LUFUNJISHO 01
Baibolo Wafwainwa Kwimukwasha Byepi Kwikala Bwikalo Bwawama?
Atweba bonse tukeba kuyuka bintu byavula pa bwikalo bwetu, ene mambo o tubena kuyanjila, kyo tufwila ne kukebatu kuyuka bintu bikamweka kulutwe. Kabiji pa juba pa juba twikala na bijikila nabiji kukeba mali a kwikwashishamo ne bya kwikala na kisemi kya lusekelo. Bantu bavula bemwena Baibolo byo akumbula mepuzho abo onse. Kabiji muntu yense wafwainwa kumwenamo mu mafunde aji mu Baibolo. Mwalanguluka’mba Baibolo wafwainwa kukwasha bantu nyi?
1. Ñanyi mepuzho amo akumbula Baibolo?
Baibolo wakumbula ano mepuzho a kuba’mba: Atweba bantu twaishileko byepi? Mambo ka o twaikela na bumi? Mambo ka bantu babula mambo o bayanjila? Ñanyi kintu kimweka inge muntu wafwa? Inge bantu bonse bakeba kwikala mu mutende, pano mambo ka o kwaikela makondo avula bibye? Ñanyi bintu bikamweka kulutwe? Kechi kyatama kwipuzha ano mepuzho ne. Mambo mu Baibolo muji mikumbu yawama bingi, kabiji bantu bavula baswa kino kishinka.
2. Baibolo wafwainwa kwitukwasha byepi kwikala bwikalo bwawama?
Mu Baibolo tutaanamo mafunde awama bingi. Muji mafunde afwainwa kukwasha bisemi kwikala na lusekelo. Kabiji Baibolo witubuula mwa kubila na bijikila ne bya kutemwa mingilo yo twingila. Musakufunda byaamba Baibolo pa ino mitwe ne pa bintutu bikwabo byo tusakwisambapo. Kabiji kwisamba pa bino bishinka kusakwimukwasha kushiinwa kuba’mba “Binembelo byonse [bintu byonsetu biji mu Baibolo] bikwasha bantu.”—2 Timoti 3:16.
Uno buku kechi wapingakena pa Baibolo ne. Pakuba ubena kwimutundaika anweba kutanganga Baibolo. Onkao mambo, tubena kwimutundaika kutanga binembelo biji mu uno buku ne kwibyesakanya ku byo mubena kufunda.
FUNJILAIPO BIKWABO
Monai Baibolo byo akwasha bantu kupimpula byubilo byabo. Ne byo mwakonsha kutemwa kutanganga Baibolo, ne ene mambo o kyawamina muntu mukwabo kwimukwasha kumvwisha byaamba Baibolo.
3. Baibolo witubuula bya kuba
Baibolo ujitu byonka biji tochi. Twafwainwa kwingijisha Baibolo kwitukwasha pa kufuukula bintu bulongo ne kwitubuula bintu bikamweka kulutwe.
Tangai Salamo 119:105, ne kwisamba ano mepuzho:
Wanembele uno Salamo walangulukilengapo’mba ka pa Baibolo?
Nga anweba musakwambapo’mba ka pa biji Baibolo?
4. Mu Baibolo muji mikumbu ya mepuzho o tuji nao
Mwanamukazhi umo wimwenejile mwine’mba Baibolo wakumbwile mepuzho anema amukatezhe pa myaka yavula. Tambai VIDYO, ne kwisamba ano mepuzho.
Mu vidyo ye mwatamba, ñanyi mepuzho ajinga na uno mwanamukazhi?
Kufunda Baibolo kwamukwashishe byepi?
Baibolo witutundaika kwipuzha mepuzho. Tangai Mateo 7:7, ne kwisamba buno bwipuzho:
Ñanyi mepuzho o muji nao akumbula Baibolo?
5. Tangainga Baibolo kimye kyonse
Bantu bavula batemwa bingi kutanga Baibolo kabiji babena kumwenamo bintu byawama. Tambai VIDYO, ne kwisamba ano mepuzho.
Mu vidyo ye mwatamba, banyike baambapo’mba ka pa kutanga Baibolo?
Nangwa kya kuba kimye kitanshi kechi batemenwe kutanga Baibolo ne, mambo ka o batemenwa kutanga Baibolo luno?
Mu Baibolo muji mikambizho itutekenesha ne kwitukwasha kwikala na luketekelo. Tangai Loma 15:4, ne kwisamba buno bwipuzho:
Nanchi milaye iji mu Baibolo imutekenesha ne kwimukwasha kwikala na luketekelo nyi?
6. Bakwetu bakonsha kwitukwasha kumvwisha byaamba Baibolo
Kyawama bingi kutanganga Baibolo pa bunke bwenu. Pano bino, bavula bataana’mba kwisamba na bantu bintu byo bafunda mu Baibolo kukwasha bingi. Tangai Byubilo 8:26-31, ne kwisamba buno bwipuzho:
Twakonsha kumvwisha byepi byaamba Baibolo?—Monai kyepelo 30 ne 31.
Mwanamulume mwina Etiopya wakebelenga muntu wakumukwasha kumvwisha Binembelo byo atangilenga. Bantu bavula lelo jino nabo bataana’mba kwibafunjisha Baibolo kukwasha bingi
BANTU BAMO BAMBA’MBA: “Kutanga Baibolo kutayatu kimye.”
Nga anweba mwakonsha kukumbula’mba ka? Mambo ka o mwakumbwila byobyo?
ÑANYI BISHINKA BYO MWAFUNDA?
Baibolo witupa maana etukwasha kuyuka mwa kubila na bintu bya mu bwikalo bwetu bwa pa juba pa juba. Mu Baibolo muji mikumbu ya mepuzho anema. Kabiji mu Baibolo muji byambo bitekenesha bantu ne kwibakwasha kwikala na luketekelo.
Mepuzho a kupitulukamo
Ñanyi bukwasho bo twafwainwa kutaana mu Baibolo?
Ñanyi mepuzho amo akumbula Baibolo?
Ñanyi bintu byo mwakebesha kufunda mu Baibolo?
KEBAI BISHINKA BIKWABO
Mu Baibolo muji mafunde etukwasha bingi lelo jino.
“Byamba Baibolo Bingila ne mu Ano Moba” (Kyamba kya Usopa Na. 1 2018)
Monai Baibolo byo akwashishe mwanamulume umo wajinga na milanguluko yatama kufumatu ku bwanyike bwanji.
Tangai mafunde a mu Baibolo afwainwa kukwasha kisemi.
“Bintu 12 Bilengela Kisemi Kwikala Bulongo” (Labainga! Na. 2 2018)
Kupusanako na byamba bantu, Baibolo witubuula ubena kulama ino ntanda.