno mutundu wafwainwa kwikala ñanyi?— Yesu.

Yehoba watumine Yesu panopantanda kuba’mba ekale shetu mu kifulo kya kwa Adama. Baibolo waamba’mba: “Muntu mutanshi Adama waalukile ke muntu mumi. Kabiji Adama wapelako waalukile ke mupashi upana bumi.” Ñanyi wajinga Adama mutanshi?— Wajinga muntu mutanshi ye balengele kwi Lesa kufuma ku lukungu. Nga Adama wapelako ye ñanyi?— Yesu. Baibolo wamweshatu patoka kino byo aamba’mba: ‘Muntu mutanshi [Adama] ye wa panopantanda, wa panshitu: muntu wa bubiji [Yesu] ye wa mwiulu.’—1 Kolinda 15:45, 47; Ntendekelo 2:7.

Lesa byo ashikwile bumi bwa kwa Yesu ne kwibubika munda mwa kwa Maliya, ko kuba’mba Yesu kechi waswaine bundengamambo bwa kwa Adama ne. Kyo kine kintu Yesu kyo aikejile muntu waoloka. (Luka 1:30-35) Kabiji kyo kyalengejile ne malaika kwambila bakafunga kimye kyasemekelwe Yesu amba: ‘Ja lelo . . . kwimusemenwa Mupulushi.’ (Luka 2:11) Yesu pa kuba’mba ekale Mupulushi, wafwainwe kuba byepi?— Wafwainwe kukoma ne kwikala byonka byajinga Adama. Panyuma ya bino, Yesu po po afwainwe kwikala ‘Adama wa bubiji.’

Kabiji Yesu Mupulushi wetu, ukekala “Shabantu.” Byo byo atelwa mu Baibolo. (Isaya 9:6, 7) Ee, Yesu muntu waoloka wafwainwa kwikala shetu mu kifulo kya kwa Adama awo waikele ke mbulwakoloka byo alengele mambo. Po po twakonsha kwikala na shetu wa ‘bubiji’ byonka byajinga Adama. Yesu ye Mwana Yehoba Lesa.

Umvwe twamuyuka Yesu, po po twakonsha kumutambula’mba Mupulushi wetu. Abya ubena kukivuluka bintu byo tukeba kuba’mba tukakulweko nyi?— Ee, tukeba tukakulwe ku bundengamambo ne lufu byo twaswana kufuma kwi Adama. Bumi bwapaine Yesu, butelwa’mba bukuzhi. Yehoba wapaine bukuzhi kuba’mba tulekelwe bundengamambo bwetu.—Mateo 20:28; Loma 5:8; 6:23.

Kechi twafwainwa kulubako bitubila Lesa ne Mwananji ne, ke ibyo nenyi?— Yesu wabujile baana banji ba bwanga kintu kya kuba kyafwainwa kwitukwasha kuvuluka byo aubile. Akitwaya twisambepo pa kino kintu.

Fwanyikizha kuba’mba uji mu nzubo ya peulu mu Yelusalema. Ke kimye kya bufuku. Yesu ne batumwa banji baji ku tebulu. Pa tebulu paji nyama ya mukooko ya kusoka, tubashinkwa twapapakana, ne binyu. Babena kuja kijiilo. Wayuka kyo baubijile bino nyi?—

Kino kijiilo kyajinga kya kwibavululako byaubile Yehoba mu moba a kunyuma, kimye bantu banji bena Isalela kyo bajinga mu buzha mu Ijipita. Yehoba waambijile bena Isalela amba: ‘Mu kisemi kyonse bepaye mukooko, mashi anji beashinge pa mashiki a ku kibelo.’ Wabwelele waamba’mba: ‘Twelai mu mazubo enu, muje nyama ya mukooko.’

Bena Isalela baubile bibakambizhe Yehoba. Kabiji bonkabwa bufuku, malaika wa Lesa wapichile mu ntanda ya Ijipita. Mu mazubo onse, malaika waipailengamo mwana mubeji. Pano bino malaika umvwe wamona mashi pa mashiki a ku kibelo, ayo nzubo wiipitaila. Kafwamo mwana wafwile mu ano mazubo ne. Felo mfumu wa Ijipita waumvwine bingi moyo na kintu kyaubile malaika wa Yehoba. Waambijile bena Isalela amba: ‘Mwakasuluka mu buzha. Fumai muno mu Ijipita!’ Bena Isalela bakashile bangamela ne bambongolo babo kebaye ne kuya.

