Kitango 45

Bufumu Bwa Lesa Bo Bu Ka? Byo Tumwesha’mba Twibukeba

NANCHI wiluyuka lulombelo Yesu lo afunjishe baana banji ba bwanga nyi?— Umvwe kechi wiluyuka ne, twakonsha kwilutanga mu Baibolo pa Mateo 6:9-13. Luno lulombelo lutelwa na bavula’mba Lulombelo lwa Nkambo, muji byambo bya kuba’mba: “Bufumu bwenu bufike.” Nanchi Bufumu bwa Lesa wibuyuka nyi?—

Leka nkubule, mfumu ke muntu ulama kyalo nangwa ntanda. Kabiji bukalama bwanji butelwa’mba bufumu. Mu byalo bimo, mukulumpe mu kafulumende utelwa’mba ndamakyalo. Nga kalama wa kafulumende wa Lesa utelwa’mba ka?— Mfumu. Kyo kine kintu kafulumende wa Lesa kyo atelelwa amba Bufumu.

Nanchi wamuyuka Yehoba Lesa ye atongola amba ye ukekala Mfumu mu bufumu bwanji nyi?— Watongola Mwananji, Yesu Kilishitu. Mambo ka Yesu o akijila bamfumu bonse ba panopantanda?— Mambo Yesu watemwa bingi Shanji, Yehoba. Onkao mambo, Yesu kimye kyonse uba bintu byaoloka.

Kala kene Yesu saka akyangye kusemwa mu Betelema ne, Baibolo waambijile jimo pa kusemwa kwanji kabiji waambile’mba ukekala Mfumu wasalwa na Lesa. Twaya tutange kino pa Isaya 9:6, 7. Patangiwa’mba: ‘Mambo kwitusemenwa mwana, twapewa mwana wa mulume; kabiji bundamakyalo bukekala pe aye, ne jizhina janji bejitela’mba: . . . Mfumu wa mutende. Bufumu bwanji bukayanga na kubaya kikupu kabiji mutende ye akaleta kechi ukapwa ne.’

Nanchi wayuka Mfumu wa bufumu bwa Lesa kyo atelelwa’mba “Mfumu” nyi?— Mambo Yesu ye Mfumu wa bufumu bwa Lesa, kyo kine kintu kyo atelelwa amba “Mfumu wa mutende.” Kabiji ke Mwana wa Mwine Mfumu, Yehoba. Yesu bamwikazha kwi Yehoba amba ye Mfumu wa bufumu bwa Lesa, ukalamanga ino ntanda pa myaka kiumbi kimo. (Lumwekesho 20:6) Panyuma ya lubatizhilo lwanji, Yesu watendekele “kusapwila’mba, lapilai mambo bufumu bwa mwiulu bwafwenya ke pepi.”—Mateo 4:17.

Mambo ka Yesu o aambijilenga’mba Bufumu bwafwenya ke pepi?— Mambo Mfumu ukalamanga mwiulu wajinga mukachi kabo! O ene mambo Yesu o aambijile bantu amba: “Bufumu bwa Lesa buji mukachi kenu.” (Luka 17:21) Nanchi kechi wakonsha kutemwa Mfumu wa Yehoba kuba’mba ekale pepi ne obewa kya kuba ke umukwate ne kumukwata nenyi?—

Akimbule, Yesu waishile panopantanda na kwingila ñanyi mwingilo wanema?— Yesu wakumbwile buno bwipuzho, byo aambile’mba: ‘Nafwainwa nsapwile mambo awama a bufumu bwa Lesa ku mizhi ikwabo: mambo kyo kyo natuminwe.’ (Luka 4:43) Yesu wayukile amba kechi wakonsha kwingila mwingilo wa busapwishi bunke bwanji ne. Pano waubilepo byepi?—

Yesu wasajilepo bantu bamo ne kwibabula bya kwingila mwingilo wa busapwishi. Patanshi wakifunjishe batumwa banji 12. (Mateo 10:5, 7) Nanchi Yesu wafunjishetu batumwa banji bonka kwingila uno mwingilo nyi? Ine. Baibolo waamba’mba Yesu wafunjishe bantu bavula bingi bya kusapwila. Kimye kimo, watumine baana ba bwanga 70. Bano baana ba bwanga bafunjishenga bantu amba ka?— Yesu waambile’mba: “Mukebambile’mba, Bufumu bwa Lesa bwimufwenyenya pepi.” (Luka 10:9) Uno mwingilo walengejile bantu kuyuka bufumu bwa Lesa.

Kala mu Isalela, umvwe muntu waikala pa bufumu watentamanga pa mbongolo ne kupitañana mu muzhi na kwiyukanyikisha ku bantu. Byo byaubile ne Yesu byo ayile ku Yelusalema kimye kyapeleleko. Ee, Yesu ye ukekala Mfumu wa Bufumu bwa Lesa. Nanchi bantu baumvwine bulongo amba ekale Mfumu wabo nyi?—

Byo ailenga mu jishinda, kiombe kya bantu kyatendekele kuvula bivwalo bya peulu ne kwibyanshika mu mukwakwa kulutwe yanji. Bakwabo nabo bachimawinenga mabula ne kwiabika mu mukwakwa. Kino kyamwesheshetu patoka’mba bakebelenga Yesu kwikala Mfumu wabo. Baimbilenga na jiwi jikatampe amba: ‘Atotwe Mfumu wiya mu jizhina ja Yehoba.’ Bino kechi bonse baumvwine bulongo ne. Bantangi bamo babupopweshi bamwambijile Yesu amba: ‘Bazhindamikaipo baana benu ba bwanga.’—Luka 19:28-40.

