Kitango 42

Ene Mambo O Twafwainwa Kwingilanga

KYEPI kyo watemwishapo, kwingila nyi, inyi kukaya?— Kukaya kechi kwatama ne. Baibolo waamba’mba mu Yelusalema ‘mukakumbana baana ba balume ne ba bakazhi kasa bakayila monka.’—Zekaliya 8:5.

Mufunjishi Wayukisha waumvwanga bingi bulongo inge wamona banyike saka bakaya. Saka akyangye kwiya panopantanda ne, waambile’mba: “Amiwa saka nji nanji [Lesa] pamo nobe sendwe mwine. . . najinga wanji ye amwenejilemo lusekelo pa juba pa juba.” Yesu wajinga sendwe waingilanga ne Yehoba mwiulu. Byo ajinga mwiulu waambile’mba: ‘Nasekejile mu bantu.’ Ee, kwesakana na byo twafunjile, Mufunjishi Wayukisha wasekelanga bingi mu bantu bonse kubikapotu ne banyike.—Byambo bya Mana 8:30, 31.

Nanchi Yesu wakayanga byo akijinga mwanyike nyi?— Wafwainwa wakayanga. Byo ajinga “sendwe mwine” mwiulu, abya ne panopantanda waingilanga nyi?— Yesu watelwanga’mba ‘mwana kalipentala.’ Bino naye watelwanga’mba ‘kalipentala.’ Nanchi kino kimwesha ka?— Yesu byo bamukomeshe kwi Yosefwa, wafwainwa ye wamufunjishe. Onkao mambo, Yesu naye waikele ke kalipentala.—Mateo 13:55; Mako 6:3.

Yesu wajinga kalipentala wa ñanyi mutundu?— Byo ajinga sendwe mwine mwiulu, nanchi ne panopantanda napo wafwainwa waikele ke kalipentala mwine, ke ibyo nenyi?— Akimona mingilo yaingilanga bakalipentala mu oa moba. Yesu wafwainwa wayanga mungye na kutema bichi, wabwela wibivikaula, apa bino wibisenda ku nzubo. Wibipamunanga bulongo bino bichi ne kwibyalula ke mapulanga ne kutendeka kulenga matebulu, bipona, ne bintutu bikwabo.

Nanchi uno mwingilo wamuletelanga lusekelo nyi?— Umvwe obewa walenga matebulu, bipona ne bintutu bikwabo byakonsha kwingijisha bantu, wakonsha kwikala na lusekelo nyi?— Baibolo ushimuna’mba kyawama bingi muntu ‘kusekela mu mingilo yanji.’ Kwingila kuleta bingi lusekelo kukila kukaya.—Musapwishi 3:22.

Ee, kwingila kwitukwasha bingi mu milanguluko ne ku mubiji. Banyike bavula bekalatu na kutamba TV ne makayo a pa vidyo. Bekala ke bankope, mambo umvwe baumvwa bya kwingila ne ku muchima bwii. Kino kibalengela kubula kwikala na lusekelo. Kabiji kechi basangajika bakwabo ne. Pa kuba’mba wikale na lusekelo wafwainwa kuba byepi?—

Twafunjile mu Kitango 17 kya uno buku amba kupana ne kwingijila bakwetu kuleta bingi lusekelo. (Byubilo 20:35) Yehoba utelwa mu Baibolo amba ‘Lesa wa lusekelo.’ (1 Timoti 1:11, NW) Kabiji byonka byo twaji kutanga mu Byambo bya Mana, Yesu ‘wasekelanga ku meso [a Lesa] moba onse.’ Mambo ka Yesu o aikejile na lusekelo?— Waambile’mba: “Batata bengilatu ne pano, ne amiwa ñingila pamotu.”—Yoano 5:17.

Yesu byo ajinga panopantanda kechi waingilangatu mwingilo wa bukalipentala ne. Yehoba Lesa wamupele mwingilo wanema bingi wa kwingila panopantanda. Abya wamuyuka uno mwingilo nyi?— Yesu waambile’mba: “Nafwainwa nsapwile mambo awama a bufumu bwa Lesa ku mizhi ikwabo, mambo kyo kyo natuminwe.” (Luka 4:43) Kimye kimo umvwe Yesu wasapwila bantu, bamwitabilanga ne kuya na kubulako bakwabo bintu byo ebabulanga, byonka byaubile iwe mwanamukazhi mwina Samaliya ye ubena kumona pape.—Yoano 4:7-15, 27-30.

