Sekelainga mu Mambo a Lesa

YE MWINE wa lusekelo awa uji na muchima “wamutokela monka mu buku wa mizhilo ya Yehoba.” Uno muntu utanga Mambo a Lesa ‘ne kwialangulukapo mute ne bufuku.’ (Sala. 1:1, 2) Nanchi mwikala na luno lusekelo nyi? Mwakonsha kubayishako byepi lusekelo lufuma mu Mambo a Lesa?

Telekainga Kimye Kibena Kwamba Yehoba

Kange mupeleletu mu kutanga byambo byonka ne. Fwanyikizhai bibena kumweka byobyo bintu byo mubena kutanga. Fwanyikizhai mawi a bantu bo mubena kutangapo. Pa kutanga bitango bitanshi bya mu Baibolo, telekai Yehoba mwine byo abena kusolola pachepache kibena kubiwa pa kulenga ntanda kwikala yawama kwikalamo bantu. Telekai byo abena kubula Mwananji, aye Sendwe, amba kimye kyafika kya kulenga bantu batanshi. Fwanyikizhai kibena kumweka: Ba Adama ne Evwa basatuka, Lesa wibazhachisha, ne ko kyakayanga wibapanga ne kwibapangamo mu Paladisa. (Ntendekelo, bita. 1-3) Umvwai moyo ne kumwesha mushingi inge mwatanga’mba jiwi jafuma mwiulu jamutongola Yesu Kilishitu amba Mwana Lesa, ye atemwisha, kabiji ye atumine kwiya na kufwila bantu. (Mat. 3:16, 17) Esekai kulanguluka byo abena kwiumvwa mutumwa Yoano pa kumvwa Yehoba wabijika amba: “Tala, naalula bintu byonse ke bipya.” (Lum. 21:5) Kine, kutanga Mambo a Lesa mu jino jishinda kuleta lusekelo!

Twajijilai na kutanga mashimikila anembelwe na lutangijilo lwa mupashi, kabiji mukayuka Yehoba amba muntu wakijishamo bukata kabiji ulenga moyo. Mukeumvwa bafwenya kwipi na uno Muntu witutemwa, wingila ne atweba na lusa, witukwasha umvwe twatwajijila kweseka kuba kyaswa muchima wanji na kwikepesha, kabiji witumwesha bya kuba bulongo mu byonse byo tuba.—Yosh. 1:8; Sala. 8:1; Isa. 41:10.

Umvwe kemwikaleko na kimye kyabaya kya kutanga Baibolo, po po mukekala na lusekelo lukatampe byo mubena kukoma mu maana a kuyuka kyaswa muchima wa Lesa kwi anweba. Bino, lusekelo kechi lukapelela ponkapotu ne. Umvwe byo mubena kutanga kebimukwashe kuyuka mwakubila na makatazho, mukeumvwanga biumvwine nyimbi wa masalamo waambile’mba: “Milaye yenu yo ya kukumya; onkao mambo muchima wami kyo eilamina.” (Sala. 119:129) Ne anweba mukasekela byo mukamona mu Binembelo mafunde akwasha kupimpula byo musaka ne ndangulukilo yenu kwikela mwayila mashinda a Lesa.—Isa. 55:8, 9.

Baibolo wapana lutangijilo lwawama lwituzhikijila ku bintu byatama ne kwitumwesha jishinda jawama. Byo tumutanga, tumona’mba Yehoba ye Shetu wayuka makatazho afumamo umvwe twalondela bya lwiso lwa buntunshi. Kechi ukeba’mba tuyandenga ku bintu byatama bifuma mu kulengulwilamotu kya luputu mizhilo yanji ya byubilo byawama ne. Wituta bingi muchima kabiji ukeba’mba twikalenga bwikalo bwawamisha. Kutanga Mambo anji kwitukwasha kumvwisha mo kyawamina aye kwikala Lesa wetu kabiji Shetu wa mwiulu.

Tangainga Baibolo Moba Onse

Nyimbi wa masalamo waambile pa muntu utanga Mambo a Lesa moba onse amba: “Byonse byo akoba bikalumbuluka bulongo.” (Sala. 1:3) Nangwa kya kuba twibambulwakoloka, nangwa kya kuba tuji mu bwikalo buncha bwa kwa Satana, kabiji nangwa kya kuba Diabola ukeba kwituja, kutanga ne kwingijisha kimye kyonse bintu biji mu Mambo a Lesa, kuketulengelanga kuba bulongo mu byonse byavwangamo bulunda bwetu ne Yehoba.