Yehoba kechi wakebelenga’mba bantu banji balubemo byo ebafumishe mu buzha ne. Onkao mambo, waambile’mba: ‘Pa mwaka pa mwaka mukajenga kino kijiilo.’ Kino kijiilo bekitelanga’mba Kijiilo kya Lupitailo. Mambo ka o bekitelelanga bino?— Mambo pa joja juba, malaika wa Lesa ‘wapitaijile’ mazubo ajinga na mashi pa mashiki.—Kulupuka 12:1-13, 24-27, 31.

Kimye kyo bajilenga Kijiilo kya Lupitailo, Yesu ne batumwa banji bavulukilenga kino. Yesu waubile kintu kyanema bingi. Bino saka akyangye kuba bino ne, mutumwa wabujile bukishinka, aye Yudasa bamupangilemo. Yesu washikwile shinkwa, ne pa kumupesha watebawile, ne kumupana ku baana banji ba bwanga. Waambile’mba: “Tambulai, jai.” Kabiji wibambijile’mba: ‘Uno shinkwa ubena kwimenako mubiji wami ye nkapana umvwe nafwa.’

Kabiji Yesu wabwelele washikula katomeno mwajinga binyu. Panyuma ya kusanta, wikapaine ku baana banji ba bwanga ne kwamba’mba: “Shilañanai anweba bonse.” Kabiji wibambijile’mba: ‘Abye binyu bibena kwimenako mashi ami. Bukumotu ngichile mashi ami mu kwimulekelako mambo enu. Kasa muba kino mu kumvuluka.’—Mateo 26:26-28; 1 Kolinda 11:23-26.

Nanchi wamona Yesu byo abujile baana banji ba bwanga amba kasa muba bino mu kumvuluka nyi?— Balekele kwikala na Kijiilo kya Lupitailo. Pa mwaka pa mwaka, batendekele kwikala na kino kijiilo kya kuvuluka Yesu ne lufu lwanji. Kino kijiilo kitelwa’mba Kijiilo kya Nkambo kya Mabanga. Ano moba kitelwa’mba Kivuluko. Mambo ka?— Mambo kituvulula bitubijile Yesu ne Shanji, Yehoba Lesa.

Shinkwa witulengela kuvuluka mubiji wa kwa Yesu. Wapaine mubiji wanji kuba’mba twikale na bumi bwa myaka ne myaka. Nga binyu bituvululako ka?— Bituvululako kuba’mba mashi a kwa Yesu anema bingi. Anema bingi kukila ne mashi a mukooko wa Lupitailo mu Ijipita. Abya wayuka ene mambo o kyaikela bino nyi?— Baibolo waamba’mba mashi a kwa Yesu o alengela bundengamambo bwetu kulekelwa. Kabiji umvwe bundengamambo bwetu bonse bwapwa, kechi tukabelanga, kukota, nangwa kufwa ne. Umvwe twatanwa ku Kivuluko po po tuvuluka kino.

Nanchi uji yensetu wakonsha kuja shinkwa ne kutoma binyu kimye kya Kivuluko nyi?— Yesu waambijile aba bajako ne kutoma amba: ‘Mukalama mu bufumu bwami ne kwikala pa matanda a mwiulu.’ (Luka 22:19, 20, 30) Kino kyamwesheshengatu patoka amba bakaya mwiulu na kwikala bamfumu bakulama pamo ne Yesu. Onkao mambo, aba bonkatu bakalama ne Yesu bo bafwainwa kujako ku shinkwa ne kutoma binyu.

Pano bino nangwatu boba babula kuja shinkwa ne kutoma binyu bafwainwa kutanwako ku Kivuluko. Abya wayuka ene mambo o bafwainwa kubila bino nyi?— Mambo ne atweba Yesu witwelejile mweo wanji. Umvwe twaya ku Kivuluko, tumwesha’mba kechi twalubamo ne. Tuvuluka bupe bwawama bwitupa Lesa.

Binembelo byaamba pa buneme bwa bukuzhi bwa kwa Yesu ke 1 Kolinda 5:7; Efisesa 1:7; 1 Timoti 2:5, 6; ne 1 Petelo 1:18, 19.

[Bipikichala pa jipa 193]

Mu ñanyi jishinda Adama ne Yesu mo bajinga pamotu, kabiji mambo ka o kyanemena?

[Kipikichala pa jipa 194]

Mashi a mukooko azhikijile byepi bena Isalela?

[Kipikichala pa jipa 194]

Mashi a kwa Yesu o afwanyikizhe ku binyu akonsha kwitubila ka?