Sangalelainga Mu Mingilo Yenu

1-3. (a) Bantu bavula bomvwa byepi pa nkito yo bengila? (b) Ñanyi mepuzho o tusakwisambapo mu kino kitango?

BANTU bavula mwaya ntanda bengila na ngovu pa kuba’mba bamwenenga ba mu kisemi kyabo ne abo bene. Bavula kechi batemwa nkito yo bengila ne, kabiji bakwabo nabo kechi bakeba kuya ku nkito ne. Ne anweba inge byobyo mumvwa, mwakonsha kuba byepi pa kuba’mba musangalelenga mu nkito yenu? Mwakonsha kutemwa byepi nkito yenu?

² Yehoba witubuula’mba: “Muntu yense wafwainwa kuja, kutoma ne kusangalela mu mingilo yanji yonse. Kino ke kya bupe kyafuma kwi Lesa.” (Musapwishi 3:13) Yehoba witulengele’mba twingilenga. Ukeba’mba tumwenengamo lusekelo mu bintu byo tuba.—Tangai Musapwishi 2:24; 5:18.

³ Ñanyi bintu byakonsha kwitukwasha kusangalela mu nkito yetu? Ñanyi mingilo yakonsha kuchinuzhuka bena Kilishitu? Twakonsha kuba byepi pa kuba’mba nkito yo twingila ibulenga kwitulengela kukankalwa kwingijila bulongo Yehoba? Kabiji ñanyi mwingilo wanema ye twafwainwa kwingila?

YEHOBA NE YESU BENGILA BINGI NA NGOVU

4, 5. Yehoba umona byepi nkito?

⁴ Yehoba watemwa bingi kwingila. Kinembelo kya Ntendekelo 1:1 kyaamba’mba: “Mu ntendekelo Lesa walengele jiulu ne ntanda.” Lesa byo apwishishe kulenga ntanda ne bintu byonse bijimo, waambile pa byo alenga’mba “byawamishatu.” (Ntendekelo 1:31) Mulenga wetu wasekejile mu bintu byo alengele.—1 Timoti 1:11.

⁵ Yehoba watwajijila na kwingila. Yesu waambile’mba: “Batata ne luno bakingila.” (Yoano 5:17) Nangwa kya kuba kechi twayuka bintu byonse byauba Yehoba ne, bino twayukapo bintu bimo byo auba. Watwajijila kusala boba bakalamanga pamo na Mwananji aye Yesu Kilishitu mu Bufumu. (2 Kolinda 5:17) Kabiji Yehoba ubena kutangijila ne kuzhikijila bantu babena kwiya kwi aye. Mwingilo wa kusapwila ubena kukwasha bantu kufunda pe Yehoba ne kwikala na luketekelo lwa bumi bwa myaka ne myaka mu paladisa pano pa ntanda.—Yoano 6:44; Loma 6:23.

6, 7. Yesu waingilanga byepi?

⁶ Byonkatu biji Shanji, Yesu naye watemwa kwingila. Saka akyangye kwiya pano pa ntanda, Yesu ‘wajinga sendwe,’ kino kibena kulumbulula’mba waingijilanga pamo na Shanji pa kulenga bintu bya mwiulu ne bya pano pa ntanda. (Byambo bya Maana 8:22-31; Kolose 1:15-17) Byo aishile pano pa ntanda, Yesu watwajijile kwingila na ngovu. Yesu wafunjile mwingilo wa bukalipentala saka akijitu mwanyike kabiji kyamweka walenganga bipona ne kushimika mazubo. Yesu wajinga sendwe mu uno mwingilo kya kuba batendekele kumutela’mba “kalipentala.”—Mako 6:3.

⁷ Bino mwingilo wanema ye aingijile pano pa ntanda wajinga wa kusapwila mambo awama ne kufunjisha bantu pe Yehoba. Wajinga na myaka isatu ne kichika ya kwingijilamo mwingilo wanji, kabiji waingilanga bingi na ngovu kutendeka lukelo kufika ne mabanga. (Luka 21:37, 38; Yoano 3:2) Yesu waendanga panshi miseke yalepa pa kuba’mba asapwile bantu bavula.—Luka 8:1.

