Mwana Waelekele Wabwelele

Kyamweka Yesu saka akiji mu Pelia ku musela wa Mukola wa Yodano, waambile kishimpi kya mukooko waelekele ne kya jali ja muwayawaya ja dilakima jaelekele. Mu bino bishimpi muji lufunjisho lwa kuba’mba twafwainwa kusekela umvwe ndengamambo walapila ne kubwela kwi Lesa. Bafaliseo ne banembeshi bamulengulwilenga Yesu na mambo a kutambwila bandengamambo balapijilenga. Nanchi bano bakajimbuluzhi bafunjijileko bimo ku bino bishimpi bibiji nyi? Nanchi bayukile Shetu wa mwiulu byo amona bandengamambo balapila nyi? Yesu wibelele kishimpi kyakoseshe kishinka kiji mu luno lufunjisho.

Kino kishimpi ke kya shetu wajinga na baana babalume babiji. Mu kino kishimpi, mwana wa mwanyike ye ye aambilepo bingi. Bafaliseo ne banembeshi, kubikapotu ne bantu bakwabo baumvwine byaambilenga Yesu, bafwainwe kufunjilako ku byo aambile pa uno mwana wa mwanyike. Nangwa byonkabyo, kechi twafwainwa kulengulula byaambile Yesu pa shabo bano baana ne pa mwana wa mukulumpe ne, mambo byubilo byo bamwesheshe nabyo bitufunjishapo bintu bimo. Onkao mambo, langulukai pa bano banabalume bonse basatu baambilepo Yesu mu kishimpi.

Yesu watatwile kwamba’mba: “Muntu umo wajinga na baana ba balume babiji. Wa mwanyike waambijile bashanji amba, ‘Tata, mpelai jimo nsabo yami ya bwana.’ Onkao mambo, wibabenye nsabo yanji.” (Luka 15:11, 12) Uno mwana wa mwanyike kechi wakebelenga nsabo yanji na mambo a kuba’mba bashanji bafwile ne. Bashanji bakijinga bomi, pano bino, uno mwana wakebelenga nsabo yanji pa kuba’mba akeingijishe kwesakana na byo akebelenga mwine. Ñanyi bintu byo akebelenga kuba?

Yesu walumbulwile’mba: “Byo papichile moba acheche, uno mwana mwanyike walongele bintu byanji byonse ne kuya ku kyalo kingi kwalepesha kabiji konkakwa wakonawine nsabo yanji yonse na mambo a bwikalo buncha.” (Luka 15:13) Uno mwana kechi wakebelenga kwikala na bashanji balamanga bulongo baana babo ne kwibapa bikebewa ne, bino, wafukwilepo kuya ku kyalo kingi kwalepesha. Konkakwa wakonawine nsabo yanji yonse na bapite. Uno mwana watainwe mu makatazho byonkatu Yesu byo atwajijile kwamba’mba:

“Byo aonawine nsabo yanji yonse, mwaponene kipowe kya nzala mu kyokya kyalo kyonse, ne aye watatwile kuyanda. Wayile ne na kwikala na ngikazhi umo wa mu kyokya kyalo, ne aye wamutumine mu bujimi bwanji na kufunga bankumba. Kabiji wakumbwanga bingi kuja ntotolo yajanga bankumba, bino kafwako nangwa umo wamupangapo kajo ne.”—Luka 15:14-16.

Mwayila Mizhilo ya Lesa, bankumba bajinga ba muzhilo, pano bino, uno mwana bobo afunganga. Waikele na nzala kimye kyabaya, onkao mambo, wakebelenga kuja kajo kajanga bankumba bo afunganga. Na mambo a luno lukatazho lo apichilengamo, uno mwana ‘walubulukile muchima.’ Waubile byepi? Waambile’mba: “Batata baji na ba mingilo bavula baji na kajo kavula, pakuba amiwa mbena kufwa kuno na nzala! Nsakwimana ngye kwi batata nkebambile namba: ‘Tata, nalenga mambo kwi Lesa wa mwiulu ne kwi anweba. Pano kechi nafwainwa kutelwa’mba nemwanenu ne. Mungalule ngikale ke wa mwingilo wenu.’” Onkao mambo, waimene kaye kwi bashanji.—Luka 15:17-20.

Pano shanji waubilepo byepi? Nanchi wazhingijile mwananji na mambo a kufuma pa nzubo nyi? Nanchi shanji kechi wamutambwijile nenyi? Inge yenu mwajinga bashanji, inge mwaubile byepi? Inge wajinga mwanenu wamulume nangwa wamukazhi, inge mwaubile byepi?

MWANA WAELEKELE WAMWEKELE

Yesu walumbulwile byaumvwine shanji ne byo aubile. Waambile’mba: “[Mwana] byo akijinga palepa byobya, shanji wamumwene ne kumubila lusa, kabiji wamunyemejile lubilo ne kumupakachilamo ne kumufyompa.” (Luka 15:20) Nangwa kya kuba shanji waumvwine bwikalo buncha bwa mwananji, bino, wamutambwijile. Nanchi bantangi ba Bayudea bemonanga’mba bayuka Yehoba kabiji bamupopwela, bafunjijileko ku byumvwa Shetu wa mwiulu umvwe bandengamambo balapila nyi? Nanchi bakonsheshe ne kuyuka’mba Yesu naye watambwilanga bandengamambo nyi?

