Fundainga Mambo A Lesa

Lesa ye Ñanyi?

Kino kibaba kyaamba pa mepuzho o mwakiipuzhapo kala kabiji bamwesha ne po mwafwainwa kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.

1. Lesa ye ñanyi?

Lesa wa kine ye walengela bintu byonse. Baibolo umutela’mba “Mfumu wa myaka,” kulumbulula’mba kechi uji na ntendekelo nangwa mpelo ne. (Lumwekesho 15:3) Byo kiji kuba’mba Lesa yo nsulo ya bumi, twafwainwa kupopwelatu aye yenka kwapwa.—Tangai Lumwekesho 4:11.

2. Nga Lesa uji na mubiji wa mutundu ka?

Kafwako wakimonapo Lesa ne, mambo Mupashi, kino kilumbulula’mba aye wapusanako na bilengwa bya pano pa ntanda. (Yoano 1:18; 4:24) Byubilo bya Lesa bimwekela mu bintu byo alenga. Kyakumwenako, inge twalanguluka pa bilengwa byapusana pusana byo byalengwa nabiji bipangwa ne buluba, tumona maana ne butemwe bwa Lesa. Kubaya kwa biji mwiulu kushimuna bulume bwa Lesa.—Tangai Loma 1:20.

Twakonsha kuyuka bulongo byubilo bya Yehoba kupichila mu Baibolo. Kyakumwenako, Baibolo witubula bikeba Lesa ne byo ashikwa, byo amona bantu ne byo oba na bintu byapusana pusana.—Tangai Salamo 103:7-10.

3. Nanchi Lesa uji na jizhina nyi?

Yesu waambile’mba “Tata wetu wa mwiulu, Jizhina jenu jizhile.” (Mateo 6:9) Nangwa kya kuba Lesa uji na mazhina a mushingi avula, pano bino ujitu na jizhina jimo. Mu milaka yavula ntelelo yaenda na kupusana. Mu Kikaonde twijitela’mba: “Yehoba.”—Tangai Salamo 83:18.

Mu Baibolo, jizhina ja Lesa bejifumyamo ne kupingizhamo byambo bya mushingi nabiji Nkambo nangwa Lesa. Pano bino, Baibolo byo anembelwenga jizhina ja Lesa janembelwe bimye nobe 7,000. Yesu waingijisha jizhina ja Lesa pa kulumbulwila bantu Mambo a Lesa. Wakwashishe bantu kuyuka Lesa.—Tangai Yoano 17:26.

4. Nanchi Yehoba wituta muchima nyi?

Yehoba umwesha’mba wituta muchima kupichila mu kuteleka ku milombelo yetu. (Salamo 65:2) Nanchi buyanji bwavula bibye bumwesha‘mba Lesa kechi wituta muchima ne nyi? Bantu bamo bamba’mba buyanji lweseko lwa Lesa, pano bino, buno ke bubela. Mambo Baibolo waamba’mba: “Lesa kechi uba bubi nangwa pachechetu ne.”—Yoba 34:10; Tangai Yakoba 1:13.

Lesa wapa bantu lūsa lwa kwifuukwila. Nanchi kechi tumusanchila Lesa pa kwituswisha kwifuukwila kumupopwela nenyi? (Yoshua 24:15) Buyanji bwavula mu ntanda mambo bantu basalapo kuba bintu byatama ku bakwabo. Yehoba kimukola bingi ku muchima pa kumona nshiji ya uno mutundu.—Tangai Ntendekelo 6:5, 6.

Katatakatu Yehoba akengijishe Yesu kufumyapo buyanji ne babi. Pa kino kimye, Yehoba uji na bishinka byamulengela kuswisha buyanji kutwajijila pa kakimye kacheche. Bibaba bya kulutwe bikalumbulula ene mambo Lesa o aswishisha buyanji.—Tangai Isaya 11:4.

5. Nanchi Lesa ukeba’mba tubenga byepi?

Lesa witulengele na muchima wa kukeba kumuyuka ne kumutemwa. Ukeba’mba tufunde bukine pe aye. (1 Timoti 2:4) Inge ketufunde Baibolo, twakonsha kwikala balunda na Lesa.—Tangai Byambo bya Mana 2:4, 5.

Byo kiji kuba’mba Yehoba ye witupa bumi, twafwainwa kumutemwa kukila bantu bonse. Twakonsha kumwesha’mba twatemwa Lesa inge ke twisambe nanji mu lulombelo ne kuba byoakeba. (Byambo bya Mana 15:8) Yehoba ukeba’mba tumweshenga bakwetu butemwe.—Tangai Mako 12:29, 30; 1 Yoano 5:3.

Umvwe mukeba kuyukilako byavula, monai kitango 1 mu uno buku, wa Nanchi baibolo Kine Ufunjishaʼmbaka? Wanembwa na Bakamonyi ba kwa Yehoba.

[Kipikichala pa peja 17]

Nanchi Lesa uji na bishinka byamulengela kuswisha buyanji pa kakimye kacheche nyi?