Nanchi Mukeba Kuyuka Bukine Nyi?

BUKINE bwaamba pa ka? Bwaamba pa mikumbu ya mepuzho amo anema bingi bantu o bepuzha javula. Kampe ne anweba mwakiipuzhapo kala pa mepuzho amo nabiji ano a kuba’mba:

• Nanchi Lesa kine wituta muchima nyi?

• Nanchi makondo ne buyanji bikapwa nyi?

• Nanchi tuwajijila kwikala bimo umvwe twafwa ny?

• Ñanyi luketekelo lo tuji nalo pa bantu bafwa?

• Nakonsha kulomba byepi pa kuba’mba Lesa omvwe milombelo yami?

• Nakonsha kuba byepi pa kuba’mba ngikale na lusekelo?

Kwepi ko mwakonsha kutaana mikumbu ya ano mepuzho? Umvwe mwashikisha bantu, bakonsha kwimubuula mikumbu yapusana pusana. Nangwatu umvwe mwashikisha aba baya ku machechi nangwa bantangi ba bupopweshi, napotu mikumbu yo bakemubula kechi ikomvwanyika ne. Mikumbu imo yakonsha kumvwanyika nobe ya kine pa kakimye kacheche, bino pakupitapo kimye mwakonsha kutaana’mba ya bubela.

Pano bino, kujitu buku umo uji na mikumbu yo mwakonsha kuketekela. Uno ke buku muji bukine. Yesu Kilishitu waambile kwi Lesa amba: “Byambo byenu bo bukine.” (Yoano 17:17) Lelo jino twayuka kuba’mba bino byambo biji mu Baibolo Wazhila. Pa mapa alondelapo, paji mikumbu imo ya mu Baibolo yaumvwanyika bulongo, yakumbula mepuzho aji peulupo.

Nanchi Lesa Kine Wituta Muchima Nyi?

ENE MAMBO BANTU O BEPWIZHA BUNO BWIPUZHO: Tubena kwikala mu ntanda muji bantu bakanama ne ba nshiji. Bupopweshi bwavula bufunjisha’mba kyo kyaswa muchima wa Lesa kuba’mba bantu bayandenga.

BAIBOLO BYO AFUNJISHA: Lesa kechi ye ulengela bintu byatama kubiwa ne. Yoba 34:10 waamba’mba: “Lesa wa kine kechi uba bubi nangwa pachechetu ne, Wa Bulume Bonse kechi uba bintu byatama ne!” Lesa ukeba’mba bantu bekalenga bulongo. O ene mambo Yesu o etufunjishe kulomba’mba: “Tata wetu wa mwiulu,. . . Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:9, 10) Lesa wituta bingi muchima kya kuba waubapo ne kintu kimo kikatampe, kikalengela byo akebelenga kufika.​—Yoano 3:16.

Monai ne Ntendekelo 1:26-28; Yakoba 1:13; ne 1 Petelo 5:6, 7.

Nanchi Makondo ne Buyanji Bikapwa Nyi?

ENE MAMBO BANTU O BEPWIZHA BUNO BWIPUZHO: Bantu bavula babena kufwa bingi mu makondo. Atweba bonse tubena kuyanda bingi.

BAIBOLO BYO AFUNJISHA: Lesa walaya kimye kyo akaleta mutende pano pa ntanda ponse. Mu Bufumu bwanji, bantu “kechi bakafunda kulwa nkondo jibiji ne.” Pakuba “bakabundanga mapoko abo ne kwialula ke bya kujimako.” (Isaya 2:4) Lesa ukafumyapo nshiji yonse ne buyanji. Baibolo walaya’mba: “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala [kuvwangakotu nshiji ne kumanama ko tupitamo lelo jino] byapichijila.”​—Lumwekesho 21:3, 4.

Monai ne Salamo 37:10, 11; 46:9; ne Mika 4:1-4.

Nanchi Tuwajijila Kwikala Bimo Umvwe Twafwa Ny?

ENE MAMBO BANTU O BEPWIZHA BUNO BWIPUZHO: Bupopweshi bwavula mwaya ntanda bufunjisha’mba umvwe muntu wafwa, mupashi uji mukachi kanji kechi ufwa ne. Bamo nabo baitabila’mba bafwa bakonsha kukatazha bantu bomi kabiji ne kuba’mba Lesa uyanjisha bantu batama mu mujilo wa helo mo bapya myaka ne myaka.

BAIBOLO BYO AFUNJISHA: Umvwe bantu bafwa, kechi bekalako jibiji ne. Musapwishi 9:5 waamba’mba, “Bantu bafwa kafwako kintu nangwa kimo kyo bayuka ne.” Byo kiji kuba’mba bantu bafwa kechi bakonsha kuyuka nangwa kumvwa kintu ne, ko kuba’mba kechi bakonsha kukatazha bantu bomi nangwa kwibakwasha ne.—Salamo 146:3, 4.

Monai ne Ntendekelo 3:19 ne Musapwishi 9:6, 10.

Ñanyi Luketekelo lo Tuji Nalo pa Bantu Bafwa?

ENE MAMBO BANTU O BEPWIZHA BUNO BWIPUZHO: Tukeba kwikala bomi ne kwikala bwikalo bwa bwawama na balunda netu. Tubena kutonga bingi kukamonañana jibiji na balongo ne balunda netu bafwa.

