Nkalata Yafuma Ku Jibumba Jitangijila

Kwi Anweba Bonse Mwatemwa Yehoba:

Mu mwaka wa 1971, bantu batainwe ku Kushonkena kwa Kijiiji kwa “Divine Name” (Jizhina ja Lesa) basangalele bingi byo batambwile mabuku akatataka. Ano mabuku bavula baambilenga’mba “awama bingi.” Mulongo umo waambile pa buku umo pa oa o balupwile amba: “Uno buku waamba pa bintu bikamweka kulutwe byo tukyangye kumonapo!” Nanchi uno mulongo waambilenga pa ka? Waambilenga pa buku wa kuba’mba, “The Nations Shall Know That I Am Jehovah”—How? (Bisaka bya Bantu Bikayuka’mba Amiwa Yami Yehoba—Mu Ñanyi jishinda?) Pano mambo ka bantu o basangalejile bingi pa kutambwila uno buku? Mambo uno buku walumbulwile bingi bulongo ñumvwino ya katataka ya bungauzhi buji mu buku wa mu Baibolo wa Ezikyo bwaamba pa bintu bikamweka kulutwe byakunza bantu bonse.

Mu myaka yalondejilepo kufuma po balupwijile buku wa kuba’mba ‘Bikayuka’mba Amiwa Yami Yehoba,’ bantu ba Lesa bajinga 1.5 milyonyi bavujijileko bingi bukiji. Bafikile pa 8 milyonyi ne kukilapo. (Isa. 60:22) Abano bantu ba Yehoba bamba milaka kukila pa 900. (Zeka. 8:23) Bantu bavula kechi bajingapo na buku walumbulula bulongo bungauzhi buji mu buku wanembele ngauzhi Ezikyo na lutangijilo lwa mupashi ne.

Kabiji kufumatu mu mwaka wa 1971, ñumvwino ya bukine bwa mu Baibolo yapimpulwa monka mubena kuyila na kusaminako kyeya. (Maana 4:18) Mu mwaka wa 1985, momo twayukile ene mambo “mikooko ikwabo” kyo itelelwa’mba baoloka kabiji balunda na Lesa. (Yoa. 10:16; Loma 5:18; Yako. 2:23) Kabiji mu mwaka wa 1995, momo twaumvwishishe kimye kitanshi kuba’mba “mikooko ikwabo” ne “bambuzhi” bakebachibila mambo mu kimye kya “malwa akatampe” abena kwiya. (Mat. 24:21; 25:31, 32) Aluno lonse lupimpu lwitukwasha kumvwisha bungauzhi buji mu buku wa Ezikyo.

Mu myaka ya kulutwe kuno, kyeya kyatwajijila kusaminako. Akilangulukaitu pa byo twafunjile pa bishimpi bya kwa Yesu. Luno twaumvwisha bilumbulula bino bishimpi. Bino bishimpi byavula byaamba pa bintu bikamweka katatakatu kulutwe kimye kya malwa akatampe abena kwiya. Kumvwisha bino bishimpi nako kwitulengela kumvwisha bungauzhi buji mu buku wa Ezikyo. Bungauzhi bumo bo twaumvwisha ke bobwa bwaamba pa Gogi ne Magogi, (buji mu kitango 38 ne 39), mwingilo wa mwanamulume wajinga na bya kunembako munembeshi (kitango 9), bungauzhi bwaamba pa musanza mwajinga bikupa byaumatu shau ne bungauzhi bwaamba pa kulamankanya tubichi tubiji (kitango 37). Ino yonse ñumvwino itulengela kupimpulako byanembelwe mu buku wa ‘Bikayuka’mba Amiwa Yami Yehoba.’

Onkao mambo, bantu ba Lesa javula bashikisha’mba, “Nanchi ñanyi kimye kyo tukatambwila buku walumbulula bulongo ñumvwino ya katataka ya bungauzhi buji mu buku wa Ezikyo?” Mu buku wa Yehoba Pano Wabwezha Bupopweshi bwa Kine! momo balumbulula bulongo buno bungauzhi. Byo musakutanganga uno buku uji na bitango 22, langulukainga pa bipikichala byawama bijimo. Musakutemwa bingi jishinda jo banembelamo bishinka biji mu uno buku. Balombelepo na mukoyo pa kuba’mba bayuke ene mambo Yehoba o anengezhejile buku wa mu Baibolo wa Ezikyo. Kabiji balangulukilepo bingi bulongo pa mepuzho nabiji a kuba’mba: Bajingako mu moba a kwa Ezikyo bafunjijileko ka ku bungauzhi buji mu buku wa Ezikyo, kabiji tubena kufunjilako ka mu ano moba? Ñanyi bungauzhi buji mu uno buku bwaamba pa bintu bikamweka kulutwe? Nanchi mu buku wa Ezikyo muji bintu byajingako kala bibena kwimenako bya mu ano moba mu bungauzhi nyi? Mikumbu ya ano mepuzho onse itulengejile kumvwisha biji mu uno buku wa bungauzhi wa Ezikyo.

Byo musakutanganga buku yense wa Ezikyo, musakutemwa bingi kuyuka biji lubaji lwa mwiulu lwa jibumba ja Yehoba. Kwa kubula nangwa kuzhinaukatu ne, mumvwa bingi bulongo kutanga mizhilo ya Yehoba ilondela baji mwiulu ne baji pano pa ntanda pa kumupopwela byonka byo akeba. Buku wa Bupopweshi bwa Kine usakwimukwasha kuyuka bulongo Yehoba byo aubila bantu banji ne byo akebobila kulutwe katatakatu. Musakumona kuba’mba uno buku waamba bingi pa bishinka bikatampe bibiji. Kishinka kitanshi, pa kuba’mba tutokeshenga Yehoba ku muchima, twafwainwa kuyuka kuba’mba ye Nkambo Walengele Bintu Byonse. Kishinka kya bubiji, twafwainwa kupopwelanga Yehoba mu jishinda jo akeba kumupopwelamo ne kulondela mizhilo yanji mu bwikalo bwetu.

Twashiinwa kuba’mba uno buku usakwimukwasha kutwajijila kupopwela Yehoba mu jishinda jileta lukumo ku jizhina janji jikatampe jazhila. Kabiji uno buku usakwimukwasha kutengelanga kimye bisaka bya bantu kyo bikayuka’mba aye ye Yehoba.—Ezi. 36:23; 38:23.

Shetu, aye Yehoba witutemwa bingi, emukwashe kumvwisha bungauzhi buji mu buku wanembele Ezikyo na lutangijilo lwa mupashi wa Lesa.