Salainga bya Kisangajimbwe Bitokesha Yehoba ku Muchima

Yehoba ke “Lesa wa lusekelo.” (1 Timoti 1:11) Ukeba ne atweba kwikala na lusekelo ne kwikala bulongo mu bwikalo bwetu. Yehoba utemwa bingi inge saka twikalako na kimye kya kukokoloka. Uno mutwe waamba pa byo twafwainwa kwingijishanga bulongo kimye kya kukokoloka. Kabiji usakwitukwasha kusala bya kisangajimbwe bitokesha Yehoba ku muchima.

1. Ñanyi kintu kyo twafwainwa kulangulukangapo pa kusala bya kisangajimbwe?

Ñanyi bintu byo mwatemwa kuba inge mubena kukokoloka? Bamo bekalatu pa nzubo na kutanga buku, kuteleka ku nyimbo, kuteleka ku waileshi nangwa kutamba TV. Pakuba bakwabo nabo batemwa bingi kwikala pamo na kwisamba na balunda nabo, kutomena pamo munkoyo nangwa kupama mpila. Onkao mambo, bya kisangajimbwe byonse byo twatemwa byafwainwa ‘kutokesha Nkambo ku muchima.’ (Efisesa 5:10) Kyanema bingi kuyuka kino kishinka mambo bya kisangajimbwe byavula mwavwangwa bintu byashikwa Yehoba nabiji bumbanzhi, bulalelale nangwa kupopwela bankishi. (Tangai Salamo 11:5.) Ñanyi kintu kyafwainwa kwitukwasha kusalanga bulongo bya kisangajimbwe?

Inge twaikala na balunda batemwa Yehoba, baketukwasha kwikala na byubilo byawama ne kusalanga bya kisangajimbwe byawama. Byonkatu byo twafunjile mu lufunjisho 48, twafunjile kuba’mba “awa wenda na ba maana ukekala na maana.” Kabiji inge saka tupwanañana na bantu babula kutemwa mizhilo ya Lesa ‘tukamona bya malwa.’​—Byambo bya Maana 13:20.

2. Mambo ka o twafwainwa kubujila kutayanga kimye kyabaya ku bya kisangajimbwe?

Nangwa kya kuba bya kisangajimbwe byo twatemwa bijitu bulongo, bino kechi twafwainwa kutwezhamo ne mutwe ne. Mambo inge saka twingijisha kimye kyabaya ku bino bintu, kechi tukekalangapo na kimye kya kubilamo bintu byanema ne. O ene mambo Baibolo o itutundaikila’mba ‘twingijishenga kimye [kyetu] bulongo.’​—Tangai Efisesa 5:15, 16.

FUNJILAIPO BIKWABO

Fundai byo mwafwainwa kuba pa kusala bya kisangajimbwe byawama.

3. Chinuzhukai bya kisangajimbwe byatama

Mambo ka o twafwainwa kusajilanga bulongo bya kisangajimbwe? Tambai VIDYO, ne kwisamba ano mepuzho.

VIDYO: Ñanyi Bya Kisangajimbwe byo Nafwainwa Kusala? (4:39)

• Ñanyi makayo akaya bantu ano moba aesakana pamo na makayo a kwiipaya akayanga bena Loma?

• Mu vidyo ye mwatamba, ñanyi kintu Danny kyo afunjijileko ku bya kisangajimbwe?

Tangai Loma 12:9, ne kwisamba buno bwipuzho:

• Akino kyepelo kyafwainwa kwimukwasha byepi pa kusala bya kisangajimbwe byawama?

Ñanyi bintu bimo Yehoba byo ashikwa? Tangai Byambo bya Maana 6:16, 17 ne Ngalatiya 5:19-21. Inge mwapwisha kutanga kila kinembelo, isambai buno bwipuzho:

• Ñanyi bintu bimo byo baambapo mu bino byepelo bitanwa mu bya kisangajimbwe bijiko lelo jino?

Mepuzho afwainwa kwimukwasha kusala bulongo bya kisangajimbwe

Iipuzha anweba bene amba:

• Nanchi abye bya kisangajimbwe byavwangamo bintu Yehoba byo ashikwa nyi?

• Nanchi abye bya kisangajimbwe bimpwishisha kimye kya kubilamo bintu byanema nyi?

• Nanchi abye bya kisangajimbwe bindengela kutendeka kupwanañana na bantu babula kutemwa Yehoba nyi?

Kyawama kubula kuba bintu byakonsha kwituletelela. O ene mambo o twafwainwa kuchinuzhukila bya kisangajimbwe byatama

4. Ingijishainga bulongo kimye kyenu

VIDYO: Ñanyi Bintu Bimupwishisha Kimye? (2:45)

• Nangwa kya kuba mulongo ye twatamba mu vidyo kechi watambilenga bintu byatama ne, pano kwingijisha kimye kyanji mu bya kisangajimbwe kwamuletelejile byepi?

Tangai Filipai 1:10, ne kwisamba buno bwipuzho:

• Akye kyepelo kyafwainwa kwitukwasha byepi kuyuka kimye kyo twakonsha kwingijisha ku bya kisangajimbwe?

5. Salainga bya kisangajimbwe byawama

Nangwa kya kuba bya kisangajimbwe bimo bifichisha Yehoba ku muchima, pano bino kuji bintu byavula byawama bingi bibula kumufichisha ku muchima. Tangai Musapwishi 8:15 ne Filipai 4:8, ne kwisamba buno bwipuzho:

• Ñanyi bya kisangajimbwe byawama byo mwatemwa?

ÑANYI BISHINKA BYO MWAFUNDA?

Yehoba ukeba atweba kusala bya kisangajimbwe byawama.

Mepuzho a kupitulukamo

• Ñanyi bya kisangajimbwe byafwainwa kuchinuzhuka bena Kilishitu?

• Mambo ka o twafwainwa kubujila kwingijisha kimye kyabaya ku bya kisangajimbwe?

• Mambo ka o mwafwainwa kusajilanga bya kisangajimbwe bitokesha Yehoba ku muchima?

KEBAI BISHINKA BIKWABO

Yukai mwine wafwainwa kwitusajilako bya kisangajimbwe.

“Nanchi Mukanya Bantu Kutamba Mafilimu amo, Kutanga Mabuku amo Nangwa Kuteleka ku Nyimbo imo Nyi?” (Kibaaba kiji pa jw.org)

Monai byo mwafwainwa kufuukulapo bulongo pa kusala kimye kya kukokoloka ne bya kisangajimbwe.

“Nanchi bya Kisangajimbwe Byenu Byawama Nyi?” (Kyamba kya Usopa, October 15, 2011)

Mu jishimikila ja kuba’mba “Naleka Misalululo,” monai ene mambo mwanamulume umo o alekejile kutamba bya kisangajimbwe bimo.

“Baibolo Upimpula Bwikalo bwa Bantu” (Kyamba kya Usopa, July 1, 2010)

Tambai mumone nsemi wamukazhi umo byo afuukwilepo bulongo pa bya kisangajimbwe byamba pa mashimikila a bandemona.

Chinuzhukai Kutamba Bya Kisangajimbwe mo Bamwesha Kupopwela Mipashi (2:02)