Kitango 4

Lesa Uji Na Jizhina

UMVWE wamonañana na muntu kimye kitanshi, patanshi umwipuzha’mba ka?— Wipuzha jizhina janji. Bonse tuji na mazhina. Lesa ye watumbile jizhina ja muntu mutanshi panopantanda. Wamutumbile’mba Adama. Muka Adama watumbilwe’mba Evwa.

Pano bino bantu kechi bo bonkatu baji na mazhina ne. Akilanguluka bintu bikwabo biji na mazhina. Umvwe muntu wa kupa ka kilubi nangwa ka kabwa, nanchi kechi wikatumba jizhina nenyi?— Ee, kyanema bingi kwikala na jizhina.

Inge utale mwiulu bufuku, usakumona tubangabanga twavula bingi. Nanchi tubangabanga tuji na mazhina nyi?— Ee, Lesa witutumba mazhina tonse. Baibolo waamba’mba: ‘Ye ubala tubangabanga; ne kwitutumba mazhina ato.’—Salamo 147:4.

Ñanyi muntu wakilamo kunema pa bilengwa byonse?— Ee, Lesa ye wakilamo. Nanchi wayuka’mba uji na jizhina nyi?— Yesu waambile’mba Lesa uji na jizhina. Yesu byo alombelenga kwi Lesa waambile’mba: ‘Ne jiyukisha jizhina jenu ku baana bami ba bwanga.’ (Yoano 17:26) Nanchi wijiyuka jizhina ja Lesa nyi?— Lesa aye mwine witubula jizhina janji. Waamba’mba: “Amiwa ne Yehoba, ajo jo jizhina jami.” Onkao mambo, jizhina ja Lesa ke YEHOBA.—Isaya 42:8.

Umvwa byepi umvwe bakwenu bavuluka jizhina jobe?— Umvwa bulongo ke ibyo nenyi?— Yehoba naye ukeba bantu kuyuka jizhina janji. Onkao mambo, umvwe tubena kwamba pe Lesa, twafwainwa kwingijishanga jizhina janji ja Yehoba. Pa kwamba na bantu, Mufunjishi Wayukisha waingijishe jizhina ja Lesa, Yehoba. Kimye kimo, Yesu waambile’mba: “Ukamutemwa Nkambo [Yehoba, NW] Lesa wobe na muchima wobe yense.”—Mako 12:30.

Yesu wayukile’mba “Yehoba” ke jizhina janema bingi. Onkao mambo, wafunjishe baana banji ba bwanga kwingijisha jizhina ja Lesa. Wibafunjishe ne kwamba pa jizhina ja Lesa mu milombelo yabo. Yesu wayukile’mba Lesa ukeba bantu bonse kuyuka jizhina janji ja Yehoba.

Kala kene, Lesa wamwesheshe buneme bwa jizhina janji kwi Mosesa mwina Isalela. Bena Isalela bajinga mu kyalo kya Ijipita. Bantu baikalanga mu kino kyalo batelwanga’mba bena Ijipita. Bena Ijipita balamine buzha bena Isalela kabiji bebayanjishanga bingi. Mosesa byo akomene, waesekele kukwasha mulongo wanji. Kuba bino kwalengejile Felo mfumu wa Ijipita kuzhingila. Wakebelenga kumwipaya Mosesa! Kino kyalengejile Mosesa kunyema ne kufumamo mu Ijipita.

Mosesa wayile ku kyalo kikwabo. Kyajinga kyalo kya Mijanyi. Ku Mijanyi, Mosesa wasongwele ne kutendeka kusema baana. Kabiji waikele ke kafunga, saka alama jitanga. Juba jimo, Mosesa walabamine na kufunga mikooko kwipi na mutumba ko amwene kintu kya kukumya. Wamwene kipuupu kya miba saka kitema mujilo, bino ne kupya ne! Mosesa wayile pa bwipi amba amweshe bulongo.

Nanchi wayuka kyamwekele nyi?— Mosesa waumvwine jiwi kufuma monka mu kipuupu kyatemenenga mujilo. Waumvwine jiwi saka jita amba, “Mosesa! Mosesa!” Ñanyi waambilenga bino byambo?— Lesa ye waambilenga! Lesa wajinga na mingilo yavula yo akebelenga’mba Mosesa engile. Waambile’mba: ‘Twaya nkutume kwi Felo, mfumu wa Ijipita, namba ukafumye bantu bami, bena Isalela mu Ijipita.’ Lesa walaile Mosesa amba ukamukwasha byo akobanga bino.

Mosesa wamwambijile Lesa amba: ‘Byo nkafika ku bena Isalela mu Ijipita ne kwibambila’mba Lesa wantuma ko muji, kabiji ne abo bakañambila’mba, “Jizhina janji ye ñanyi?” Nkebabula’mba ka?’ Lesa waambijile Mosesa kubula bena Isalela amba: ‘Yehoba ye wantuma ko muji, kabiji wañambila’mba Yehoba jo jizhina janji myaka ne myaka.’ (Kulupuka 3:1-15) Kino kilumbulula’mba jizhina ja Yehoba ke ja myaka ne myaka. Kechi ukejipimpula ne. Lesa wakebelenga kuyukanyikilwa ku jizhina janji ja Yehoba myaka ne myaka.