Shanji wa milangwe kyamweka wayukile’mba mwananji walapila kupichila mu byo amwene byamwekelenga mwananji kimye kyo abwelele. Bino, kintu kyaubile shanji kya kumutundaila kyalengejile mwananji kusolola mambo anji. Yesu waambile’mba: “Kepo mwananji amwambijile’mba, ‘Tata, nalenga mambo kwi Lesa wa mwiulu ne kwi anweba. Kechi nafwainwa kutelwa’mba nemwanenu ne.’”—Luka 15:21.

Shanji wakambizhe bakalume banji amba: “Pelawizhai! letai munkukumba wawamisha mumuvwike, kabiji mumuvwike ne kambalaminwe ku munwe wanji ne makwabilo ku maulu anji. Kabiji mulete ne mwana ñombe wanuna mumwipaye pa kuba’mba tuje ne kusangalala, mambo uno mwanami wafwile, pano ke mumi; waelekele pano wamweka.” Kepo batatwile “kusangalala.”—Luka 15:22-24.

Pa kikye kimye, mwananji wa mukulumpe wajinga mu bujimi. Yesu waambile pa uno mwana amba: “Byo afikile kwipi na nzubo, waumvwine saka bemba ne kuzha. Onkao mambo, waichile kalume umo ne kumushikisha kyamwekelenga. Aye wamubuujile’mba, ‘Nkasenu waiya, kabiji bashenu baipaya mwana ñombe wanuna mambo aye wabwela saka aji mutuntulu.’ Bino aye wazhingijile kabiji wakaine kutwela mukachi. Kepo shanji alupukile pangye ne kutatula kumusashijila. Aye waambijile shanji amba, ‘Amiwa nemwingijila myaka yavula kabiji kechi mbula kukookela mikambizho yenu ne, bino mukyangye kumpapo mwana mbuzhi kuba’mba nsangalale na balunda nami ne. Pano aku ufikatu uno mwanenu wimonawijile nsabo yenu na bapite, mwamwipayila mwana ñombe wanuna.’”—Luka 15:25-30.

Bañanyi bajinga nobe yewa mwana wa mukulumpe bazhingijile kimye Yesu kyo amwesheshe lusa ne kuta muchima bantutu ne bandengamambo? Banembeshi ne Bafaliseo. Kulengulula Yesu pa mambo a kutambwila bandengamambo ko kwalengejile kwibela kino kishimpi. Onkao mambo, yense ulengulula lusa lwa Lesa wafwainwa kufunjilako ku kino.

Pa kupwisha kwaamba bino bishimpi, Yesu wapezhezheko na byambo byasashijile shanji mwananji wa mukulumpe amba: “Mwanami, obewa wikala ne amiwa kimye kyonse, kabiji bintu byami byonse byo byobe. Bino twafwainwa kusekela ne kusangalala, mambo nkasobe wafwile, pano ke mumi; kabiji waelekele pano wamweka.”—Luka 15:31, 32.

Yesu kechi waambapo pa byaubile awa mwana wa mukulumpe ne. Panyuma ya lufu ne lusanguko lwa kwa Yesu, “bañanga bavula batendekele kwitabila.” (Byubilo 6:7) Kyamweka ne bantu baumvwinenga Yesu na kwaamba kishimpi kya mwana waelekele nabo baitabile. Kya kine, nabo bafwainwe kulangulukapo bulongo, kulapila ne kubwela kwi Lesa.

Kufumatu pa kyo kya kimye, baana ba bwanga ba kwa Yesu bafwainwe kulangulukapo bingi pa mafunjisho anema o aambilepo mu kino kishimpi. Lufunjisho lutanshi ke lwa kuba’mba twafwainwa kutwajijila kupwanañana na bantu ba Lesa, ne kulondela lutangijilo lwa Shetu witutemwa kabiji witumwena bintu kukila kulangulukanga pa bunonshi bwakonsha kwitulengela kuya “ku kyalo kingi kwalepesha.”

Lufunjisho lukwabo lwanema ke lwa kuba’mba, inge kya kuba twafuma mu jishinda ja Lesa, twafwainwa kwipelula ne kubwela kwi Shetu na kwiyowa mapesho anji jikwabo.

Lufunjisho lukwabo lo twafwainwa kufunjilako, ke kumona byaubile shanji watambwijile mwananji ne byo amulekejileko mambo kupusanako na byaubile kolojanji pa kumuzhingijila ne kubula kumutambwila bulongo. Kya kine, bantu ba Lesa bafwainwa kwikala na muchima wa kulekelako bakwabo mambo ne kutambwila boba balapila bakeba kubwela ‘ku nzubo ya Shabo.’ Twafwainwa kusangalala mambo a kuba’mba mulongo wetu “wafwile, pano ke mumi” kabiji “waelekele pano wamweka.”