Kitango 2

Nkalata Yafuma Kwi Lesa Wa Butemwe

BUKU ka ye watemwisha?— Baana bamo bakonsha kusala yewa waamba pa banyama. Bakwabo bakonsha kusala uji na bipikichala byavula mukachi. Ano mabuku awama bingi kwiatanga.

Pano bino mabuku awama kukila onse ke oa etubula Lesa byo aji. Buku umo wanema bingi kukila akwabo. Nanchi wamuyuka uno buku nyi?— Ke Baibolo.

Mambo ka Baibolo kyo anemena?— Mambo ke buku wafuma kwi Lesa. Witubula biji Lesa ne bintu byawama byo aketubila. Kabiji witubula ne byo twafwainwa kuba pa kuba’mba tumutokeshe pa muchima. Uji nobe nkalata yafuma kwi Lesa.

Lesa umvwe wakebelenga, inge wanembele Baibolo yense mwiulu ne kumupana ku bantu. Pano bino, kechi byo byo aubile ne. Nangwa kya kuba milanguluko yafumine kwi aye mwine Lesa, waingijishe bakalume banji panopantanda kunemba Baibolo.

Lesa waubile byepi kino?— Pa kuba’mba tumvwishe byo aubile, akimona kino kya kumwenako. Kimye kyo tumvwa muntu saka amba pa waileshi, jiwi ja yewo muntu jakonsha kufuma palepa bingi. Kimye kyo tutamba televizhonyi, twakonsha ne kumona bipikichala bya bantu ba mu byalo bikwabo mwaya ntanda, kabiji twakonsha kumvwa ne byo babena kwamba.

Bantu bakonsha kwenda musinso walepa bingi kuya ku ñondo na madeke, kabiji bakonsha kwambañana na bantu baji panopantanda. Nanchi wayuka amba kino kyubiwa nyi?— Umvwe bantu bakonsha kuba bino, nanchi Lesa wakonsha kwamba sa aji mwiulu nyi?— Ee wakonsha! Waubile bino kala kene bantu saka bakyangye kwikala na mawaileshi ne matelevizhonyi.

Mosesa waumvwine Lesa saka amba. Bino kechi wamwene Lesa ne, waumvwinekotu jiwi janji. Kino kyaubiwe saka paji bantu bavula. Pa jino juba Lesa walengejile mutumba yense kusunkena, kabiji kwajinga kubesha ne kutatauka kwa mvula. Bantu bayukile’mba Lesa ye waambilenga, pano bino baumvwine bingi moyo. Bamwambijile Mosesa amba: “Aye Lesa kechi etwambile ne, twakafwa.” Palutwe kacheche, Mosesa wanembele bintu byaambile Lesa. Bintu byo anembele biji mu Baibolo.—Kulupuka 20:18-21.

Mosesa ye wanembele mabuku atanshi atanu aji mu Baibolo. Pano bino, kechi ye yenkatu wanembele mabuku aji mu Baibolo ne. Lesa waingijishe banabalume 40 kunemba mabuku onse aji mu Baibolo. Bano banabalume bajingako kala kene, kabiji papichile myaka yavula bingi pa kuba’mba Baibolo yense apwe kunembwa. Ee, papichile nobe myaka 1,600! Ke kya kukumya bingi mambo bano banabalume bamo kechi bamonañenepo ne, pano bino byonse byo banembele bijitu pamo.

Banabalume bamo bo aingijishe Lesa kunemba Baibolo bayukanyikilwe bingi. Nangwa kya kuba Mosesa wajinga kafunga, waikele ke ntangi wa mukoka wa bena Isalela. Solomone wajinga mfumu wa maana kabiji wajinga munonshi kukila bonse panopantanda. Bino banembi bakwabo kechi bayukanyikilwe ne. Amosi walamanga bichi bya mikuyu.

Nembi umo wa Baibolo wajinga ñanga nangwa’mba dokotala. Nanchi wamuyuka nyi?— Wajinga Luka. Nembi mukwabo wajinga musonkeshi. Jizhina janji wajinga Mateo. Kabiji mukwabo wajinga shayuka mu mizhilo ya bupopweshi bwa Bayudea. Wanembele mabuku avula bingi a mu Baibolo kukila bakwabo. Nanchi wamuyuka nyi?— Wajinga Paulo. Kabiji baana ba bwanga ba kwa Yesu abo ba Petelo ne Yoano banembeleko Baibolo nabo bakwatanga masabi.