Mosesa byo abwelele ku Ijipita, bena Ijipita balangulukilenga’mba Yehoba ka lesa ka bena Isalela kwapwa. Kechi balangulukilepo’mba ye Lesa wa ntanda yonse ne. Onkao mambo, Yehoba waambijile mfumu wa Ijipita amba: ‘Mbena kulenga jizhina jami jitumbalale ne monse mwapela ntanda.’ (Kulupuka 9:16) Ee, Yehoba walengejile jizhina janji kutumbalala. Nanchi wayuka byo aubile nyi?—

Waambijile Mosesa kutangijila bena Isalela kufuma mu Ijipita. Byo bafikile ku Kalunga Kachila, Yehoba wafungile mema kuku ne kuku, ne kusha mushiji wauma. Bena Isalela baabukile Kalunga ka mema pa mushiji wauma. Pano Felo ne nzhita yanji nabo byo batendekele kwabuka pa mushiji wauma, mema aimene mulumbulumbu ebapomokejile kabiji bonsetu bafwile.

Palutwe kacheche, bantu bonse mwaya ntanda batendekele kumvwa byaubile Yehoba pa Kalunga Kachila. Twayuka byepi amba baumvwine kino kintu kyaubiwe?— Byo papichile myaka 40, bena Isalela bafikile mu Kenana, kyalo Yehoba kyo alaile’mba ukebapa. Lehaba waambijile banabalume babiji bena Isalela amba: “Twaumvwa mambo a Yehoba byo aumishe mema a Kalunga Kachila palutwe yenu, byo mwafumine mu Ijipita.”—Yoshua 2:10.

Ano moba bantu bavula bajitu byonka byajinga bena Ijipita. Kechi baitabila’mba Yehoba ye Lesa wa ntanda yonse ne. Onkao mambo, Yehoba ukeba bantu banji kwamba pe aye ku bakwabo. Byo byaubile ne Yesu. Ku mpelo ya bumi bwanji panopantanda, wabujile Yehoba mu lulombelo amba: “Amiwa ne bayukisha jizhina jenu.”—Yoano 17:26.

Nanchi ukeba kwikala nobe Yesu nyi? Ne obewa wafwainwa kubulanga bakwenu amba jizhina ja Lesa ye Yehoba. Ukatana kuba’mba bantu bavula kechi bejiyuka ne. Onkao mambo, wakonsha kwibamwesha kinembelo kya Salamo 83:18 mu Baibolo. Tola Baibolo tutange kino kinembelo. Patangiwa bino’mba: “Namba, bayuke amba, Anweba yenka, wa jizhina ja Yehoba, Yenu Mwine Wakila wa panopantanda ponse.”

Tufundapo ka pa kino kinembelo kyo twatanga?— Ee, tufunda kuba’mba jizhina ja Yehoba janema bingi kukila mazhina onse. Ke jizhina ja Lesa wa Bulume bonse, Shanja Yesu kabiji ye walengele bintu byonse. Kabiji Yesu waambile’mba twafwainwa kumutemwa Yehoba Lesa na muchima wetu yense. Nanchi wamutemwa Yehoba nyi?—

Twakonsha kumwesha byepi amba twamutemwa Yehoba?— Umvwe twaikala balunda nanji. Kabiji umvwe ke tubuleko bakwetu jizhina janji. Twakonsha kwibamwesha jizhina ja Yehoba mu Baibolo. Kabiji twakonsha kwibabula bintu bya kukumya byalenga Yehoba ne bintu byawama byo auba. Kino kimusangajika bingi Yehoba mambo ukeba bantu kumuyuka. Twakonsha kubanga bino, ke ibyo nenyi?—

Kechi bantu bonse bakeba kuteleka umvwe ke twambe pe Yehoba ne. Nangwatu kimye Yesu, Mufunjishi Wayukisha kyo aambilenga pe aye, bantu bavula kechi batelekelenga ne. Bino, kino kechi kyalengejile Yesu kuleka kwamba pe Yehoba ne.

Onkao mambo, twayai twikale nobe Yesu. Twayai twambenga pe Yehoba. Umvwe ke tube bino, Yehoba Lesa ukatemwa bingi mambo twatemwa jizhina janji.

Pano tangilapo ne binembelo bikwabo byaamba pa jizhina ja Lesa: Isaya 12:4, 5; Mateo 6:9; Yoano 17:6; ne Loma 10:13.

[Kipikichala pa jipa 27]

Nanchi wayuka’mba tubangabanga tonse tuji na mazhina nyi?

[Kipikichala pa jipa 28]

Kintu ka kyanema kyafunjile Mosesa ku kipuupu kya miba kyatemenenga mujilo?

[Kipikichala pa jipa 29]

Lesa wayukanyikishe byepi jizhina janji pa Kalunga Kachila?

[Bipikichala pa jipa 30]

Yesu wayukanyikishe jizhina ja Lesa. Wakonsha kutongola panembwa jino jizhina mu Baibolo nyi?