Fundainga Mambo A Lesa

Mambo ka o Twafwainwa Kufunjilanga pe Lesa?

Kino kibaba kyaamba pa mepuzho o mwakilangulukapo kala kabiji bamwesha ne po mwafwainwa kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.

1. Mambo ka o twafwainwa kufunjilanga pe Lesa?

Lesa uji na bintu byawama byo alamina bantu. Witubula bino bintu kupichila mu Baibolo. Baibolo uji nobe nkalata yafuma kwi Shetu wa mwiulu. —Tangai Yelemiya 29:11.

2. Bino bintu byawama byo bika?

Bantu babena kukeba kafulumende wawama. Kafwako kalama wa pano pa ntanda wakipwishapo kala bukapondo, nshiji, bikola nangwa lufu ne. Pano bino, kuji bintu byawama. Lesa ukaleta kafulumende wawama ku bantu awo ukaleta mutende pano pa ntanda. —Tangai Danyela 2:44.

3. Mambo ka o kyanemena kufunda pe Lesa?

Katatakatu Lesa akafumyepo bantu babena kuleta buyanji pano pa ntanda. Pa kino kimye, ubena kufunjisha bantu bavula baji na muchima wa bukimote kwiyowa bwikalo bwawama bwaimena pa butemwe. Mu Mambo a Lesa, bantu babena kufundamo mwakubila na makatazho a mu bwikalo, bya kwikala na lusekelo ne byo bafwainwa kutokesha Lesa ku muchima.—Tangai Zefwaniya 2:3.

4. Ñanyi Wanembele Baibolo?

Baibolo uji na mabuku 66, kabiji wanembelwe na bantu 40. Mabuku atanshi atanu anembelwe ne Mosesa, kabiji papita myaka nobe 3,500. Buku wapelako wanembelwe na mutumwa Yoano kabiji papita myaka kukila pa 1,900. Pano bino, banembele Baibolo, kechi banembele milanguluko yabo ne, banembele milanguluko ya Lesa. Onkao mambo, Lesa ye Nembi wa Baibolo.—Tangai 2 Timoti 3:16; 2 Petelo 1:21.

Twayuka kuba’mba Baibolo wafuma kwi Lesa mambo wambila jimo bintu bya kulutwe. Kafwako muntu wakonsha kuba kino ne. (Isaya 46:9, 10) Baibolo witubula ne Lesa byoaji. Kabiji uji ne na bulume bwa kupimpula bwikalo bwa bantu. Bino bishinka bilengela bantu bavula kushiinwa’mba Baibolo Mambo a Lesa.—Tangai Yoshua 23:14; 1 Tesalonika 2:13.

5. Mwakonsha kuba byepi pa kuba’mba mumvwishe byaamba Baibolo?

Yesu wayukanyikilwe’mba mufunjishi wa Mambo a Lesa. Nangwa kya kuba bantu bo aambilengako bayukile Baibolo, bakebewenga kwibakwasha kumumvwisha. Pa kwibakwasha, Yesu watangilenga mu Baibolo ne kwibalondolwela pa kuba’mba “bomvwishe Binembelo.” Kino kibaba kya kuba’mba: “Fundainga Mambo a Lesa,” nakyo kikemukwasha.—Tangai Luka 24:27, 45.

Kafwako kintu kyaesakana pamo na kufunda pe Lesa pa mambo a nkebelo ya bumi ne. Pano bino, bantu bamo kechi bakonsha kutemwa kwimumona na kufunda Baibolo ne. Pano kange mulefulwe ne. Pa kuba’mba mukekale na bumi bwa myaka, mwafwainwa kuyuka Lesa. —Tangai Mateo 5:10-12; Yoano 17:3.

Umvwe mukeba kuyukilapo byavula, monai kitango 2 kya mu uno buku wanembwa na Bakamonyi ba kwa Yehoba.