LUFUNJISHO 11

Bintu Byafwainwa Kwimukwasha Kumvwisha Biji mu Baibolo

Buku ye Bapulinta

Fwanyikizhai mubena kukeba kusengela mpunzha yabaya bingi. Kabiji kechi mwayuka ne po musakutendekela kusengela ne. Pa kuba’mba mwingilo abule kwimubayila, mwakonsha kwabanya ino mpunzha mu tumapunzha tuchetuche. Abino byo byo mwafwainwa kuba ne pa kutanga Baibolo. Mwakonsha kwiipuzha’mba: ‘Nsakutendekela pi uno mwingilo?’ Mu uno mutwe, tusakwisamba pa bintu bimo byapeela byafwainwa kwimukwasha pa kuba’mba mutemwe kutanganga Baibolo ne kufunda Baibolo pa bunke bwenu.

1. Mambo ka o twafwainwa kutangilanga Baibolo kimye kyonse?

Muntu utanga Baibolo kimye kyonse nangwa’mba utanga “mizhilo ya Yehoba” ukekala na lusekelo ne bintu byo akobanga bikalumbuluka. (Tangai Salamo 1:1-3.) Pa juba pa juba tangainga Baibolo pa kakimye kacheche. Inge mwashiinwa byaamba Mambo a Lesa, kine mukatemwa bingi kutanganga Baibolo.

2. Ñanyi kintu kyafwainwa kwitukwasha pa kuba’mba tumvwishenga byo tutanga mu Baibolo?

Pa kuba’mba tummvwishe byo tutanga mu Baibolo, twafwainwa kutulumanangako ne kulanguluka langulukapo pa bintu byo tubena kutanga. Twafwainwa kutanganga Baibolo ne “kulanguluka langulukapo.” (Yoshua 1:8) Inge mubena kutanga Baibolo iipuzhainga mepuzho nabiji ano: ‘Abino bintu byo mbena kutanga bibena kumfunjishapo ka pe Yehoba Lesa? Nafwainwa kwibingijisha byepi mu bwikalo bwami? Nafwainwa kwingijisha byepi bino byepelo kukwasha bakwetu?

3. Mwafwainwa kuba byepi pa kuba’mba mwikalengako na kimye kya kutanga Baibolo?

Nanchi kimukatazha kwikalapo na kimye kya kutanga Baibolo nyi? Atweba bavula lo lukatazho lo tuji nalo. Ibikaiko kwingijishanga “kimye kyenu bulongo.” (Efisesa 5:16) Mwafwainwa kuba bino kupichila mu kusalapo kimye kimo kyo mwafwainwa kutangilangamo Baibolo pa juba pa juba. Bamo basalapo kutanganga Baibolo lukelokelo. Bakwabo basalapo kutanganga Baibolo mute inge bapwisha kuja kajo kapachaile. Kabiji bakwabo batanga Baibolo bufuku saka bakyangye kulaala. Nga anweba, ñanyi kimye kimuwamina kutangilangamo Baibolo?

FUNJILAIPO BIKWABO

Monaipo jishinda jimo jakonsha kwimukwasha kutemwa ne kumvwisha byo mubena kutanga mu Baibolo. Yukai bya kunengezha bulongo pa kuba’mba mumwenengamo pa kufunda Baibolo.

Kipikichala: Mwanyike wa mulume ubena kutompa kajo ko akyangye kujapo. 1. Mwanyike wamulume ubena kukayisha kajo. 2. Byo akomako, watendeka kuja. 3. Byo aikala mukulumpe, watemwa bingi kuja kako kajo. — Byonkatu byo tufunda kuja kajo kapusana pusana ko tukyangye kujapo, kyo kimotu twakonsha ne kufunda bya kutanganga Baibolo ne kumvwisha bijimo

4. Yukai bya kutanga Baibolo pa kuba’mba mutemwe kwiitanganga

Kechi kyapeela kutendeka kutanga Baibolo ne. Nangwa byonkabyo, twafwainwa ‘kukebanga’ kufunda pe Lesa byonkatu byuba muntu ukebesha kuja kajo ko akyangye kujapo kala. Tangai 1 Petelo 2:2, ne kwisamba buno bwipuzho:

Nanchi kutanga Baibolo pa juba pa juba kwakonsha kwimukwasha kutemwa biji mu Baibolo nyi?