8, 9. Mambo ka Yesu o aingijilanga mingilo yanji na lusekelo?

⁸ Mwingilo wa kusapwila wajingatu nobe kajo kwi Yesu. Uno mwingilo wamulengelanga kwikala na bulume. Bimye bimo, Yesu waingilanga bingi na ngovu kya kuba kechi waikalanga ne na kimye kya kuja ne. (Yoano 4:31-38) Wamonangapo bimye bya kukwasha bantu kufunda pe Shanji. O ene mambo o alombejile kwi Yehoba amba: “Amiwa nemutumbijika pano pa ntanda, byo napwisha kwingila mwingilo ye mwampele.”—Yoano 17:4.

⁹ Kyamwekeshatu patoka kuba’mba, Yehoba ne Yesu bengila bingi na ngovu kabiji basangalela mu mingilo yabo. Ne atweba twafwainwa ‘kulondelanga Lesa.’ Kabiji twafwainwa ne ‘kulondela bulongo mu ngayo ya kwa Yesu.’ (Efisesa 5:1; 1 Petelo 2:21) O ene mambo o twingijila na ngovu mu mingilo yonse yo twingila.

TWAFWAINWA KUMONANGA BYEPI MINGILO YETU?

10, 11. Ñanyi bintu byafwainwa kwitulengela kutemwa nkito yo twingila?

¹⁰ Byo tuji bantu ba Yehoba, twingila na ngovu pa kuba’mba tumwene ba mu kisemi kyetu ne atweba bene. Tukeba kusangalela mu mingilo yetu, pano bino kyakatazha bingi. Pano twakonsha kuba byepi inge kechi tusangalela mu mingilo yo twingila ne?

¹¹ Temwai nkito yenu. Kechi twakonsha kupimpula nkito yetu nangwa ko twingijila ne. Pano bino, twakonsha kupimpula byubilo byetu. Kyanema bingi kuyuka Yehoba byo akeba’mba tubenga. Akilangulukai pa kino: Yehoba wapa mwingilo mutwe wa kisemi kukebela kisemi kyanji byo bakeba. Kabiji Baibolo waamba’mba awa ubula kukebela ba mu kisemi kyanji “watama kukila yewa wabula kwitabila.” (1 Timoti 5:8) Inge mwi mutwe wa kisemi, mwafwainwa kwingilanga na ngovu kukebela ba mu kisemi kyenu. Inge mwatemwa nkito yo mwingila nangwa ne, mwafwainwa kutwajijila kwingila mambo imukwasha kukebela kisemi kyenu, kabiji kuba bino kutokesha Yehoba ku muchima.

12. Tumwenamo byepi mu kwikala bakishinka ne kwingila na ngovu?

¹² Ingilainga na ngovu ne kwikala bakishinka. Kuba bino kwakonsha kwimulengela kutemwa nkito yo mwingila. (Byambo bya Maana 12:24; 22:29) Kabiji kino kikalengela mukulumpe wa nkito kwimuketekela. Bakulumpe ba nkito bavula batemwa kutwezha nkito bantu bakishinka, mambo kechi bakonsha kwiba mali nangwa bipe ne, kimye kyonse batatu muchima pa kwingila. (Efisesa 4:28) Kyakilapo kunema, Yehoba umona inge mubena kwingila na ngovu nangwa mwi bakishinka. Mukekala na “jiwi ja mu muchima ja kishinka” mambo mukayuka’mba mubena kutokesha Lesa pa muchima.—Bahebelu 13:18; Kolose 3:22-24.

13. Ñanyi bintu bikwabo byawama byakonsha kufumamo inge twaikala bakishinka pa nkito?

¹³ Byubilo byenu pa nkito bikanemeka Yehoba. Kino ke kishinka kikwabo kyafwainwa kwitulengela kutemwa nkito yo twingila. (Titusa 2:9, 10) Kabiji bantu bo mwingila nabo bakonsha kuswa kwibafunjisha Baibolo na mambo a byubilo byenu byawama.—Tangai Byambo bya Maana 27:11; 1 Petelo 2:12.