Bano banembi ba Baibolo banembelenga bintu bikoba Lesa. Pano bebiyukile byepi bino bintu saka bikyangye nangwa kubiwatu ne?— Lesa ye wibabujilenga. Wibabujile bintu bikamweka.

Yesu, Mufunjishi Wayukisha byo ajinga panopantanda, mabuku avula mu Baibolo ajinga saka anembwa kala. Vuluka kuba’mba, Mufunjishi Wayukisha wakijinga mwiulu. Wayukile bintu byaubile Lesa. Nanchi waitabile’mba Baibolo wafuma kwi Lesa nyi?— Ee.

Kimye Yesu kyo aambilenga ku bantu pa mingilo ya Lesa ya kukumya, watangilenga mu Baibolo. Kimye kimo waambangatu kwakubula nangwa kutanga ne. Kabiji Yesu wituletejile byambo byavula kufuma kwi Lesa. Waambile’mba: “Byonka byo naumvwine kwi aye, byo byo ñamba ku ba panopantanda.” (Yoano 8:26) Yesu waumvwine bintu byavula kwi Lesa mambo waikele ne Lesa. Bino bintu byaambile Yesu twakonsha kwibitanga pi?— Mu Baibolo. Wanembejilwe atweba kuba’mba tumutangenga.

Lesa byo aingijishe bantu kunemba Baibolo, bamunembele mu mulaka waambiwanga pa kyokya kimye. O ene mambo mabuku avula bingi mu Baibolo kyo anembejilwe mu Kihebelu, akwabo mu Kialamaika, kabiji akwabo nao mu Kingiliki. Mambo a kuba ano moba bantu bavula kechi bayuka kutanga ino milaka ne, Baibolo watuntululwa mu milaka ikwabo. Ano moba, mabuku amo mu Baibolo atuntululwa mu milaka kukila pa 2,260. Akimona milaka byo yavula! Baibolo ke nkalata ya Lesa yanembelwa bantu bonsetu. Nangwa kya kuba Baibolo watuntululwa mu milaka yavula bingi, bino byambo bijimo byafuma kwi Lesa.

Bintu byaambiwa mu Baibolo byanema bingi kotuji. Baibolo wanembelwe kala kene. Pano bino witubula bintu bibena kumweka ano moba. Kabiji witubula bikoba Lesa kulutwe na lwendo. Bintu byo aamba bitusangajika bingi! Baibolo witulengela kwikala na luketekelo.

Kabiji Baibolo witubula Lesa byo akeba’mba twikalenga. Witubula bintu byawama ne byatama. Obewa ne amiwa twafwainwa kwibiyuka bino bintu. Baibolo witubula bantu baubile bintu byatama ne bibamwekejile kuba’mba tubule kupita mu makatazho o bapichilemo. Kabiji witubula bantu baubile byawama ne byafuminemo. Bino byambo byonse byanembejilwe kuba’mba bitukwashenga.

Bino pa kuba’mba tumwenemo byavula mu Baibolo, twafwainwa kuyuka mukumbu wa buno bwipuzho. Bwipuzho ke buno: Ñanyi witupele Baibolo? Wakonsha kukumbula’mba ka?— Ee, Baibolo wafuma kwi Lesa. Pano bino twakonsha kumwesha byepi amba tuji na maana?— Umvwe ketumvwine Lesa ne kuba bintu byo amba.

Onkao mambo, twafwainwa kwikala na kimye kya kutanganga Baibolo. Umvwe twatambwila nkalata kufuma ku mukwetu ye twatemwisha, twiitanga bimye byavula bingi. Yanema bingi kwi atweba. Ee, byo byo twafwainwa ne kunemeka Baibolo mambo ke nkalata yafuma ku muntu witutemwa bingi. Ke nkalata yafuma kwi Lesa.

Pano tanga bino binembelo bimwesha’mba Baibolo kine Byambo bya Lesa, byanembelwe kwitufunjisha: Loma 15:4; 2 Timoti 3:16, 17; ne 2 Petelo 1:20, 21

[Bipikichala pa jipa 17]

Twayuka byepi amba Lesa wakonsha kwamba ne atweba kufuma ntanda bula?

[Bipikichala pa jipa 19]

Abe banembi ba Baibolo mazhina abo bañanyi?

[Kipikichala pa jipa 20]

Bintu ka byo wakonsha kufunda umvwe ke utange Baibolo?