Byo tuji mu lumanamo mu buno bwikalo bukote, kufunda milanguluko ya Mulenga nangwatu pa kakimye kacheche pa juba pa juba, kwakonsha kwitukosesha bingi. Bamo bo batayile pa kaleya na mambo a lwitabilo lwabo, baikalangatu na tubyepelo twakutolaula to batananga mu bibaba bya mapepala a byambo. Bachibaulanga mapepala panembwa tuno tubyepelo, kwitulamina mu mutwe, kabiji ne kwitulanguluka langulukapo. Yehoba wibakwashishe byo bebikangako kufunda maana a mu Mambo anji kwesakana na bwikalo bo bajingamo. (Mat. 5:3) Pano bino, atweba bavula twakasuluka bingi kukila byo bajinga. Kechi twafwainwa kulanguluka’mba, kutangatu lubilo lubilo kyepelo kimo mu Baibolo kuketukwasha mu jishinda ja kukumya ne. Tukamona mfweto umvwe ketunengezhe bulongo mingilo yetu kuba’mba tutangengako bitango bimo bya mu Baibolo pa juba pa juba, kulangulukapo pa bintu byo twatanga kabiji ne kwibingijisha mu bwikalo bwetu.

Kwambatu kine, mutanchi wetu wa kubilamo bintu wakonsha kuvulañana. Umvwe kino kyaubiwa, tubako patanshi bintu byakilamo kunema. Kya kumwenako, kechi twakonsha kutemwatu kupishapo juba jimo nangwa abiji kwa kubula kutoma mema ne. Onkao mambo, nangwa pamwekepotu kya byepi nangwa kya byepi mu bwikalo bwetu bwa pa juba pa juba, twafwainwa kwikalangako na kimye kya kwikosesha atwe bene na mema a bukine.—Byu. 17:11.

Tangai Mambo a Lesa Onse

Nanchi mwamutanga Baibolo yense nyi? Bamo baji bingi na mukose wa kutatwila kutanga ku Ntendekelo shoo ne ku Lumwekesho. Bino bantu bavula bakebele kutanga Baibolo yense, patanshi batatwijile na Binembelo bya bwina Kilishitu bya Kingiliki. Mambo ka? Kampe na mambo a kuba bemwenejile ano mabuku a mu Baibolo byo engila kwi abo bene pa kukeba kwenda mu ngayo ya Kilishitu. Nangwa kampe Binembelo bya bwina Kilishitu bya Kingiliki kechi byamwekelenga kuvula pa kwibitanga ne, byamwekelengatu nobe bicheche mu Baibolo. Bino panyuma ya kupwisha kutanga aa mabuku 27, baalulukijile ku mabuku 39 a Binembelo bya Kihebelu ne kutatula kwiatanga kabiji ne kwiomvwa bulongo. Kimye kyo bapwishishe kutanga Binembelo bya Kihebelu, bebikijile jimo mutanchi wa kutanga Baibolo kimye kyonse, ne kutwajijila batwajijile na kutanga Binembelo bya bwina Kilishitu bya Kingiliki kimye kya bubiji, kabiji kechi baleka kutanga ne. Mwane ne anweba kutanga Mambo a Lesa moba onse kwikale ke muteeto wenu mu bwikalo bwenu bonse.

Nanchi kujipo umo mu kisemi kyenu nangwa mu kipwilo waluba kutanga nyi? Mambo ka a kubula kumutangilangako Baibolo kimye kyonse? Mukamwenamo bingi kabiji naye ukamwenamo pa kulanguluka langulukapo pa byo abena kumvwa kabiji ne kwibingijisha mu bwikalo bwanji.—Lum. 1:3.

Mu kupita kwa kimye, mwakonsha kutangilangapo ne mabuku akwabo muji byambo byalamata ku byo mubena kutanga mu Baibolo. Ano mabuku akonsha kwimukwasha kumvwisha lukwatankano luji pakachi ka byepelo bya mu Baibolo. Umvwe Baibolo wenu uji na tubisopelo tubena kumwesha binembelo bikwabo, abyo binembelo biji pa toto tubisopelo byakonsha kwimubula mashimikila akwabo a kala akwatankana na kyokyo kintu kyo mwatangapo. Byakonsha kwimukwasha kuyuka bintu byalengejile kunemba masalamo apusana pusana kubikapotu ne makalata anembele batumwa ba kwa Yesu Kilishitu. Buku wa Insight on the Scriptures uji na mabulañano avula bingi aamba pa byajinga bantu, mapunzha, ne byubilo byo batongola mu Baibolo. Mamapu amwesha kufika kwa bungauzhi bwa mu Baibolo, kumwesha bamfumu ne bangauzhi bajingako pa kyokyo kimye, kabiji ne kumwesha moba ajiko kwipi na mwamwekelenga bintu bya mu Baibolo.

Umvwe kemulanguluke languluke pa byo mufunda, mukomvwisha ene mambo bintu bimo o byamwekelanga mukachi ka bantu ba Lesa. Kabiji mukayuka ne ene mambo Yehoba o aubijile na bantu banji mu jojo jishinda. Mukayuka Yehoba byo alanguluka pa byubilo bya makafulumende, bantu, ne bya pa muntu pa muntu. Kino kikemulengela kuyukisha byo alanguluka.