ÑANYI NKITO YO NAFWAINWA KUSALA?

14-16. Ñanyi bintu byo twafwainwa kulangulukapo pa kusala nkito?

¹⁴ Baibolo kechi watanchika nkito yafwainwa kutwela mwina Kilishitu nangwa ne. Nangwa byonkabyo, mu Baibolo muji mafunde akonsha kwitukwasha kusala nkito yawama. (Byambo bya Maana 2:6) Onkao mambo, twafwainwa kwingijisha mafunde aji mu Baibolo kwiipuzha mepuzho alondelapo.

¹⁵ Nanchi ino nkito ikandengela kutundaika bintu byashikwa Yehoba nyi? Twisamba pa bintu bimo byashikwa Yehoba, nabiji kwiba ne kwamba bubela. (Kulupuka 20:4; Byubilo 15:29; Efisesa 4:28; Lumwekesho 21:8) Onkao mambo, twafwainwa kuchinuzhuka kutwela nkito yakonsha kwitulengela kulala mizhilo ya Yehoba.—Tangai 1 Yoano 5:3.

¹⁶ Nanchi ino nkito itundaika byubilo byashikwa Yehoba nyi? Mwakonsha kuba byepi inge mwataana nkito ya kutambwila bantu pa kipatela po bafumya mavumo? Kechi kyatama kutambwila bantu babena kwiya na kufumya mavumo ne. Nangwa byonkabyo, mwayuka’mba Yehoba washikwa kufumya jimi. Nangwa kya kuba kechi yenu musa kufumyanga bantu mavumo ne, nanchi kechi mwafwainwa kulanguluka pa byumvwa Yehoba pa kufumya mavumo nenyi?—Kulupuka 21:22-24.

17. Pa kuba’mba tutokeshe Lesa ku muchima, ñanyi bintu byafwainwa kwitukwasha kufuukula bulongo?

¹⁷ Inge ke tube bino, tukekala nobe bantu bo baambapo pa kinembelo kya Bahebelu 5:14 amba, “bonka baji na milangwe yo bafunjisha kuyuka kyawama ne kyatama na mambo a kwiingijisha.” Onkao mambo, mwafwainwa kwiipuzha’mba: ‘Nanchi nkatuntwisha bakwetu inge natwela ino nkito nyi? Nanchi ino nkito ikandengela kusha bena kwami ne baana ne kuya ku kyalo kikwabo nyi? Ba mu kisemi bakomvwa byepi?’

“MUYUKE BINTU BYANEMESHA”

18. Mambo ka o kyakonsha kwitukatezha kutangizhako bya Bufumu mu bwikalo bwetu?

¹⁸ Kyakonsha kwitukatazha bingi kutangizhako bya bufumu mu bino “bimye byakatazha.” (2 Timoti 3:1) Kyakatazha bingi kutaana nkito ne kwiilama. Twayuka kuba’mba twafwainwa kumwena kisemi kyetu. Nangwa byonkabyo, twafwainwa kutangizhako kupopwela Yehoba. Kechi twafwainwa kunemekesha bunonshi mu bwikalo bwetu ne. (1 Timoti 6:9, 10) Onkao mambo, twakonsha kuyuka byepi “bintu byanemesha” kabiji pa kimye kimo ne kukebela kisemi kyetu?—Filipai 1:10.

19. Kuketekela mwi Yehoba kwitukwasha byepi kubula kutwezhamo ne mutwe mu nkito yetu?

¹⁹ Ketekelai mwi Yehoba na muchima wenu yense. (Tangai Byambo bya Maana 3:5, 6.) Twayuka’mba Yehoba wayuka bintu byo tukeba kabiji wituta bingi muchima. (Salamo 37:25; 1 Petelo 5:7) Baibolo witubuula’mba: “Mwikale babula kutemwa mali, sekelainga mu bintu byonka byo muji nabyo. Mambo aye waamba’mba: ‘Kechi nkakusha ne, kabiji kechi nkakulekelela ne.’” (Bahebelu 13:5) Yehoba kechi ukeba’mba twikalenga na bijikila na mambo a kumwena bamu kisemi ne. Yehoba witulaya’mba uketupa byonse byo tukeba. (Mateo 6:25-32) Nangwa kya kuba twingila nkito, bino twafwainwa kwikalangapo na kimye kya kutanga Mambo a Lesa, kusapwila mambo awama ne kupwila.—Mateo 24:14; Bahebelu 10:24, 25.

