Mfumu Mutanshi wa Bena Isalela

Yehoba wapele bena Isalela bamitonyi bakwibatangijila, pano bino, abo bakebelenga kwikala na mfumu. Baambijile Samwela amba: ‘Mikoka ituzhokoloka yonse iji na bamfumu. Ne atweba tukeba kwikala na mfumu.’ Samwela wamwene kuba’mba byo bakebelenga kuba kechi byawamine ne. Onkao mambo, walombelepo kwi Yehoba. Yehoba wamwambijile’mba: ‘Bano bantu kechi bakaana obewa ne. Bino bakaana amiwa. Babuule kuba’mba basakwikala na mfumu, bino uno mfumu ukakebanga bintu byavula bingi kwi abo.’ Bantu bakumbwile’mba: ‘Ke mambo ne. Kyo tubena kukebatu ke kwikala na mfumu!’

Yehoba waambijile Samwela amba Saulo ye ukekala mfumu wabo mutanshi. Saulo byo ayile ku Lama na kumona Samwela, Samwela wamushingile manyi pa mutwe, kabiji Saulo waikele ke mfumu.

Kepo Samwela aichile bena Isalela bonse kuba’mba ebamweshe mfumu wabo. Bino Saulo kechi bamumwene ne. Wayuka kyalengejile nyi? Wafyamine mu bipe. Saulo bamutaaine saka afyama, kepo bamusendele ne kumwimika ku meso a bena Isalela bonse. Saulo wazamine kukila bantu bonse kabiji walambile bingi. Samwela waambile’mba: ‘Monai Yehoba ye atongola.’ Bantu babijikile’mba: ‘Mfumu ekale myaka ne myaka!’

Patanshitu, Mfumu Saulo waubanga byamubuulanga Samwela kabiji wakookelanga Yehoba. Bino byo papichile myaka, wikilekele. Mu oa moba, mfumu kechi bamuswishanga kupana bitapisho ne. Juba jimo, Samwela waambijile Saulo amba amupembelele. Bino Saulo byo amwene’mba Samwela wabanda kwiya, aye wapaine mulambo. Nga Samwela waubilepo byepi? Wamwambijile’mba: ‘Wakufwainwa kukookela Yehoba.’ Nanchi Saulo wafunjijileko ku byo aubile nyi?

Kimye kikwabo Saulo byo ayile na kulwa nkondo na bena Amaleki, Samwela wamwambijile’mba wafwainwa kwibepayatu bonse. Bino Saulo wafuukwilepo kubuula kwipaya Mfumu Agagi. Yehoba waambijile Samwela amba: ‘Saulo waleka kuñumvwina.’ Samwela wazhingijile bingi ne kwambila Saulo amba: ‘Na mambo a kuba’mba waleka kukookela Yehoba, Yehoba usakusala mfumu mukwabo.’ Samwela byo aalulukile’mba ayenga, Saulo wamukwachile mu mukunkumba. Mukunkumba watabukile. Kepo Samwela ambijile Saulo amba: ‘Yehoba wakwangata bufumu.’ Yehoba wafuukwilepo kupana bufumu ku muntu ukamutemwa ne kumukookela.