Mpito ya mu Baibolo mukeyumvwanga bingi bulongo umvwe kemufwanyikizhe mapunzha mwamwekelanga byobyo bintu. Mamapu a mapunzha o batongola mu Baibolo amwesha mushiji byo aji ne misinso iji pakachi ka mapunzha. Kya kumwenako, na pepi bena Isalela po baabukijile Kalunga Kachila? Nga Ntanda ya Mulaye yabayile byepi? Yesu waendele kufika palepa byepi kimye kyo aingilanga mwingilo wanji panopantanda? Mapunzha ka Paulo o amwene pa lwendo lwanji lonse lwa bumishonale? Mamapu ne kulumbululwa kwa mapunzha kumwesha bishinka bikemulengela kumvwa bulongo pa kutanga. Kwepi ko mwakonsha kutana ano mamapu a mapunzha atongolwa mu Baibolo? Buloshuwa wa ‘Monai Kyalo Kyawama’ uji na mamapu avula. Amo aji mu Baibolo wa New World Translation of the Holy Scriptures. Mabuku a Insight aji na ma mapu 70, kabiji ku mpelo ya buku mutanshi kuji ne nteeta ya mamapu (map index). Kebai mamapu akwabo mu buku wa Watch Tower Publications Index. Umvwe ano mabuku mufwao, ingijishai mamapu anembwa mu Kyamba Kya Usopa emukwashe kimye kyo mubena kutanga Baibolo.

Mu Binembelo bya Kihebelu, Mfumu Davida watakaikile Yehoba amba: “Milanguluko yenu, anweba Lesa, kine byo yanema kwi amiwa, kingitu! Kine kuvula kwayo kwakatazha!” (Sala. 139:17) Mu Binembelo bya bwina Kilishitu bya Kingiliki, mutumwa Paulo watotele Yehoba na mambo a kuba ‘Wasamina mu michima yetu, mu kupana kyeya kya maana a kuyuka lukumo lwa Lesa lwa mu kilungi kya Yesu Kilishitu.’ (2 Ko. 4:6) Davida ne Paulo bajingako kala pa bimye byapusana pusana; pano bino, bonse basekejile mu Mambo a Lesa. Ne anweba mwakonsha kuba byonkabyo umvwe kemwikaleko na kimye kya kutanga byonse bimupa Yehoba kupichila mu Mambo anji anembelwe na lutangijilo lwa mupashi.

TANGAINGA BAIBOLO MOBA ONSE

Lubaji lukatampe lwa lufunjisho mu Sukulu wa Mwingilo wa Lesa ke lwa kutanga Baibolo. Twimutundaika kulondela uno mutanchi.

Bitango bicheche bya mu Baibolo bebitanchika kwibitanga pa bunke bwenu ne kukesambapo mu sukulu pa mulungu pa mulungu. Kino kikemulengela pachepache kupwisha kutanga Baibolo yense.

Pa kuba’mba kutanga Baibolo moba onse kwikale lubaji lwa bwikalo bwenu, monaingapo bimye bya kumutangilamo—kampe nabiji lukelokelo, mute, mabanga, nangwa saka mukyangye kulaala. Kutangamotu bitango bimo ponka po mwamwena kimye, kechi ko kuba’mba mumutanga kimye kyonse ne.

Umvwe mwi mutwe wa kisemi, mweshai kuta muchima kisemi kyenu kupichila mu kukwasha bonse bajimo kwikala na muteeto wa kutanga. Kutangila pamo Baibolo na kisemi kyonse kwakonsha kutundaika ba mu kisemi kukebesha kutanganga Baibolo pa bunke bwabo moba onse.

Kutanga Baibolo moba onse kukebewa kwibikako. Kechi mwasemwa na kilaka kya kukeba kumutanga ne. Mwafwainwa ‘kwiasakishanga’ Mambo a Lesa. (1 Pe. 2:2) Umvwe kemukomeshe uno muteeto, nzala yenu ya ku mupashi ikabayilangako. Kepo mukamona’mba, mubena kukeba kufunjilapo byavula kupichila mu kutangilapo ne mabuku akwabo pa mutanchi wenu wa kutanga Baibolo ne kufunda kuba’mba mumvwishenga ne kusanchila bunonshi bwa ku mupashi bo etupa Yehoba.

Umvwe mwatanga Baibolo, ikalaiko na kimye kya kulangulukishapo mwatala bintu byo mwatanga—byo bibena kwimubulapo pe Yehoba, byo byakonsha kwimukwasha mu bwikalo bwenu kabiji ne byo mwakonsha kwibingijisha kukwashako bakwenu.