20. Twakonsha kupeezhako byepi bwikalo bwetu?

²⁰ Ikalai na jiso jazanzatu pa kintu kimo. (Tangai Mateo 6:22, 23.) Kino kilumbulula’mba twafwainwa kupeezhako bwikalo bwetu ne kutatu muchima pa kwingijila Yehoba. Kyakonsha kutama bingi inge twata muchima pa kukebesha kwikala na muzema wa mali, kwikala bwikalo bwa ntentente, nangwa kwikala na bipe bya katataka. Kuba bino kwakonsha kwitulengela kubula kuta muchima pa bulunda bwetu ne Lesa. Ñanyi bintu biketukwasha kutangizhako bintu byanema? Chinuzhukainga kwitwezha mu nkongole. Inge muji na nkongole, mwafwainwa kubwezha bukiji. Inge twabula kujimuka, kukebesha bya ku mubiji kwakonsha kwitujila kimye, bulume bwetu kabiji kyakonsha kwitukatazha kwikala na kimye kya kulomba, kwikala na lufunjisho lwa pa bunke ne kusapwila. Kechi twafwainwa kutabankana mu bwikalo bwetu na mambo a kukeba bya ku mubiji ne. Bino twafwainwa kutondwa na “kajo ne bivwalo.” (1 Timoti 6:8) Onkao mambo, twafwainwa kutwajijila kwipesapesa pa kuba’mba twingijilenga Yehoba papelela bulume bwetu.

21. Mambo ka o twafwainwa kulangulukila pa bintu byo twafwainwa kunemeka mu bwikalo bwetu?

²¹ Tangizhaingako bintu byanema. Twafwainwa kwingijishanga bulongo kimye kyetu, bulume ne bintu byo tuji nabyo. Inge twabula kujimuka, tukata muchima ku bintu byabula kunema nabiji kufunda kufika palepa nangwa kukeba kwikala na muzema wa mali. Bino bintu biketujiilangatu kimye kyetu. Yesu waambile’mba: “Twajijilai na kukeba Bufumu patanshi.” (Mateo 6:33) Byo tufuukula kuba, byubilo byetu, bintu byo tuba pa juba pa juba ne bikonkwanyi byo twibikila byo bimwesha bintu byo twanemeka mu bwikalo bwetu.

MWINGILO WANEMA YE TWAFWAINWA KWINGILA

22, 23. (a) Ñanyi mwingilo wanema ye tuji nanji atweba bena Kilishitu? (b) Ñanyi kintu kyakonsha kwitukwasha kutemwa mwingilo wetu?

²² Mwingilo wanema witupa Yehoba ke kusapwila mambo awama. (Mateo 24:14; 28:19, 20) Twafwainwa kwingilanga papelela bulume bwetu mu uno mwingilo byonka byaubile Yesu. Bamo bafuukulapo kuya na kwingijila kwakepa basapwishi ba Bufumu. Bamo babena kufunda milaka ikwabo pa kuba’mba basapwile ku bantu bamba yewo mulaka. Mwafwainwa kwisamba na baubapo kala bino pa kuba’mba bemubule byo baubile. Bakemubuula bintu byawama byafuminemo bibalengejile kwikala na lusekelo.—Tangai Byambo bya Maana 10:22.

²³ Lelo jino, bantu bavula bengila maola avula bingi ku nkito pa kuba’mba bamwene kisemi kyabo. Vulukainga’mba Yehoba wayuka kino, kabiji usanta bingi pa byo twibikako kumwena kisemi kyetu. Twayai tutwajijile kwingila na ngovu nkito yo twingila byonka byuba Yehoba ne Yesu. Kabiji twafwainwa kuvulukanga’mba mwingilo wanema ke kwingijila Yehoba ne kusapwila mambo awama a Bufumu bwa Lesa. Kuba bino kuketuletela bingi lusekelo.