BAIBOLO BYO AFUNJISHA: Bantu bavula bafwa bakasangulwa. Yesu walayile’mba, aba ‘baji mu bilende . . . bakafumamo.’ (Yoano 5:28, 29) Kwesakana na byakebelenga Lesa mu ntendekelo, aba bo bakasangula bakekalanga mu paladisa pano pa ntanda. (Luka 23:43) Umvwe kino kimye kikafike, bantu ba lukookelo bakekala myaka ne myaka na butuntulu bwa mubiji bwawama. Mambo Baibolo waamba’mba: “Baoloka bakaswana ntanda, kabiji bakekalangamo myaka ne myaka.”—Salamo 37:29.

Monai ne Yoba 14:14, 15; Luka 7:11-17; ne Byubilo 24:15.

Nakonsha Kulomba Byepi pa Kuba’mba Lesa Omvwe Milombelo Yami?

ENE MAMBO BANTU O BEPWIZHA BUNO BWIPUZHO: Bantu ba mu bupopweshi bonse balomba. Pano bino, bantu bavula bamba’mba Lesa kechi ukumbula milombelo yabo ne.

BAIBOLO BYO AFUNJISHA: Yesu witufunjishe’mba kechi twafwainwa kubwezha bwezhangapotu byambo bimo mu milombelo yetu ne. Waambile’mba “Pa kulomba, kange mwambengatu bintu bimo” ne. (Mateo 6:7) Umvwe tukeba Lesa kumvwa milombelo yetu, twafwainwa kulomba kwesakana na byo akeba. Pa kuba’mba tube bino, twafwainwa kuyuka kyaswa muchima wa Lesa ne kulomba monka mokyaila. 1 Yoano 5:14 waamba’mba: “Kintu kyonse kyo twakonsha kumulomba mwayila kyaswa muchima wanji, aye [Lesa] witumvwa.”

Monai ne Salamo 65:2; Yoano 14:6, 14; ne 1 Yoano 3:22.

Nakonsha Kuba Byepi pa Kuba’mba Ngikale na Lusekelo?

ENE MAMBO BANTU O BEPWIZHA BUNO BWIPUZHO: Bantu bavula balanguluka’mba mali, kuya nkuwa nangwa buuya byo bintu byakonsha kwibaletela lusekelo. Nangwa byonkabyo, umvwe baikala na bino bintu kechi bekala na lusekelo ne.

BAIBOLO BYO AFUNJISHA: Yesu watongwele kintu kine kilengela kwikala na lusekelo byo aambile’mba: “Bo ba lusekelo aba baji na muchima wa kukeba kuyuka Lesa.” (Mateo 5:3) Twakonsha kwikala na lusekelo umvwe twapwisha nzala ya ku mupashi ya kukeba kuyuka bukine bwa Lesa ne byo akeba kwi atweba. Buno bukine buji mu Baibolo. Kuyuka buno bukine kwakonsha kwitukwasha kuyuka kintu kyanema ne kyabula kunema. Umvwe ketutangijilwe na bukine buji mu Baibolo pa kukeba kuba bintu, tukekala bwikalo bwawama.​—Luka 11:28.

Monai ne Byambo bya Maana 3:5, 6, 13-18 ne 1 Timoti 6:9, 10.

Ino ke mikumbu ichechetu yafuma mu Baibolo, wakumbula ano mepuzho atanu na bumo. Nanchi mukeba kuyukilapo ne ikwabo nyi? Umvwe ne anweba muji pa boba “baji na muchima wa kukeba kuyuka Lesa,” ko kuba’mba mukeba kuyukilapo ne ikwabo. Mwakonsha kulanguluka ne pa mepuzho akwabo nabiji akuba’mba: ‘Umvwe Lesa waji wituta muchima, mambo ka o aswishisha bubi ne buyanji kuvujilangakotu? Nakonsha kuba byepi pa kuba’mba kisemi kyami kikale kya lusekelo?’ Baibolo wakumbula ano mepuzho ne mepuzhotu akwabo avula.

Pano bino, bantu bavula lelo jino kechi bakeba kutanga Baibolo ne. Bamumona’mba buku wabaya bingi kabiji wakatazha kumvwa. Nanchi mwakonsha kutemwa kwimukwasha kuyuka bya kutaana mikumbu mu Baibolo nyi? Bakamonyi ba kwa Yehoba bapana bintu bibiji byakonsha kwimukwasha kuyuka bya kutaana mikumbu.

Kitanshi, buku wa Nanchi Baibolo Kine Ufunjisha’mba Ka? wanembelwa kukwasha bantu bapayankana kutana mikumbu ya mepuzho anema. Kya bubiji ke kufunda Baibolo pa nzubo yenu. Kamonyi wa kwa Yehoba wikala konka ku mpunzha ko mwikela wayuka kufunjisha, wakonsha kwiyanga ku nzubo yenu nangwa ku mpuzha ikwabo ko mwanengezha kwisamba nenu Baibolo mu kakimyetu kacheche kwa kubula kwimulipilisha. Bantu bavula mwaya ntanda bamwenamo bingi mu luno lunengezho. Bavula bamba’mba: “Natana bukine!”

Kafwako kintu kyanema kyo mukatana kyakila pa kufunda Baibolo ne. Bukine buji mu Baibolo bwitukasulula ku bingelekezha, bintu bivulañanya maana ne ku moyo wa kuchina bintu. Bwitulengela kwikala na luketekelo, kuyuka kyo twafwainwa kubanga mu bwikalo ne kwikala na lusekelo. Yesu waambile’mba: “Mukayuka bukine, ne bukine bukemukasulula.”​—Yoano 8:32.