Panyuma ya moba atanu, Yesu bamukwachile ne kumutwala kwi ndamakyalo Pontiusa Pilato. Balwanyi banji baambilenga’mba Yesu ubena kwamba’mba Mfumu kabiji wasatukila bufumu bwa Loma. Onkao mambo, Pilato wamwipwizhe Yesu na mambo a kino. Yesu waambile’mba kechi ubena kukeba kwangata bufumu ne. Wamubujile Pilato amba: “Bufumu bwami kechi bwa panopantanda ne.”—Yoano 18:36.

Pilato walupukile pangye ne kubula bantu amba kechi watanapo kilubo mwi Yesu ne. Pano bino bantu kechi bakebelenga amba Yesu ekale Mfumu wabo ne. Kechi bakebelenga amba bamukasulule ne. (Yoano 18:37-40) Pilato byo abwelele wisamba na Yesu, wataine kuba’mba kechi watamishapo ne. Ko kyakayanga, Pilato wamulupwile Yesu pangye japeleleko ne kwamba’mba: “Talai, Mfumu wenu!” Bino bantu babijikile amba: ‘Mutwalai, mutwalai, kamupopai.’

Pilato waipwizhe’mba: ‘Namupope Mfumu wenu nyi?’ Bañanga bakatampe bakumbwile’mba: “Kechi tuji na mfumu ne, poso yenka Kesala.” Wamona babe bantu kutama! Bañanga batama balengejile bantu kukana Yesu!—Yoano 19:1-16.

Byo kiji ne mu ano moba. Bantu bavula kechi bakeba Yesu kwikala Mfumu wabo ne. Bakonsha kwamba’mba baitabila mwi Lesa, pano bino kechi bakeba Lesa nangwa Yesu kwibabula bya kuba ne. Bakebatu kwiikela na makafulumende abo panopantanda.

Nga atweba kiji byepi? Umvwe twayuka Bufumu bwa Lesa ne bintu byonse byawama byo bukoba, kino kitulengela kubapo byepi?— Kitulengela kutemwa Lesa, ke ibyo nenyi?— Pano twakonsha kumwesha byepi amba kine twatemwa Lesa kabiji tukeba’mba tukalamwenga na bufumu bwanji?—

Twakonsha kuba bino kupichila mu kulonda kya kumwenako kya kwa Yesu. Ñanyi bintu Yesu byo aubile byamwesheshe amba watemwa Yehoba?— Yesu waambile amba: “Mbena kuba bya kumutokesha pa muchima moba onse.” (Yoano 8:29) Ee, Yesu waishile panopantanda ne ‘kuba kyaswa muchima wa Lesa’ ne “kupwisha mwingilo wanji.” (Bahebelu 10:7; Yoano 4:34) Akimona byaubile Yesu saka akyangye kutendeka mwingilo wanji wa kusapwila.

Yesu wayile kwi Yoano Mubatishi ku Mukola wa Yodano. Byo baendeleko pacheche saka baji mu mema, Yoano wamutumpikile Yesu mu mema wabwela wa mutumpulamo. Nanchi wayuka Yoano kyo a mubatizhizhe Yesu nyi?—

Yesu waambijile Yoano amba amubatizhe. Pano twayuka byepi amba Lesa wakebelenga’mba Yesu abatizwe?— Twayuka kino mambo Yesu byo atuntukile mu mema, waumvwine jiwi kufuma mwiulu amba: “Yobe mwanami, ye natemwa, mo namwena lusekelo.” Lesa watumine mupashi wazhila wamwekelenga nobe nkunda waikijile pe Yesu. Ee, panyumatu ya lubatizhilo lwanji, Yesu wamwesheshetu patoka’mba ubena kukeba kuba kyaswa muchima wa Yehoba mu bwikalo bwanji bonsetu.—Mako 1:9-11.

Obewa ukijitu mwanyike. Inge wakoma ukobanga ka?— Abya ukalonda kya kumwenako kya kwa Yesu ne kubatizwa nyi?— Wafwainwa kumulonda, mambo Baibolo waamba’mba wakushila mwakulondela ‘ulonde monka mu ngayo yanji.’ (1 Petelo 2:21) Umvwe wabatizwa, ukamweshatu patoka’mba ubena kukeba kulamwa na Bufumu bwa Lesa. Pano bino lubatizhilo kechi kyo kyonkatu kikebewa ne.

Twafwainwa kumvwinanga byonse byafunjishanga Yesu. Yesu waambile amba kechi ‘twi ba panopantanda’ ne. Umvwe ke tube bintu bya ino ntanda ko kuba’mba tubena kumukokela nyi? Yesu ne batumwa banji kechi baubanga bintu bya panopantanda ne. (Yoano 17:14) Pano nanchi baubanga ka?— Babulangako bakwabo Bufumu bwa Lesa. Banemekele bingi uno mwingilo mu bwikalo bwabo. Netuwa twakonsha kuba bino nyi?— Ee, twakonsha umvwe ke tube bintu kwesakana na byo tulomba amba Bufumu bwa Lesa bufike.

Pa kuba’mba tumweshe amba tukeba Bufumu bwa Lesa kufika, tanga bino binembelo umone byo byaamba: Mateo 6:24-33; 24:14; 1 Yoano 2:15-17; ne 5:3.

[Kipikichala pa jipa 232, 233]

Yesu waishile na kwingila ñanyi mwingilo panopantanda?

[Bipikichala pa jipa 235]

Mambo ka bantu baambilenga amba Yesu ye mfumu wabo kyo bamukanyijile palutwe kacheche?

[Kipikichala pa jipa 236]

Mambo ka Yesu o abatizhijilwe, kabiji Lesa wamwesheshe byepi amba wamwenamo lusekelo?

[Bipikichala pa jipa 237]

Kwepi ko twakonsha kwambanga ku bakwetu pa mambo a Bufumu bwa Lesa?