Tambai VIDYO pa kuba’mba mwiumvwine bantu bamo byo baubile pa kuba’mba batendeke kutanga Baibolo. Apa bino mwisambe ano mepuzho.

VIDYO: Banyike Bafunda bya Kutanga Mambo a Lesa (5:33)

Mu vidyo ye mwatamba, ñanyi makatazho ashinjile banyike?
Ñanyi kintu kibakwashishe kutwajijila kutanganga Baibolo?
Baubile byepi pa kuba’mba batemwe kutanganga Baibolo?

Bintu byafwainwa kwimukwasha ne anweba:

Tangainga Baibolo ye batuntulula bulongo. Esekai kutanga Baibolo wa Binembelo bya Ntanda Ipya inge mo aji mu mulaka wenu.
Tendekelaipo kutanga mabuku a mu Baibolo muji mashimikila o mwatemwa bingi. Pa kuba’mba muyuke bya kuba, monai chati waamba’mba “Tendekai Kutanga Baibolo.”
Nembai bishinka byo mwatanga. Ingijishainga chati uji mu uno buku po banemba’mba “Kuyuka po Mwapelela Kutanga Baibolo.”
Ingijishainga JW Library^® app. Mwakonsha kutanga ne kuteleka ku Baibolo ye batanga mu mulaka ye mwayuka. Mwakonsha kuba bino konse ko muji kwingijisha foni nangwa tabuleti.
Ingijishainga Bya kulumbulula biji mu Baibolo wa Binembelo bya Ntanda Ipya. Mu uno Baibolo muji mapu, machati ne mutanchi wa byambo bya kwimukwasha kuba’mba mumvwishenga biji mu Baibolo.

5. Nengezhai byo musakufunda mu Baibolo

Tangai Salamo 119:34, ne kwisamba buno bwipuzho:

Kyawamina ka kulomba saka mukyangye kutendeka kutanga Baibolo nangwa kunengezha byo musakufunda?

Mwafwinwa kuba byepi pa kuba’mba mumvwishenga byo mubena kufunda pa mutwe yense uji mu uno buku? Pa kunengezha bya kufunda biji mu uno buku, esekai kwingijisha jino jishinda:

Tangai mafuka atanshi.
Tangai binembelo bijimo ne kumona byo byakwatankana na byo mubena kufunda.
Shabulai pa byambo paji mukumbu wa bwipuzho. Kuba bino kukemukwasha kwisamba biji pa mutwe ye mubena kufunda na wimufunjisha Baibolo.

Kipikichala: A. Wamukazhi ubena kutanga jifuka jiji mu mutwe wa kufundamo. B. Wamukazhi ubena kutanga Binembelo bijimo. C. Ubena kushabula paji mikumbu mu buku wa kufundamo.

Bishinka bikwabo

Bakamonyi ba kwa Yehoba baingijisha ma Baibolo apusana pusana. Nangwa byonkabyo, twatemwa bingi Baibolo wa Binembelo bya Ntanda Ipya mambo bamutuntulula bulongo, kabiji wapeela kumvwa ne jizhina ja Lesa jiji monka.—Monai kibaaba kiji pa jw.org “Nanchi Bakamonyi ba kwa Yehoba Baji na Baibolo Wabo Nyi?”

BANTU BAMO BAMBA’MBA: “Kutanga ne kufunda Baibolo kwakatazha bingi, mambo mpayankana bingi ne kukooka.”

Mwalangulukapo’mba ka pa kufunda Baibolo?

ÑANYI BISHINKA BYO MWAFUNDA?

Pa kuba’mba mumvwishenga byo mubena kutanga mu Baibolo, ikalai na mutanchi wa kutanganga Baibolo pa juba pa juba. Kabiji lombainga kwi Yehoba kwimukwasha kumvwisha byo mubena kutanga ne kunengezha bya kufunda.