Nanchi Kine Mambo Awama Afuma kwi Lesa Nyi?

1. Ñanyi Mwine mwina Baibolo?

Mambo awama a kuba’mba bantu bakekala na bumi bwa myaka ne myaka pano pa ntanda aji mu Baibolo. (Salamo 37:29) Mu Baibolo muji mabuku 66. Lesa waingijishe bantu bakishinka 40 kunemba ano mabuku. Mabuku atanshi atanu anembele Mosesa, papita ne myaka nobe 3,500. Buku wapelako wanembelwe na mutumwa Yoano, papita ne myaka kukila pa 1,900. Banembi ba Baibolo banembele milanguluko ya kwa ñanyi? Lesa waambanga na banembi ba Baibolo kupichila mu mupashi wanji wazhila. (2 Samwela 23:2) Banembele milanguluko ya Lesa kechi yabo ne. Onkao mambo, Yehoba ye Mwine mwina Baibolo.—Tangai 2 Timoti 3:16; 2 Petelo 1:20, 21.

2. Twakonsha kushiinwa byepi amba biji mu Baibolo bya kine?

Twayuka kuba’mba Baibolo wafuma kwi Lesa mambo waambila jimo bintu byonse bikamweka kulutwe. Kafwako muntu wakonsha kwamba bikamweka kulutwe ne. (Yoshua 23:14) Lesa Wabulume bonse ye yenkatu wakonsha kuyuka bikamwekela bantu kulutwe.—Tangai Isaya 42:9; 46:10.

Buku wafuma kwi Lesa wafwainwa kupusanako byonka byo aji. Ma Baibolo beasampanya mu milaka yapusana pusana kabiji avula bingi. Baibolo nangwa kya kuba buku wa kala, wakwatankana bingi na sayansi. Kabiji bonse banembi 40 kechi bekasa ne kwikasulula mu byo banembele ne.a Kikwabo, Baibolo umwesha’mba Lesa ye yenkatu uji na butemwe bwa kine, kabiji Baibolo uji na bulume bulengela bantu kwikala na byubilo byawama. Bino bishinka byatongolwa byashiina bantu bavula kuba’mba Baibolo kine Mambo a Lesa.—Tangai 1 Tesalonika 2:13.

3. Nanchi Baibolo waamba pa ka?

Baibolo waamba pa mambo awama a kuba’mba Lesa ukeba’mba bantu bekalenga bulongo. Binembelo byalumbulula byataikile jishuko ja kwikala mu paladisa pano pa ntanda kuntendekelo ya bwikalo bwa bantu ne byo ikabwela kulutwe na lwendo.—Tangai Lumwekesho 21:4, 5.

Mu Mambo a Lesa muji mizhilo, mafunde ne lujimuno. Kabiji muji ne mashimikila a byaubile Lesa na bantu bisolola muchima wanji byo aji. Onkao mambo, Baibolo wakonsha kwimukwasha kuyuka Lesa bulongo. Kabiji walumbulula ne byo mwakonsha kwikala balunda nanji.—Tangai Salamo 19:7, 11; Yakoba 2:23; 4:8.

4. Mwakonsha kumvwisha byepi biji mu Baibolo?

Uno buloshuwa usakwimukwasha kumvwisha biji mu Baibolo kupichila mu kwingijisha jishinda ja kwa Yesu. Yesu watanganga ne kulumbulula “mwatala Binembelo.”—Tangai Luka 24:27, 45.

Kafwako kintu kikizha muchima nobe mambo awama afuma kwi Lesa ne. Nangwa byonkayo, bantu bamo beashikwa bingi, kabiji bamo bazhingila ne kuzhingila inge beomvwa. Kubwela panyuma ne. Luketekelo lwenu lwa kwikala myaka ne myaka lwaimena pa kuyuka Lesa.—Tangai Yoano 17:3.