Nga Yesu waumvwanga byepi byo aingilanga uno mwingilo? Abya wakebanga kumwingila nyi?— Yesu waambile’mba: “Kajo kami ko kuba kyaswa muchima wa aye wantuma, ne kupwisha mwingilo wanji.” (Yoano 4:34) Nanchi watemwa kuja kajo ko watemwisha nyi?— Yesu naye byo byo atemenwe mwingilo wamupele Lesa.

Lesa witulengele mu jishinda ja kuba’mba umvwe twafunda mingilo, twakonsha kwikala na lusekelo. Lesa waambile’mba kya bupe kyo apa muntu ke kya kuba’mba ‘asekelenga mu mingilo yanji.’ Onkao mambo, umvwe wafunda mingilo saka ukijitu mwanyike, ko kuba’mba bwikalo bobe bukawama bingi.—Musapwishi 5:19.

Kino kechi kilumbulula’mba mwanyike engilenga mingilo ingila bakulumpe ne, bino atweba bonse twakonsha kwingila mingilo itufwainwa. Bansemi bobe kampe pa juba pa juba baya ku mingilo kuba’mba batambulengapo kajali kakupotamo kajo ne bintutu bikwabo. Kabiji wafwainwa kuyuka amba pa nzubo pekala bingi nkito ikebewa kwingijiwa kuba’mba pamwekanenga bulongo.

Ñanyi mingilo yo wakonsha kwingila mu kukwashako kisemi kyonse?— Wakonsha kupukuta pa tebulu, kovwa michiba, kupyanga, ne kutolaula tubintu tobe to ukaisha. Kampepo ubapo bino bintu. Ino mingilo ikwasha bingi kisemi kyonse.

Akitwaya tumone ino mingilo kyo yawamina. Tubintu tobe to ukaisha wafwainwa kwitubika bulongo kwabengakana. Mambo ka o wafwainwa kubila bino?— Kilengela nzubo kumweka ya butooto, kabiji kilengela kubula kwikala na mapuso. Umvwe kechi utula tubintu tobe to ukaisha kwabengakana ne, bainobe juba jimo bakonsha kwiya saka basenda bintu ne kutezhimukapo ne kwikozha. Kampe bakonsha ne kwibabika mu kipatela. Nanchi kino kyawama nyi?— Onkao mambo, kyawama bingi kubika tubintu tobe twa kukaisha kwabengakana bulongo.

Kuji ne mwingilo mukwabo wakonsha kwingila banyike. Kya kumwenako, mwingilo wa ku sukulu. Ku sukulu ko ko ufunda bya kutanga. Banyike bamo batemwa bingi kutanga, bino bamo nabo ne. Nangwa kya kuba kimye kitanshi kyakonsha kukatazha, kyawama bingi kufunda bya kutanga. Umvwe wafunda kutanga, ukayuka bintu byavula bingi. Obe mwine ukatanganga ne Baibolo, Byambo bya Lesa. Onkao mambo, umvwe watako muchima ku sukulu, mwakonsha kufuma byawama, ke ibyo nenyi?—

Bantu bamo umvwe baumvwa bya nkito, bomvwatu ne ku muchima levulevu. Kampe wayukapo bantu bamo boba bino. Lesa byo etulengele amba tukengilenga, twafwainwa kufunda mingilo. Nanchi Mufunjishi Wayukisha waingilanga nyi?— Ee, waingilanga, mambo kwingila wikumonangatu nobe kuja kajo ko atemwisha. Ñanyi mingilo yo aambangapo?— Wabulangako bakwabo pe Yehoba Lesa ne byo bakonsha kwikala na bumi bwa myaka ne myaka.

Bino byo bintu byakonsha kwitukwasha kutemwa mingilo. Ishikishe amba: ‘Mambo ka uno mwingilo kyo abena kukebewa kwingijiwa?’ Umvwe wayuka buneme bwa kintu, kipela bingi kwikyuba. Kabiji mwingilo nangwa ekale mucheche nangwa abaye, wafwainwa kumwingila bulongo. Inge ke wingile bulongo mingilo, ukekalanga bingi na lusekelo byonka byaubile Mufunjishi Wayukisha.

Baibolo wakonsha kukwasha muntu kwikala wa mwingilo wawama. Akyumvwa byo aamba pa Byambo bya Mana 10:4; 22:29; Musapwishi 3:12, 13; ne Kolose 3:23.

[Kipikichala pa jipa 217]

Saka akyangye kwiya panopantanda ne, Mufunjishi Wayukisha waubanga ka?

[Bipikichala pa jipa 218]

Yesu waingilanga ñanyi mingilo ibiji byo ajinga panopantanda?

[Kipikichala pa jipa 221]

Mambo ka o kyanemena kutula tubintu tobe twakukaisha kwabengakana bulongo panyuma ya kupwisha kukaya?